မွန်ရိုးရာဓလေ့ထုံးစံများ

မွန်ရိုးရာဓလေ့ထုံးစံများ

မွန်ရိုးရာဓလေ့ ဆွမ်းတော်တစ်ထောင် တင်လှူပူဇော်ပွဲ

မွန်လူမျိုးတို့သည် ထေရဝါဒ ဗုဒ္ဓဘာသာကို အထူးကိုင်းရှိုင်း လေးစားကြသည့် လူမျိုး ဖြစ်ပြီး မွန်ရိုးရာဓလေ့ ဆွမ်းတော်တစ်ထောင်တင်လှူပူဇော်ပွဲကို (သင်္ဘောဆွမ်းတော်ကြီးတင်ပွဲ) နှစ်စဉ် တော်သလင်းလပြည့်နေ့တွင် ကျင်းပလှူဒါန်းပူဇော်လေ့ ရှိကြပါသည်။

သင်္ဘောဆွမ်းတော်ကြီးတင်လှူပွဲကို အယူအဆ (၂) မျိုးဖြင့် ကျင်းပခဲ့ကြသည်ဟု မွန်သံဃာတော်များနှင့် မွန်သုတေသီပညာရှင်များက ဆိုထားကြပါသည်။

တစ်မျိုးမှာ အေဒီ ၅၄၀ ခုနှစ်တွင် သီဟိုဠ်ဘာသာဖြင့် တည်ရှိနေသော ပိဋကတ်သုံးပုံကျမ်းအစုံစုံကို ပါဠိဘာသာဖြင့် တစ်ဆင့် ကူးယူရုံသာမက ၀ိသုဒ္ဓိမဂ်ကျမ်းကြီးကိုလည်း ကိုယ်ပိုင်ဉာဏ်ဖြင့် ကိုယ်တိုင်ရေးသားပြုစုခဲ့သည့် အရှင်မဟာဗုဒ္ဓဃောသမထေရ်မြတ်၏ အပြန်လမ်းသည် မုတ္တမကမ်းခြေသို့ ဦးတည်ခဲ့ပြီး ယင်းကြောင့် မုတ္တမနေပြည်တော်အခြေစိုက် မင်းနှင့်ပြည်သူတို့ကပိဋကတ်သုံးပုံသယ်ဆောင်လာသည့် အရှင်မြတ်ကို ခရီးဦးကြိုဆိုခဲ့ကြသည်။ ထိုမှ အစပြု၍ ယနေ့တိုင် မွန်တို့ဒေသ ရာမညတွင် ဘုရားဟောသည့် ပိဋကတ်ပါဠိတော်တည်ရှိသည့် အထိမ်းအမှတ်ဖြင့် ဆွမ်းတော်ကြီးတင်ပွဲကို ဆင်နွှဲကြသည့်ဓလေ့ ပေါ်ပေါက်လာသည်ဟူ၍ ဖြစ်သည်။

