September 24, 2019 News 0 Comments

နေပြည်တော်ကောင်စီနယ်မြေအတွင်းရှိ တိုင်းရင်းသားစာပေနှင့်ယဉ်ကျေးမှုအသင်းအဖွဲ့များသို့ KG တန်းများအတွက် ပုံပြ ပုံပြင်စာအုပ်များနှင့် ထောက်ပံ့ငွေများ ပေးအပ်

နေပြည်တော်၊ စက်တင်ဘာ ၂၄

တိုင်းရင်းသားကလေးငယ်များ မြန်မာစာကို စတင်ထိတွေ့သင်ယူရာ၌ အထောက်အကူဖြစ် စေရန်နှင့် တိုင်းရင်းသားဘာသာစကားကိုပါ တွဲဖက်သင်ယူ တတ်မြောက်နိုင်ရန် ရည်ရွယ်ကာ နေပြည်တော်ကောင်စီနယ်မြေမှ တိုင်းရင်းသားစာပေနှင့် ယဉ်ကျေးမှုအသင်းအဖွဲ့များအား ပုံပြ ပုံပြင်စာအုပ်များနှင့် ထောက်ပံ့ငွေပေးအပ်ပွဲအခမ်းအနားကို ယနေ့နံနက်ပိုင်း၌ နေပြည်တော်ရှိ တိုင်းရင်းသားလူမျိုးများရေးရာဝန်ကြီးဌာန၊ ရုံးအမှတ် ၁၄  စုပေါင်းခန်းမကြီး၌ ကျင်းပခဲ့ပါသည်။

အခမ်းအနားတွင် ပြည်ထောင်စုဝန်ကြီး နိုင်သက်လွင်က ပြည်ထောင်စုကြီးအတွင်းက တိုင်းရင်းသားများ တစ်ဦးနှင့်တစ်ဦး ချစ်ကြည်ရင်းနှီးရန် အချင်းချင်းဆက်သွယ်ပြောဆိုကြသည့် ဘာသာစကားက အရေးကြီးဆုံးဖြစ်ပါကြောင်း၊ ပထဝီအနေအထားကြောင့် ဘာသာစကားနှင့် လူမျိုးစုများ ကွဲပြားကြပြီး မြန်မာနိုင်ငံတွင် လူမျိုးစုပေါင်း ၁၀၀ကျော်ရှိပါကြောင်း၊ ဘာသာစကား အခက်အခဲကြောင့် တိုင်းရင်းသားလူငယ်များတွင် ဘာသာစာပေသင်ကြားမှုတွင် အခက်အခဲ ဖြစ်ရပါကြောင်း၊ စာတတ်မှ ဗဟုသုတများရရှိပြီး အမှားအမှန်ကို ခွဲခြားနိုင်မှသာ ပြည်တွင်း ငြိမ်းချမ်းရေးကို တိုင်းရင်းသားများ ရရှိနိုင်မည် ဖြစ်ပါကြောင်း၊ အလားတူ အာဖရိကနှင့် ဥရောပဒေသများတွင်လည်း ပထဝီအနေအထားကြောင့် လူမျိုးများ ကွဲပြားခဲ့ကြပြီး ရွှေ့ပြောင်းသွားလာကြခြင်း၊ လူကုန်ကူးမှုများ၊ လူဖြူလူမည်း ကွဲပြားမှုများ ဖြစ်ပေါ်ခဲ့ပါကြောင်း၊ သို့ရာတွင် လူမည်းကလေးများကို စာပေသင်ကြားမှု ပြုလုပ်ပေးခဲ့သဖြင့် အာဖရိကတွင် လူမည်းခေါင်းဆောင်များ ပေါ်ထွက်လာပါကြောင်း၊ မြန်မာနိုင်ငံတွင်လည်း KG အဆင့်၊ မူလတန်းအဆင့် သင်ကြားမှုများကို ၂၀၁၇ ခုနှစ်မှ စတင်ခဲ့ပြီး ဒေသခံတိုင်းရင်းသားများအား တိုင်းရင်းသားဘာသာသင် ဆရာဆရာမများအဖြစ် ခန့်ထားနိုင်ရေး ပညာရေးဝန်ကြီးဌာနနှင့် ပူးပေါင်းကြိုးပမ်းခဲ့ပါကြောင်း၊ UNICEF နှင့် သက်ဆိုင်ရာ တိုင်းရင်းသားစာပေနှင့် ယဉ်ကျေးမှုအသင်းအဖွဲ့တို့က ပြုစုထားသော ယခုပုံပြပုံပြင်စာအုပ်များကို လက်ဝယ်ရရှိပြီး သင်ကြားခွင့်ရသဖြင့် တိုင်းရင်းသားကလေးငယ်များ အတွက် သင်ကြားသင်ယူမှုတွင် ရှင်းလင်းလွယ်ကူမည်ဖြစ်ပါကြောင်း၊ တိုင်းရင်းသားဘာသာ ၆၆ မျိုး၏ ပုံပြပုံပြင်စာအုပ်များကို မူလက ဆရာကိုင်စာအုပ်ကြီးအစား ကလေးငယ်များ အချိန်ပြည့် လေ့လာခွင့်ရရှိရန်နှင့် ထိရောက်စွာ တတ်မြောက်စေရန် ရည်ရွယ်၍ စာအုပ်အရွယ်အစား ပြောင်းလဲခဲ့သဖြင့် မူလအရေအတွက်ထက် ပိုမို ပုံနှိပ်ထုတ်ဝေနိုင်ခဲ့ပြီး တိုင်းဒေသကြီးနှင့် ပြည်နယ်များရှိ  စာပေနှင့်ယဉ်ကျေးမှုအဖွဲ့များသို့  ၃ နှစ်စာ ဖြန့်ဝေပေးနိုင်ရေး စီစဉ်ဆောင်ရွက် နိုင်ခဲ့ပါကြောင်း၊ နွေရာသီကာလတွင် အခြေခံပညာကျောင်းများ၌ တိုင်းရင်းသားစာပေများ သင်ကြားရာတွင် သက်ဆိုင်ရာ တာဝန်ရှိသူများနှင့် ညှိနှိုင်းပေးမှုကြောင့် အခက်အခဲမရှိ သင်ကြား နေပြီ ဖြစ်ပါကြောင်း၊ တိုင်းရင်းသားစာပေနှင့်ယဉ်ကျေးမှုအသင်းအဖွဲ့များအနေဖြင့် အခက်အခဲများ ရှိပါက လိုအပ်သည့် အကူအညီများကို တိုင်းဒေသကြီးနှင့်ပြည်နယ်ရှိ ဝန်ကြီးဌာနရုံးများသို့ ဆွေးနွေး ညှိနှိုင်းနိုင်ပါကြောင်းနှင့် ပြည်ထောင်စုရှိ တိုင်းရင်းသားလူမျိုးစုများ စည်းလုံးညီညွတ်စွာ ဖြင့် ဒေသဖွံ့ဖြိုးတိုးတက်စေရန် ဖန်တီးနိုင်ရေး ဆောင်ရွက်သွားကြရန် တိုက်တွန်း ပြောကြားပါသည်။

          ဆက်လက်၍ ဒုတိယဝန်ကြီး ဦးလှမော်ဦးက  တိုင်းရင်းသားစာပေနှင့်ယဉ်ကျေးမှု ဖွံ့ဖြိုးတိုး တက်ရေးနှင့်စပ်လျဉ်း၍ ဆောင်ရွက်နေမှုအခြေအနေနှင့် ဆက်လက်ဆောင်ရွက်မည့် ကိစ္စရပ်များကို ပြောကြားပါသည်။

