မွန်ပွဲတော်နှင့် အထိမ်းအမှတ်နေ့များ

မွန်ပြည်နယ်နေ့

၁၉၇၄ ခုနှစ် ဖွဲ့စည်းပုံအခြေခံဥပဒေအရ မွန်ပြည်နယ် ပေါ်ပေါက်လာသည့်အတွက် အခြေခံဥပဒေအတည်ပြုသည့်နေ့ ၁၉၇၄ ခုနှစ်၊ ဇန်နဝါရီလ ၃ ရက်နေ့ကို မွန်ပြည်နယ်နေ့အဖြစ် မူလက သတ်မှတ်ခဲ့သည်။

သို့သော် အခြေခံဥပဒေနေ့နှင့် တစ်ထပ်တည်းဖြစ်နေသည့်အတွက် ယင်းနေ့ကို ပယ်ဖျက်ကာ လမ်းစဉ်ပါတီ ဗဟိုအလုပ်အမှုဆောင်အဖွဲ့ အစည်းအဝေးတွင် မွန်ပြည်နယ်ပေးရန် အတည်ပြု ဆုံးဖြတ်ခဲ့သည့် မတ်လ ၁၉ ရက်နေ့ကို မွန်ပြည်နယ်နေ့အဖြစ် ပြောင်းလဲ သတ်မှတ်ခဲ့ကြပါသည်။

ဘာသာရေးနှင့် သမိုင်းအစဉ်အလာ ကြီးမားသည်ဟု မှတ်ယူထားကြသည့် မွန်တိုင်းရင်းသားတို့၏  ရိုးရာဓလေ့ထုံးစံများတွင် ဘာသာရေးနှင့်နှီးနွယ်သည့် ထုံးတမ်းအစဉ်အလာဓလေ့များ၊ ပွဲတော်များမှာ ပိုမို ထင်ရှားလှသည်။ မွန်တိုင်းရင်းသားများတွင် လူမျိုးစုကွဲပြားခြင်း မရှိဘဲ ခိုင်မာသော စာပေယဉ်ကျေးမှုကို ယနေ့တိုင် စွဲမြဲစွာ ထိန်းသိမ်းထားကြသည်။