ယင်းအယူအဆအပြင် ဓမ္မစေတီမင်း၏ သာသနာတော်သန့်ရှင်းတည်တံ့ပြန့်ပွားရေးလုပ်ငန်းနှင့် စပ်လျဉ်း၍ သမိုင်းနှင့် ကျမ်းအရဖော်ပြထားသည်မှာ ဓမ္မစေတီမင်းသည် သီလစင်ကြယ်သော သာသနာပြု ရဟန်းတော်များ မွေးထုတ်နိုင်ရန် ရည်ရွယ်၍ ကောဇာသက္ကရာဇ် ၈၃၈ ခုနှစ်တွင် မွန်သံဃာတော် ၄၄ ပါးကို ရာမဒူတသင်္ဘောနှင့် စိတြဒူတသင်္ဘော ဟူသော သင်္ဘောနှစ်စီးဖြင့် သီဟိုဠ် (သီရိလင်္ကာ) သို့ ကြွစေသည့်အခါ သံဃာတော် ၄၄ ပါးတို့က ကလျာဏီသိမ်တွင် ရဟန်းအသစ် ခံယူကြသည်။ ကိစ္စပြီးဆုံး၍ ပြန်သည့်အခါ သင်္ဘောနှစ်စီးအနက် ရာမဒူတသင်္ဘောသာ ခရီးစဉ်အတိုင်း ချောမွေ့စွာ ပြန်ရောက်နိုင်ခဲ့ပြီး စိတြဒူတသင်္ဘောကား လေပြင်းမုန်တိုင်းမိ၍ သင်္ဘော မမှောက်သည့်တိုင် ပြန်မရောက်နိုင်ဘဲ ပျောက်လျက်ရှိနေခဲ့သဖြင့် မင်းနှင့်တကွ တိုင်းသူပြည်သားများက ရတက်မအေး ဖြစ်ကြရသည်။ သို့သော်လည်း စိတြဒူတသင်္ဘောသည် အိန္ဒိယနိုင်ငံ (ယခင်-မဒရပ်၊  ယခု -ချင်းနိုင် – ဟု ယူဆရသည့်) ဆိပ်ကမ်းသို့ ရောက်ရှိခဲ့သည်ဟု ဆိုကြသည်။ ထိုအခါ ပျောက်နေသည့် သင်္ဘောတွင် ပါရှိသော ရဟန်းသံဃာတော်များ ဘေးအန္တရာယ် မကျရောက်စေရန်  အလို့ငှာ မင်းနှင့် တိုင်းသူပြည်သား အပေါင်းတို့က ဆုတောင်းခြင်းအမှုကို ပြုလုပ်ရာ ပျောက်ဆုံးနေသည့် စိတြဒူတသင်္ဘောပုံသဏ္ဍာန် ဖန်တီး တည်ဆောက်ထားသည့် သင်္ဘောတွင် လှူဖွယ်ဝတ္ထု အစုစုကို စုပေါင်း ထည့်ကာ ကပ်လှူဖွယ် အသွယ်သွယ်တို့ဖြင့် ဖြည့်ကြသည်။ ထို့နောက် ဖြည့်ထည့် လှူဒါန်းကြသည့် အမျိုးအမည် ရာထောင်မကသော ဒါတဗ္ဗဝတ္ထု အစုစုတို့ပါဝင်သည့် ဆွမ်းတော်ကြီးပွဲကို အတုမရှိ ဗုဒ္ဓမြတ်စွာဘုရား၏ ဂုဏ်တော်ကို အာရုံပြုလျက် တော်သလင်းလပြည့်နေ့ နံနက်အာရုဏ်တွင် ကပ်လှူပူဇော်ကာ သီလခံယူ ဆောက်တည်ခြင်း တရားနားယူခြင်း ကုသိုလ်အမှုတို့ကို ပြုလုပ်ခဲ့ကြသည်။ ထိုသို့ ဆုတောင်းပူဇော်ခြင်းအမှုတို့ကို ပြုပြီးနောက် တော်သလင်းလဆုတ် နှစ်ရက်တွင် စိတြဒူတသင်္ဘော ကောင်းမွန် ချောမွေ့စွာ ပြန်ရောက်လာသဖြင့် မင်းနှင့် တိုင်းသူပြည်သားများက ဝမ်းမြောက်ဝမ်းသာစွာဖြင့် ခရီးဦးကြို ပြုနိုင်ခဲ့သည် ဟူ၍ ဖြစ်သည်။

ထိုအယူအဆတို့ကို အကြောင်းပြု၍ မွန်ပြည်နယ် အနယ်နယ်အရပ်ရပ်ရှိ မွန်ဘုန်းတော်ကြီးကျောင်းများတွင် အလှူရှင်အပေါင်းတို့က စွမ်းနိုင်သမျှ လုပ်အား၊ အလှူငွေအားဖြင့် တော်သလင်းလပြည့်နေ့မတိုင်မီ သင်္ဘောတစ်စီးကို၊ စက္ကူ၊ဝါး၊ သစ်သားစသည်တို့ဖြင့် ပြုလုပ်တည်ဆောက်ကြပြီးနောက် ယင်းသင်္ဘော၏ ကုန်းပတ်ပေါ်တွင် ဆွမ်း၊ တံခွန်၊ ကုက္ကား၊ ပန်း၊ နံ့သာ၊ သစ်သီး၊ ကွမ်း၊ ဆီမီး စသော အမျိုးအမည် တစ်ထောင်နီးပါးရှိ လှူဖွယ်ဝတ္ထု အမျိုးမျိုးတို့ကို တင်လှူကာ တော်သလင်းလပြည့်နေ့တွင် ဗုဒ္ဓမြတ်စွာဘုရားအား ရည်မှတ်ကပ်လှူ ပူဇော်ကြခြင်း ဖြစ်သည်။ ထိုသို့ ဆွမ်းကပ်လှူသည့် အလေ့အထကို ယနေ့တိုင် ဆောင်ရွက် ကျင်းပလေ့ ရှိကြပြီး ဆွမ်းတော်တစ်ထောင် တင်လှူပူဇော်ပွဲ၊ မွန်ဘာသာဖြင့် သ္ဘင်ဗဝ်သဿုတ်ကၞင် ဟုလည်း မှတ်သားခေါ်ဝေါ်ကြကြောင်း သိရသည်။

တစ်ကမ္ဘာလုံးတွင် ဗုဒ္ဓဘာသာရှိနေသော်လည်း တစ်မူထူးခြားသည့် သင်္ဘောဆွမ်းကြီးကပ်သည့် ရိုးရာဓလေ့မှာမူ မွန်တိုင်းရင်းသားလူမျိုးတစ်မျိုးတွင်သာရှိကြသည့် ဓလေ့ဖြစ်ကာ မွန်လူမျိုးတို့ အခြေချနေထိုင်ရာ နေရပ်အသီးသီး၌ သင်္ဘောဆွမ်းကပ်လှူပူဇော်သည့်ပွဲကို တော်သလင်းလပြည့်နေ့တွင် ကျင်းပလေ့ရှိကြပါသည်။ ယင်းနေ့မှာပင် အချို့မွန်ရွာ၊ မွန်ဘုန်းတော်ကြီးကျောင်းများ၌ စတုမဓု ပျားရည်လောင်းလှူပွဲကိုလည်း ကျင်းပလေ့ရှိကြောင်း သိရှိရပေသည်။

ထိုသို့ မွန်လူမျိုးများ အခြေချနေထိုင်ရာ မွန်ပြည်နယ် (ရာမညတိုင်း) အတွင်း နေရာဒေသအသီးသီး၊ ရပ်ကွက် ကျေးရွာအသီးသီး၌ ဆွမ်းတော်တစ်ထောင် တင်လှူပူဇော်ပွဲ (သင်္ဘောဆွမ်းတော်ကြီးတင်ပွဲ) ကို နှစ်စဉ် တော်သလင်းလပြည့်နေ့ ကျရောက်တိုင်း ရိုးရာမပျက် တက်ကြွစွာ ဆင်ယင်ကျင်းပလျက် ပူဇော် ကုသိုလ်ပြုသည့် အစဉ်အလာမှာ ကြည်ညို လေးစားစွာဖြစ်၍ မျိုးရိုးအစဉ်အဆက် ဆက်လက် ထိန်းသိမ်းဖွယ်ရာ ဘာသာရေး အမွေအနှစ် တစ်ရပ်ပင် ဖြစ်ပါတော့သည်။

 

www.moea.gov.mm (beta) တွင် ဖော်ပြထားသည့် အချက်အလက်များနှင့် ပတ်သက်၍ အကြံပြုလိုသည်များရှိပါက webmaster@moea.gov.mm သို့ mail ဖြင့် ဖြစ်စေ ဖုန်း ၀၆၇၃၄၀၉၅၀၄ သို့ ရုံးချိန်အတွင်းဖြစ်စေ ဆက်သွယ်နိုင်ပါကြောင်း ဖော်ပြအပ်ပါသည်။