          ထို့နောက် ပြည်ထောင်စုဝန်ကြီး နိုင်သက်လွင်၊ ဒုတိယဝန်ကြီး ဦးလှမော်ဦးနှင့် နေပြည်တော်ကောင်စီဝင် ဦးညီညီထွန်းတို့က ကရင်ဖြူ၊ ဂေဘား၊ ကယန်း၊ ပအိုဝ်း၊ အရှိုချင်း၊ မွန်၊ ဒါးရင်ဒူးနှင့် ရခိုင်လူမျိုးများ၏ စာပေနှင့် ယဉ်ကျေးမှုအသင်းအဖွဲ့ ကိုယ်စားလှယ်များအား ပုံပြပုံပြင်စာအုပ်များနှင့် ထောက်ပံ့ငွေများကို အသီးသီး ပေးအပ်ခဲ့ကြပြီး တိုင်းရင်းသားစာပေနှင့် ယဉ်ကျေးမှုအသင်းအဖွဲ့များကိုယ်စား ကရင်ဖြူမျိုးနွယ်စု တာဝန်ခံ ဦးစောစိုးနိုင်က ကျေးဇူးတင် စကား ပြန်လည်ပြောကြားခဲ့သည်။

          ဆက်လက်၍ ပြည်ထောင်စုဝန်ကြီးနှင့် အခမ်းအနားတက်ရောက်လာသူများ အတူတကွ မှတ်တမ်းတင်ဓာတ်ပုံ ရိုက်ကူးကြပါသည်။

အခမ်းအနားသို့  နေပြည်တော်ကောင်စီဝင်၊ တိုင်းရင်းသားလူမျိုးများရေးရာဝန်ကြီးဌာနမှ ညွှန်ကြားရေးမှူးချုပ်များနှင့် တာဝန်ရှိသူများ၊ တိုင်းရင်းသားစာပေနှင့်ယဉ်ကျေးမှုဦးစီးဌာနမှ  တာဝန်ရှိသူများ၊ နေပြည်တော်ကောင်စီနယ်မြေအတွင်းရှိ  တိုင်းရင်းသားစာပေနှင့် ယဉ်ကျေးမှု အသင်းအဖွဲ့များမှ တာဝန်ရှိသူများနှင့် ကိုယ်စားလှယ်များ၊ ကျောင်းအုပ်ကြီးများနှင့် ဆရာ ဆရာမများ တက်ရောက်ခဲ့ကြသည်။

ယခု ထောက်ပံ့ပေးအပ်ပွဲတွင် ကရင်ဖြူ၊ ဂေဘား၊ ကယန်း၊ ပအိုဝ်း၊ အရှိုချင်း၊ မွန်၊ ဒါးရင်ဒူးနှင့် ရခိုင် တိုင်းရင်းသားစာပေတို့ဖြင့် ပြုစုထားသည့် ပုံပြပုံပြင်စာအုပ် ၆၃၀၆ အုပ်ကို နေပြည်တော်ကောင်စီနယ်မြေ အတွင်းရှိ သက်ဆိုင်ရာ တိုင်းရင်းသားစာပေနှင့် ယဉ်ကျေးမှုအသင်းအဖွဲ့များသို့ တိုင်းရင်းသားလူမျိုးများရေးရာဝန်ကြီးဌာနက ပေးအပ် ထောက်ပံ့ခဲ့ပြီး အဆိုပါ စာအုပ်များတွင် တိုင်းရင်းသားဘာသာစာပေအပြင် မြန်မာဘာသာနှင့် ယှဉ်တွဲရိုက်နှိပ် ဖော်ပြထားသဖြင့် တိုင်းရင်းသားကလေးငယ်များအတွက် စာပေ သင်ကြား သင်ယူမှုပြုရာတွင် ပိုမိုသိရှိနားလည်စေနိုင်မည့် အကျိုးကျေးဇူးများ ရရှိမည် ဖြစ်ကြောင်း သိရသည်။

(ပြည်တွင်းပြည်ပဆက်ဆံရေးနှင့် သတင်းပြန်ကြားရေးဌာနခွဲ)

Share: