ပြည်ထောင်စုသမ္မတမြန်မာနိုင်ငံတော်အစိုးရ
တိုင်းရင်းသားလူမျိုးများရေးရာဝန်ကြီးဌာန
တိုင်းရင်းသားလူမျိုးများရေးရာဝန်ကြီးဌာန
.jpg)
ဧရာဝတီတိုင်းဒေသကြီး တိုင်းရင်းသားစာပေနှင့်ယဉ်ကျေးမှုဦးစီးဌာန၊ ညွှန်ကြားရေးမှူးရုံးအနေဖြင့် ရခိုင်တိုင်းရင်းသားစာပေနှင့်ယဉ်ကျေးမှု အသင်းနှင့် ပူးပေါင်း၍ တိုင်းဒေသကြီးအစိုးရအဖွဲ့၏ ခွင့်ပြုရန်ပုံငွေဖြင့် ကျင်းပပြုလုပ်သည့် တိုင်းဒေသကြီးအဆင့် ရခိုင်ရိုးရာရထားဆွဲပွဲနှင့် ကျင်ကိုင်ပွဲ ဖွင့်ပွဲ အခမ်းအနားကို ၂၀၂၄ ခုနှစ်၊ ဖေဖော်ဝါရီလ ၂၈ ရက်နေ့တွင်လည်းကောင်း၊ ဆုချီးမြှင့်ပွဲအခမ်းအနားကို ဖေဖော်ဝါရီလ ၂၉ ရက်နေ့တွင်လည်းကောင်း ဧရာဝတီတိုင်းဒေသကြီး၊ ပုသိမ်မြို့၊ ဟစ်တိုင်ကွင်း၌ ကျင်းပ ပြုလုပ်ခဲ့ရာ အခမ်းအနားသို့ ဧရာဝတီတိုင်းဒေသကြီးအစိုးရအဖွဲ့ဝင် ဝန်ကြီးများနှင့် ၎င်းတို့၏ဇနီးများ၊ တိုင်းရင်းသားစာပေနှင့်ယဉ်ကျေးမှုဦးစီးဌာနနှင့် တိုင်းရင်းသားအခွင့်အရေးများကာကွယ်စောင့်ရှောက်ရေး ဦးစီး ဌာန မှ အရာထမ်း၊ အမှုထမ်းများ၊ တိုင်းအဆင့်ဌာနဆိုင်ရာအကြီးအကဲများ၊ ရခိုင်တိုင်းရင်းသား စာပေနှင့်ယဉ်ကျေးမှုအသင်းကိုယ်စားလှယ်များ၊ ကရင်/ချင်း တိုင်းရင်းသားစာပေနှင့်ယဉ်ကျေးမှုအသင်းကိုယ်စားလှယ်များနှင့်ရခိုင်တိုင်းရင်းသားညီအစ်ကိုမောင်နှမများတက်ရောက်အားပေးချီးမြှင့် ခဲ့ပါသည်။ ရခိုင်ရိုးရာရထားဆွဲပွဲနှင့်ကျင်ကိုင်ပွဲ ဖွင့်ပွဲအခမ်းအနားကို တာဝန်ရှိသူများက ဖဲကြိုးဖြတ်ဖွင့်လှစ်ပေးခဲ့ပြီး ရခိုင်တိုင်းရင်းသူများက ရိုးရာယိမ်းအကများဖြင့် ကပြဖျော်ဖြေခဲ့ပါသည်။ ထို့နောက် ရခိုင်ရိုးရာရထားဆွဲပွဲ၊ ကျင်ကိုင်ပွဲနှင့်သက်ဆိုင်သည့် စည်းမျဉ်း၊ စည်းကမ်းများအား ရှင်းလင်းပြောကြားခဲ့ပြီး ရခိုင် ရိုးရာရထားဆွဲပွဲ၊ ကျင်ကိုင်ပွဲအခမ်းအနားကို စတင်ခဲ့ပါသည်။ရခိုင်ရိုးရာရထားဆွဲပွဲတွင် ပြိုင်ပွဲဝင် (၁၀) သင်း၊ ကျင်ကိုင်ပွဲတွင် ပြိုင်ပွဲဝင် (၁၂) ဦး ပါဝင်ယှဉ်ပြိုင်ခဲ့ပြီးရခိုင်ရိုးရာကျင်ကိုင်ပွဲတွင် ရွှေမောင်း၊ ငွေမောင်း၊ကြေးမောင်းဆုရရှိသူများနှင့် ရခိုင်ရိုးရာရထားဆွဲပွဲတွင်ပထမဆု၊ဒုတိယဆု၊တတိယဆု၊နှစ်သိမ့်ဆုရရှိသူများအားဆုများအသီးသီး ပေးအပ်ချီးမြှင့်ခဲ့ ကြောင်း သတင်းရရှိပါသည်။
ဆက်လက်ဖတ်ရှုပါရန်
ကရင်ပြည်နယ်အစိုးရအဖွဲ့၊ တိုင်းရင်းသားရေးရာဝန်ကြီးဦးဆောင်မှုဖြင့် တိုင်းရင်းသားစာပေနှင့် ယဉ်ကျေးမှုဦးစီးဌာနနှင့် ဗမာတိုင်းရင်းသားလူမျိုးရေးရာအသင်းတို့ ပူးပေါင်းပြီး အခမ်းအနားမှူးသင်တန်း သင်တန်းဖွင့်ပွဲအခမ်းအနားကို မတ်လ(၅)ရက်နေ့က တိုင်းရင်းသားလူမျိုးများရေးရာဝန်ကြီးဌာန၊ ကရင်ပြည်နယ်၊ ညွှန်ကြားရေးမှူးရုံး၊ အစည်းအဝေးခန်းမတွင် ကျင်းပပြုလုပ်ခဲ့ပါသည်။ အခမ်းအနားတွင် ကရင်ပြည်နယ်အစိုးရအဖွဲ့ဝင် တိုင်းရင်းသားရေးရာဝန်ကြီး ဦးစန်းကိုက အခမ်းအနားမှူးသင်တန်းသို့ တက်ရောက်လာသည့် သင်တန်းသား/သင်တန်းသူများအား အခမ်းအနားမှူး သင်တန်းသည် အခမ်းအနားများဆောင်ရွက်ရာမှာ များစွာအထောက်အကူ ရရှိစေပြီး အကျိုးရှိစေသည့် သင်တန်းတစ်ခုဖြစ်သည့်အတွက် ယခုလိုအချိန်တိုအတွင်းမှာ နည်းပြဆရာ၏ သင်ကြားပေးမည့် သင်ခန်းစာများကို အလေးနက်ထားလိုက်နာ၍ မှတ်သားသင်ယူသွားကြစေလိုပါကြောင်း၊ မိမိတို့တိုင်းရင်းသားလူမျိုးများအတွက် နိုင်ငံကောင်းကျိုးအတွက် ကျရာအခန်းကဏ္ဍမှ ပါဝင်ပူးပေါင်း ဆောင်ရွက်စေလိုပါကြောင်းနှင့် သင်ကြားတတ်မြောက်ထားတဲ့ ပညာရပ်များဖြင့် နိုင်ငံတော်နှင့် လူမျိုးတို့ အတွက် တစ်ထောင့်တစ်နေရာမှ အကျိုးရှိရှိအသုံးချသွားစေလိုပါကြောင်း ပြောကြားခဲ့ပါသည်။ ဆက်လက်ပြီး ကရင်ပြည်နယ်အစိုးရအဖွဲ့ဝင် တိုင်းရင်းသားရေးရာဝန်ကြီး ဦးစန်းကိုမှ ထောက်ပံ့ချီးမြှင့်ငွေကျပ်သိန်း(၂၀)တိတိအား ပေးအပ်ခဲ့ပြီး သင်တန်းနည်းပြဆရာ Sunday Ko Ko (MRTV Presenter) အား အမှတ်တရလက်ဆောင်ချီးမြှင့်ခဲ့ပါသည်။ အဆိုပါသင်တန်းကို မတ်လ(၅)ရက်နေ့မှ (၇)ရက်နေ့အထိ ဖွင့်လှစ်မည်ဖြစ်ပြီး ဌာနဆိုင်ရာအသီးသီးနှင့် စာပေနှင့်ယဉ်ကျေးမှုအသင်းများမှ သင်တန်းသား၊ သင်တန်းသူ စုစုပေါင်း (၇၀)ဦးကျော် တက်ရောက်ခဲ့ကြောင်း သတင်းရရှိခဲ့ပါသည်။
ဆက်လက်ဖတ်ရှုပါရန်.jpg)
တိုင်းရင်းသားလူမျိုးများရေးရာဝန်ကြီးဌာန၊ တိုင်းရင်းသားစာပေနှင့်ယဉ်ကျေးမှုဦးစီးဌာန ဌာနတွင်း အခြေခံကွန်ပျူတာသင်တန်း အမှတ်စဉ် (၁/၂၀၂၄) သင်တန်းဖွင့်ပွဲ အခမ်းအနားကို ယနေ့ နံနက်ပိုင်းတွင် တိုင်းရင်းသားလူမျိုးများရေးရာဝန်ကြီးဌာန၊ အစည်းအဝေးခန်းမ၌ ကျင်းပပြုလုပ်ရာ ပြည်ထောင်စုဝန်ကြီး Jeng Phang နော်တောင်၊ ဒုတိယဝန်ကြီး ဦးဇော်အေးမောင်၊ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေး မှူးချုပ်များ၊ အရာထမ်း၊ အမှုထမ်းများ၊ သင်တန်းမှူး၊ သင်တန်းနည်းပြများနှင့် သင်တန်းသား၊ သင်တန်းသူများ တက်ရောက်ခဲ့ကြပါသည်။ ရှေးဦးစွာ ပြည်ထောင်စုဝန်ကြီးက အဖွင့်အမှာစကားပြောကြားရာတွင် ကွန်ပျူတာ နည်းပညာသည် တတ်သင့်တတ်အပ်သည့် ပညာရပ်ဖြစ်သည့်အတွက် တတ်သင့်တတ်အပ်သည့် အတတ်ပညာများကို တတ်မြောက်ခြင်းသည် မင်္ဂလာတစ်ပါးဖြစ်ပါကြောင်း၊ နိုင်ငံတော်၏ ပြည်ထောင်စုတည်ဆောက်ရေးလုပ်ငန်းစဉ်များတွင် စွမ်းအားစုတစ်ရပ်အဖြစ် ပါဝင်နိုင်ရေးနှင့် ကောင်းမွန်သည့် လူ့စွမ်းအားအရင်းအမြစ်ကောင်းများ ဖြစ်စေရေးတို့အတွက် ဗလငါးတန်နှင့် ပြည့်စုံသော လူငယ်၊ လူရွယ်၊ လူလတ်များ လိုအပ်ပါကြောင်း၊ ဝန်ထမ်းများ၏ လုပ်ငန်းခွင် စွမ်းဆောင်ရည်နှင့် ကိုယ်ရည်ကိုယ်သွေးများ ဖွံ့ဖြိုးတိုးတက်စေရေးအတွက် လေ့ကျင့်ပျိုးထောင်ပေးခြင်းကို ဝန်ကြီးဌာန၏ အရေးကြီး ဦးစားပေး လုပ်ငန်းစဉ်များထဲမှ တစ်ခုအဖြစ်သတ်မှတ်ပြီး လိုအပ်သည့် အခြားသင်တန်းများကိုလည်း အလေးထားဖွင့်လှစ်ပေးလျက်ရှိပါကြောင်း၊ ယနေ့ ကမ္ဘာပေါ်တွင် နည်းပညာဖွံ့ဖြိုးမှုသည် တစ်နေ့ထက် တစ်နေ့ တိုးတက်ပြောင်းလဲနေပြီး ကမ္ဘာကြီးက ရွာကြီးတစ်ရွာသဖွယ် ကူးလူးဆက်ဆံမှုများ ပိုမိုလျင်မြန်လာနေသည်ကို အားလုံး အသိပင်ဖြစ်ပါကြောင်း၊ သို့ဖြစ်ရာ ဝန်ကြီးဌာနတွင်းဖြစ်စေ၊ အခြား မိတ်ဖက်ဝန်ကြီးဌာနများနှင့် ဖြစ်စေ၊ ပြည်သူကို ဝန်ဆောင်မှုပေးရသည့် ဌာနများတွင်ဖြစ်စေ၊ နိုင်ငံတကာအစိုးရများနှင့် ဖြစ်စေ ချိတ်ဆက် ပူးပေါင်းဆောင်ရွက်ရာတွင် ပိုမိုလွယ်ကူလျင်မြန်လာစေရန် ကွန်ပျူတာ စွမ်းရည်သည် မရှိမဖြစ်လိုအပ်နေပြီး အဆင့်မြင့်နည်းပညာများကိုလည်း တစ်ဆင့်ပြီးတစ်ဆင့် မြှင့်တင်ဆောင်ရွက်ကြရန် ဖြစ်ပါကြောင်း၊ ယခုသင်တန်းသည် အခြေခံမျှသာဖြစ်၍ ဆက်လက် လေ့လာသင်ယူမှု၊ လေ့ကျင့်မှုများ ပြုလုပ်သွားကြမည်ဆိုပါက ရုံးလုပ်ငန်းတွင် ကွန်ပျူတာ ကျွမ်းကျင်သည့် ဝန်ထမ်းများဖြစ်လာကြမည်ဟု ယုံကြည်ပါကြောင်း၊ သင်တန်းမှလေ့လာသင်ယူခဲ့သည့် သင်ခန်းစာများကို လက်တွေ့နယ်ပယ်တွင် စနစ်တကျ နည်းလမ်းမှန်ကန်စွာဖြင့် ပြန်လည်အသုံးချနိုင်ရေးအတွက် ဆက်လက်ကြိုးစားသွားကြရန် အလေးအနက် မှာကြားလိုပါကြောင်း၊ သင်တန်းသားများအနေဖြင့် အပြန်အလှန်လေးစားလိုက်နာခြင်း၊ ပူးပေါင်းဆောင်ရွက်ခြင်း၊ ပေါင်းစပ်ညှိနှိုင်းခြင်းများဖြင့် လေ့လာသင်ယူကြရန်ဖြစ်ပြီး မိမိဘဝတိုးတက်ရေးမှသည် မိမိဌာနတိုးတက်ရေး အပါအဝင် ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုမြန်မာနိုင်ငံတော်တည်ဆောက်ရေးနှင့် ဖွံ့ဖြိုးတိုးတက်ရေးလုပ်ငန်းစဉ်များတွင် စွမ်းအားစုတစ်ရပ်အနေဖြင့် သစ္စာရှိမှန်ကန်စွာဖြင့် အကျိုးရလဒ်ကောင်း မြောက်များစွာကို ဆောင်ကြဉ်းပေးနိုင်သော ပြည်သူ့ဝန်ထမ်းကောင်းများနှင့် နိုင်ငံ့ဝန်ထမ်းကောင်းများ ဖြစ်နိုင်ကြပါစေကြောင်း ပြောကြားပါသည်။ ဆက်လက်၍ ဒုတိယဝန်ကြီး ဦးဇော်အေးမောင်က ကွန်ပျူတာအကြောင်း သိကောင်း စရာများကို ပြောကြားပြီး၊ Information Technology (IT)ခေတ်တွင် ကွန်ပျူတာသည် မရှိမဖြစ် အသုံးဝင်၍ တတ်မြောက်ရန်လည်း လိုအပ်ပါကြောင်း၊ ကွန်ပျူတာအခြေခံကောင်း မှသာ ကွန်ပျူတာနှင့် ဆက်စပ်သော နည်းပညာများကို အကျိုးရှိစွာ အသုံးချပြီး အဆင့်မြင့် တက်လှမ်းနိုင်မည်ဖြစ်ပါကြောင်း၊ ကမ္ဘာပေါ်တွင် နည်းပညာတိုးတက်မှုကြောင့် နိုင်ငံများ၊ အဖွဲ့အစည်းများ၊ ကုမ္ပဏီများ တိုးတက်လာသည်ကို မြင်တွေ့ရမည် ဖြစ်ပါကြောင်း၊ ကွန်ပျူတာသည် ကမ္ဘာကြီးကို ကြီးစိုးသော Artificial Intelligence (AI) နည်းပညာတစ်ခု ဖြစ်ပြီး အခြေခံကွန်ပျူတာ တတ်မြောက်ပြီးပါက Chat GPT ကဲ့သို့ AI နည်းပညာများကို ဆက်လက်လေ့လာကြရန် တိုက်တွန်းလိုပါကြောင်း၊ ယနေ့ခေတ်တွင် အင်္ဂလိပ်စာ၊ အင်တာနက်၊ အိုင်တီ (Information Technology) တို့ကိုလည်း ကျွမ်းကျင်နှံ့စပ်စွာ တတ်မြောက်ထားရန် လိုအပ်ပါကြောင်း၊ ပညာရပ်တစ်ခုကို သင်ယူရာတွင် နောက်ကျသည်ဟူ၍ မရှိဘဲ စတင်သင်ယူ နိုင်ရန်သာ အရေးကြီးပြီး နောက်ဆုံးတွင် အောင်မြင်မှု၏ အသီးအပွင့်များကို ရရှိခံစားရမည်ဖြစ် ပါကြောင်း၊ သင်တန်းမှ ပို့ချခဲ့သည့် သင်ခန်းစာများကို လက်တွေ့နယ်ပယ်တွင် စဉ်ဆက်မပြတ် ပြန်လည်အသုံးချနိုင်ရေးအတွက် နိုင်ငံတော်က ထုတ်ပြန်ထားရှိသည့် ရုံးလုပ်ငန်း စည်းမျဉ်း စည်းကမ်းများနှင့်အညီ ဂရုပြုပြီး ဆက်လက်ကြိုးစားသွားကြရန် အလေးအနက်ထား မှာကြားလိုပါကြောင်း ပြောကြားပါသည်။ ထို့နောက် သင်တန်းသား၊ သင်တန်းသူများက တစ်ဦးချင်း မိတ်ဆက်စကား ပြောကြားပြီး ပြည်ထောင်စုဝန်ကြီး၊ ဒုတိယဝန်ကြီးနှင့် တာဝန်ရှိသူများသည် သင်တန်းသား၊ သင်တန်းသူများနှင့်အတူ စုပေါင်းမှတ်တမ်းတင်ဓာတ်ပုံ ရိုက်ကူးပြီး အခမ်းအနားကို ရုပ်သိမ်းခဲ့ပါသည်။ ယနေ့ဖွင့်လှစ်သည့်သင်တန်းသို့ သင်တန်းသား၊ သင်တန်းသူ (၁၃) ဦး တက်ရောက်ကြပြီး သင်တန်းကာလမှာ ရက်သတ္တ (၄) ပတ်ကြာမြင့်မည်ဖြစ်ကြောင်း သိရှိရပါသည်။
ဆက်လက်ဖတ်ရှုပါရန်
(၇၇)ကြိမ်မြောက် မွန်အမျိုးသားနေ့အခမ်းအနားကို ပဲခူးတိုင်းဒေသကြီး မွန်စာပေနှင့်ယဉ်ကျေးမှုကော်မတီမှ ကြီးမှူး၍ ၂၀၂၄၊ ဖေဖော်ဝါရီလ (၂၅) ရက်နေ့က ပဲခူးမြို့၊ ဗုဒ္ဓအသံဓမ္မဗိမာန်တွင် ကျင်းပပြုလုပ်ရာ ပဲခူးတိုင်းဒေသကြီးအစိုးရအဖွဲ့၊ တိုင်းရင်းသားရေးရာဝန်ကြီး၊ တိုင်းရင်းသားစာပေနှင့်ယဉ်ကျေးမှုဦးစီးဌာန၊ ညွှန်ကြားရေးမှူးနှင့်ဝန်ထမ်းများ၊ ပဲခူးတိုင်းဒေသကြီး မွန်စာပေနှင့်ယဉ်ကျေးမှု ကော်မတီအဖွဲ့ဝင်များ၊ ဌာနဆိုင်ရာများမှ တာဝန်ရှိ ပုဂ္ဂိုလ်များ၊ ဖိတ်ကြား ထားသော ဧည့်သည်တော်များနှင့် မွန်တိုင်းရင်းသား/တိုင်းရင်းသူများ တက်ရောက်ခဲ့ကြပါသည်။အဆိုပါအခမ်းအနားတွင် ပဲခူးတိုင်းဒေသကြီးအစိုးရအဖွဲ့၊ တိုင်းရင်းသားရေးရာဝန်ကြီး၊ ဦးစောလင်းအောင်က အဖွင့်အမှာစကားပြောကြားခဲ့ပြီး မွန်စာပေနှင့်ယဉ်ကျေးမှုကော်မတီမှ မွန်အမျိုးသားနေ့ ဖြစ်ပေါ်လာပုံသမိုင်းအကျဉ်းအား ရှင်းလင်းပြောကြားခဲ့ပါသည်။ ဆက်လက်၍ (၇၇) ကြိမ်မြောက် မွန်အမျိုးသားနေ့ အထိမ်းအမှတ်အနေအဖြင့် ကျင်းပသော မွန်စာပေနှင့် အားကစား ပြိုင်ပွဲများတွင် ဆုရရှိခဲ့ကြသည့် မွန်တိုင်းရင်းသားကျောင်းသား၊ ကျောင်းသူလေးများအား တိုင်းရင်သားစာပေနှင့်ယဉ်ကျေးမှုဦးစီးဌာနမှ ညွှန်ကြားရေးမှူးနှင့် မွန်စာပေနှင့်ယဉ်ကျေးမှု ကော်မတီများမှ ဆုတံဆိပ်များ ပေးအပ်ချီးမြှင့်ခဲ့ပါသည်။ ထို့နောက် မွန်တိုင်းရင်းသူများမှ မွန်ရိုးရာ ယဉ်ကျေးမှုအကများဖြင့် ဖျော်ဖြေခဲ့ရာ ပဲခူးတိုင်းဒေသကြီးအစိုးရအဖွဲ့၊ တိုင်းရင်းသားရေးရာဝန်ကြီး ဦးစောလင်းအောင်က မွန်ရိုးရာယဉ်ကျေးမှုအကအဖွဲ့များအား ဂုဏ်ပြုဆုငွေချီးမြှင့်ပေးခဲ့ပြီး စုပေါင်း မှတ်တမ်းဓာတ်ပုံများ ရိုက်ကူးခဲ့ကြောင်း သတင်းရရှိပါသည်။
ဆက်လက်ဖတ်ရှုပါရန်.JPG)
တိုင်းရင်းသားလူမျိုးများရေးရာဝန်ကြီးဌာန၊ အမှုထမ်းများ ရုံးလုပ်ငန်းစွမ်းဆောင်ရည် မြှင့်တင်ရေးသင်တန်း အမှတ်စဉ် (၁/၂၀၂၄) ဖွင့်ပွဲအခမ်းအနားကို ယနေ့နံနက်ပိုင်းတွင် တိုင်းရင်းသားလူမျိုးများရေးရာဝန်ကြီးဌာန၊ အစည်းအဝေးခန်းမ၌ ကျင်းပပြုလုပ်ရာ ပြည်ထောင်စုဝန်ကြီး Jeng Phang နော်တောင်၊ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူးချုပ်များ၊ သင်တန်းသား၊ သင်တန်းသူများနှင့်အရာထမ်း၊ အမှုထမ်းများ တက်ရောက်ခဲ့ကြပြီး တိုင်းဒေသကြီး/ ပြည်နယ် ညွှန်ကြားရေးမှူးရုံးများနှင့် ပြည်ထောင်စုတိုင်းရင်းသားကျေးရွာ (ရန်ကုန်)မှ သင်တန်းသား၊ သင်တန်းသူများက Online စနစ်ဖြင့် တက်ရောက်ခဲ့ကြပါသည်။ ရှေးဦးစွာ ပြည်ထောင်စုဝန်ကြီးက အဖွင့်အမှာစကားပြောကြားရာတွင် တိုင်းရင်းသားလူမျိုးများရေးရာဝန်ကြီးဌာနတွင် တာဝန်ထမ်းဆောင်လျက်ရှိကြသည့် အမှုထမ်းများအနေဖြင့် နိုင်ငံတော်နှင့်ပြည်သူများ၏ အကျိုးစီးပွားအတွက် တာဝန်ထမ်းဆောင်ရာတွင် အရည်အသွေးနှင့်လုပ်ငန်းစွမ်းဆောင်ရည်မြင့်မားလာစေရန်နှင့် ကောင်းမွန်သော အုပ်ချုပ်မှုစနစ်ဖော် ဆောင်ရာတွင် အထောက်အကူပြုစေရန် ရည်ရွယ်ပါကြောင်း၊ မိမိတို့ဝန်ကြီးဌာနအနေဖြင့် ဝန်ထမ်းတစ်ဦးချင်းစီ၏ စွမ်းဆောင်ရည် မြင့်မားလာရေးကို ဦးတည်ဆောင်ရွက်လျက်ရှိရာ ဝန်ကြီးဌာနတွင်း သင်တန်းများဖွင့်လှစ်သင်ကြားပေးခြင်း၊ အခါအားလျော်စွာ ပြည်ထောင်စုရာထူးဝန်အဖွဲ့မှ ခေါ်ယူသည့် သင်တန်းများအား တက်ရောက်စေခြင်းဖြင့် ဝန်ထမ်းများ၏ စွမ်းဆောင်ရည်မြင့်မားလာစေရန် ဆောင်ရွက်ပေးလျက်ရှိပါကြောင်း၊ လူ့စွမ်းအားအရင်းအမြစ် ဖွံ့ဖြိုးတိုးတက်မှု၏ အခြေခံသည် ပညာရေးနှင့် ကျန်းမာရေးတို့ပင်ဖြစ်ပါကြောင်း၊ အသိပညာ ဗဟုသုတနှင့် ကျွမ်းကျင်ပိုင်နိုင်မှုတို့သည် ဆက်စပ်လျက်ရှိသည့်အတွက် အသိပညာဗဟု သုတကို စဉ်ဆက်မပြတ်ရှာဖွေပြီး အပတ်တကုတ်လေ့ကျင့်သွားမည်ဆိုပါက လူတစ်ဦးချင်းစီ၏ စွမ်းဆောင်ရည်များ မြင့်မားလာနိုင်မည်ဖြစ်ပြီး ရုံးဌာနအသီးသီးတို့၏ လုပ်ငန်းတာဝန်များကို အမှားအယွင်းနည်းစွာဖြင့် ဆောင်ရွက်နိုင်မည်ဖြစ်ပါကြောင်း၊ ဝန်ထမ်းများအနေဖြင့် မိမိတို့ ဝန်ကြီးဌာန၏ ဥပဒေ၊ နည်းဥပဒေများ၊ စည်းမျဉ်းစည်းကမ်း၊ စံပြုလုပ်ထုံးလုပ်နည်းများကို ကျွမ်းကျင်နှံ့စပ်စွာ သိရှိထားခြင်းအားဖြင့် လုပ်ငန်းဆောင်ရွက်ရာတွင် အမှားအမှန်ကို ဝေဖန်ပိုင်းခြားနိုင်ပြီး ပြည်သူကို ဝန်ဆောင်မှုပေးရာတွင်ဖြစ်စေ၊ ပြည်သူတို့၏ ရပိုင်ခွင့် အခွင့်အလမ်းများကို အထောက်အကူပြုပေးရာတွင်ဖြစ်စေ ထိရောက်မှန်ကန်လာမည်ဖြစ်ပါကြောင်း၊ ဝန်ထမ်းတိုင်း ကျရာနေရာကဏ္ဍမှ ပေးအပ်သောတာဝန်များကို ကျေပွန်စွာ ထမ်းဆောင်နိုင်ရန် စီမံချက်များရေးဆွဲပြီး စဉ်ဆက်မပြတ် သင်တန်းများဖွင့်လှစ်ဆောင်ရွက်နေရခြင်းဖြစ်ပါကြောင်း၊ အမှုထမ်းများအနေဖြင့် ပို့ချမည့် ဘာသာရပ်များအား ကောင်းမွန်စွာလေ့လာမှတ်သားပြီး လုပ်ငန်းခွင်တွင် ထိထိရောက်ရောက် မှန်ကန်စွာ လက်တွေ့ကျကျ အသုံးချ ဆောင်ရွက်နိုင်ရန် အထူးလိုအပ်ပါကြောင်း၊ နိုင်ငံ့ဝန်ထမ်းများ၊ ဌာနဆိုင်ရာ တာဝန်ရှိသူများသည် နိုင်ငံတော်အစိုးရ ကိုယ်စား တာဝန်ထမ်းဆောင်နေကြသူများဖြစ်ပါကြောင်း၊ အစိုးရနှင့်ပြည်သူများအကြား ပေါင်းကူးဆက်စပ်ပေးသည့် လူပုဂ္ဂိုလ်များ၊ ဌာနများဖြစ်ပါကြောင်း၊ တစ်နည်းအားဖြင့် နိုင်ငံသူ၊ နိုင်ငံသားများ၏ အကျိုးစီးပွားကို မှန်ကန်သစ္စာရှိစွာ ဖော်ဆောင်ပေးနိုင်သူများဖြစ်ရန် လိုအပ်ပါကြောင်း၊ ဝန်ထမ်းများအနေဖြင့် နိုင်ငံ့ဝန်ထမ်းသစ္စာအဓိဋ္ဌာန် (၆) ချက်ကို ကောင်းစွာသိရှိနားလည်ပြီး ဝီရိယ၊ သစ္စာ၊ ဉာဏ၊ သမ္မာဓိရှိရှိဖြင့် နိုင်ငံ့ဝန်ထမ်းများအတွက် ပြဋ္ဌာန်းထားရှိသော စည်းမျဉ်းစည်းကမ်းများနှင့်အညီ ထမ်းဆောင်တတ်သည့် ဝန်ထမ်းကောင်းများဖြစ်စေရန်နှင့် မိမိနိုင်ငံနှင့် ဝန်ကြီးဌာနအပေါ် သစ္စာရှိစွာဖြင့် စွမ်းဆောင်ရည်မြင့်မားမှုကို ပေါင်းစပ်ပြီး တက်တက်ကြွကြွ ကြိုးစားဆောင်ရွက်ကြရန် အထူးတိုက်တွန်း ပြောကြားလိုပါကြောင်း၊ ယခုသင်တန်းမှ လေ့ကျင့်သင်ကြားပေးမှုများကို လက်တွေ့နယ်ပယ်တွင် စဉ်ဆက်မပြတ် ကြိုးစားအားထုတ်သွားမှသာ အောင်မြင်မှုရရှိမည်ဖြစ်ပါကြောင်း၊ မိမိတို့ဝန်ကြီးဌာန၏ အောင်မြင်ခြင်းသည် တိုင်းရင်းသားများနှင့် နိုင်ငံတော်အတွက် တစ်ထောင့်တစ်နေရာမှ အထောက်အပံ့ဖြစ်စေမည်ဖြစ်ပါကြောင်း၊ သင်တန်းသားများအနေဖြင့် သင်တန်းမှပို့ချပေးလိုက်သည့် သင်ခန်းစာများ၊ ဘာသာရပ်များကို အခြေခံပြီး တစ်ဦးချင်းစီက ကိုယ်ပိုင်အရည်အချင်းများဖြင့် ကျရာနေရာ၊ ကျရာအခန်းကဏ္ဍမှ နိုင်ငံတော် ဖွံ့ဖြိုး တိုးတက်ရေးတည်ဆောက်ရာတွင် အုတ်တစ်ချပ်၊ သဲတစ်ပွင့်အဖြစ်ပါဝင် ဆောင်ရွက်ကြရန် မှာကြားလိုပါကြောင်း ပြောကြားပါသည်။ ယနေ့ဖွင့်လှစ်သည့်သင်တန်းသို့ သင်တန်းသား သင်တန်းသူ (၅၈) ဦး တက်ရောက်ကြပြီး သင်တန်းကာလကို ရက်သတ္တ(၂)ပတ်ကြာ သင်ကြားပို့ချသွားမည်ဖြစ်ကြောင်း သတင်းရရှိပါသည်။
ဆက်လက်ဖတ်ရှုပါရန်
မွန်စာပေနှင့်ယဉ်ကျေးမှုကော်မတီ(ရန်ကုန်)က ကြီးမှူး၍ (၇၇)ကြိမ်မြောက်မွန်အမျိုးသားနေ့အထိမ်းအမှတ် သုတေသနစာတမ်းဖတ်ပွဲကို ဖေဖော်ဝါရီလ (၂၄)ရက်နေ့က ကမာရွတ်မြို့နယ်၊ တိုင်းရင်းသားလူမျိုးများရေးရာဝန်ကြီးဌာန၊ ရန်ကုန်တိုင်းဒေသကြီး ၊ ညွှန်ကြားရေးမှူးရုံး၊ အစည်းအဝေးခန်းမ၌ ကျင်းပရာ ရန်ကုန်တိုင်းဒေသကြီးအစိုးရအဖွဲ့ တိုင်းရင်းသားရေးရာဝန်ကြီး၊ တိုင်းရင်းသားစာပေနှင့်ယဉ်ကျေးမှုဦးစီးဌာန၊ ညွှန်ကြားရေးမှူး၊ တိုင်းရင်းသားအခွင့်အရေးများ ကာကွယ်စောင့်ရှောက်ရေးဦးစီးဌာန ဒုတိယညွှန်ကြားရေးမှူး၊ ရန်ကုန်တိုင်းဒေသကြီးအတွင်းရှိ တိုင်းရင်းသားစာပေနှင့်ယဉ်ကျေးမှုအသင်းအဖွဲ့များ၊ မွန်စာပေနှင့်ယဉ်ကျေးမှုအသင်းမှ ဧည့်သည် တော်များ တက်ရောက်ခဲ့ကြပါသည်။ အခမ်းအနားတွင် ရန်ကုန်တိုင်းဒေသကြီးအစိုးရအဖွဲ့ တိုင်းရင်းသားရေးရာဝန်ကြီး ဦးစောဂျက်ကော့ထူးက အဖွင့်အမှာစကားပြောကြားခဲ့ပါသည်။ ထို့နောက် မွန်စာပေနှင့်ယဉ်ကျေးမှု ကော်မတီ(ရန်ကုန်) ဉက္ကဌ ဒေါက်တာမင်းခင်စိန်က သုတေသနစာတမ်းဖတ်ပွဲကျင်းပရခြင်း၏ ရည်ရွယ်ချက်နှင့် အကျိုးကျေးဇူးများအား ရှင်းလင်းပြောကြားခဲ့ပြီး စာတမ်းများနှင့် စပ်လျဉ်း၍ မြန်မာနိုင်ငံသမိုင်းကော်မရှင် ဒု-ဥက္ကဌ ဦးတိုးလှက ဆွေးနွေးသုံးသပ်ခဲ့ပါသည်။ ထို့နောက် သုတေသနစာတမ်းရှင် ဒေါက်တာလဲ့လဲ့ဝင်း ၊ နန်းကြည်ကြည်ခိုင်နှင့် နိုင်ဝင်းဗိုလ် တို့က စာတမ်းများ ဖတ်ကြားခဲ့ရာ တက်ရောက်လာသည့် ဧည့်သည်တော်များမှ မေးခွန်းများ အပြန်အလှန်မေးမြန်းဆွေးနွေးခဲ့ကြကြောင်း သတင်းရရှိပါသည်။
ဆက်လက်ဖတ်ရှုပါရန်
(၇၇)ကြိမ်မြောက် မွန်အမျိုးသားနေ့ အခမ်းအနားကို ဖေဖော်ဝါရီလ (၂၅)ရက်နေ့က ကရင်ပြည်နယ်၊ ဘားအံမြို့နယ်၊ ခရားအတွင်းကျေးရွာ၊ ရာမညကွင်း၌ ကျင်းပပြုလုပ်ခဲ့ရာ အိန္ဒုမွန်ကျောင်းဆရာတော်နှင့် သံဃာတော်များ၊ ကရင်ပြည်နယ်အစိုးရအဖွဲ့ဝင်၊ တိုင်းရင်းသားရေးရာဝန်ကြီး၊ တိုင်းရင်းသားစာပေနှင့် ယဉ်ကျေးမှုဦးစီးဌာန၊ ညွှန်ကြားရေးမှူးရုံး(ကရင်ပြည်နယ်)မှ တာဝန်ခံအရာရှိနှင့် အရာထမ်းများ၊ မွန်စာပေနှင့်ယဉ်ကျေးမှုအသင်း(ကရင်ပြည်နယ်)မှ တာဝန်ရှိသူများ၊ ကရင်ပြည်နယ် ပအိုဝ်းစာပေနှင့်ယဉ်ကျေးမှုအသင်းမှ ဥက္ကဌနှင့်အဖွဲ့ဝင်များ၊ ကရင်ပြည်နယ်ရှမ်းစာပေနှင့် ယဉ်ကျေးမှုအသင်းမှ အဖွဲ့ဝင်များ၊ ဌာနဆိုင်ရာများမှ တာဝန်ရှိပုဂ္ဂိုလ်များ၊ ဖိတ်ကြားထားသော ဧည့်သည်တော်များနှင့် ကရင်ပြည်နယ်အတွင်းရှိ မွန်တိုင်းရင်းသားများ တက်ရောက်ခဲ့ပါသည်။ အခမ်းအနားတွင် တိုင်းရင်းသားလူမျိုးများရေးရာဝန်ကြီးဌာန၊ ပြည်ထောင်စုဝန်ကြီး Jeng Phang နော်တောင်၏ ၂၀၂၄ခုနှစ်တွင် ကျရောက်သည့် (၇၇)ကြိမ်မြောက် မွန်အမျိုးသားနေ့အတွက် ပေးပို့လာသော သဝဏ်လွှာကို ကရင်ပြည်နယ်အစိုးရအဖွဲ့ဝင်၊ တိုင်းရင်းသားရေးရာဝန်ကြီး ဦးစန်းကိုက ဖတ်ကြားခဲ့ပြီး (၇၇) ကြိမ်မြောက် မွန် အမျိုးသားနေ့ အခမ်းအနားအတွက် ကရင်ပြည်နယ်အစိုးရအဖွဲ့မှ ထောက်ပံ့ချီးမြှင့်ငွေ ကျပ်သိန်း(၁၅၀)တိတိအား အိန္ဒုမွန်ကျောင်းဆရာတော်ထံသို့ ဆက်ကပ်ခဲ့ပါသည်။ ထို့နောက် မွန်တိုင်းရင်းသူလေးများမှ မွန်ရိုးရာဟင်္သာယိမ်း အကဖြင့် ကပြဖျော်ဖြေခဲ့ကြောင်း သတင်းရရှိခဲ့ပါသည်။
ဆက်လက်ဖတ်ရှုပါရန်
မွန်စာပေနှင့်ယဉ်ကျေးမှုကော်မတီ(ရန်ကုန်)ကကြီးမှူး၍ (၇၇)ကြိမ်မြောက်မွန်အမျိုးသားနေ့ အခမ်းအနား ကို ဖေဖော်ဝါရီလ (၂၅)ရက်နေ့က ဒဂုံမြို့နယ် ရွှေတိဂုံဘုရားလမ်းရှိ မွန်ပိဋကတ်တိုက်၌ ကျင်းပရာ ရန်ကုန်တိုင်းဒေသကြီးအစိုးရအဖွဲ့ တိုင်းရင်းသားရေးရာဝန်ကြီး၊ တိုင်းရင်းသားစာပေနှင့်ယဉ်ကျေးမှုဦးစီးဌာန၊ ညွှန်ကြားရေးမှူး၊ တိုင်းရင်းသားအခွင့်အရေးများကာကွယ် စောင့်ရှောက်ရေးဦးစီးဌာန ဒုတိယညွှန်ကြားရေးမှူး၊ ရန်ကုန်တိုင်းဒေသကြီးအတွင်းရှိ တိုင်းရင်းသားစာပေနှင့်ယဉ်ကျေးမှုအသင်းအဖွဲ့များ၊ မွန်စာပေနှင့်ယဉ်ကျေးမှု အသင်းမှ ဧည့်သည်တော်များ တက်ရောက်ခဲ့ကြပါသည်။ အခမ်းအနားတွင် ရန်ကုန်တိုင်းဒေသကြီး တိုင်းရင်းသားရေးရာဝန်ကြီး ဦးစောဂျက်ကော့ထူး တက်ရောက်၍ အဖွင့်အမှာစကားပြောကြားခဲ့ပါသည်။ (၇၇)ကြိမ်မြောက် မွန်အမျိုးသားနေ့ အခမ်းအနားကျင်းပ ရေးကော်မတီ(ရန်ကုန်) ဥက္ကဋ္ဌ နိုင်ခင်လတ်က အမှာစကားပြောကြားခဲ့ပြီး (၇၇) ကြိမ်မြောက် မွန်အမျိုးသားနေ့ (ဗဟို)မှ ပေးပို့သည့် သဝဏ်လွှာကို ဖတ်ကြားခဲ့ပါသည်။ ဆက်လက်၍ မွန်စာပေနှင့်ယဉ်ကျေးမှုကော်မတီ (ရန်ကုန်) ဥက္ကဋ္ဌ ဒေါက်တာမင်းခင်စိန်က နွေရာသီကာလအတွင်း မွန်စာပေနှင့်ယဉ်ကျေးမှုသင်တန်းများ ဖွင့်လှစ်နိုင်ရေးနှင့် အသက်(၇၅)နှစ်နှင့်အထက် မွန်သက်ကြီးပူဇော်ပွဲကျင်းပနိုင်ရေးတို့ကို ရှင်းလင်းပြောကြားခဲ့ပါသည်။
ဆက်လက်ဖတ်ရှုပါရန်.jpg)
ဧရာဝတီတိုင်းဒေသကြီး တိုင်းရင်းသားစာပေနှင့်ယဉ်ကျေးမှုဦးစီးဌာန၊ ညွှန်ကြားရေးမှူးရုံး အနေဖြင့် ချင်းအမျိုးသားစာပေနှင့်ယဉ်ကျေးမှုအသင်းနှင့်ပူးပေါင်း၍ တိုင်းဒေသကြီးအစိုးရအဖွဲ့၏ ခွင့်ပြုရန်ပုံငွေဖြင့် ၂၀၂၃-၂၀၂၄ ပညာသင်နှစ်အတွက် အရှိုချင်းတိုင်းရင်းသားဘာသာစာပေကျောင်းသုံး ပုံနှိပ်စာအုပ်များ အခမဲ့ဖြန့်ဝေပေးအပ်ခြင်းအခမ်းအနားကို ၂၀၂၄ ခုနှစ်၊ ဖေဖော်ဝါရီလ (၂၀) ရက်နေ့က ဧရာဝတီတိုင်းဒေသကြီး၊ တိုင်းရင်းသားလူမျိုးများရေးရာဝန်ကြီးဌာန၊ ညွှန်ကြားရေးမှူးရုံး အစည်း အဝေးခန်းမ၌ ကျင်းပပြုလုပ်ခဲ့ရာ အခမ်းအနားသို့ တိုင်းရင်းသားစာပေနှင့်ယဉ်ကျေးမှုဦးစီးဌာနမှ အရာထမ်း၊ အမှုထမ်းများ၊ ချင်းအမျိုးသားစာပေနှင့်ယဉ်ကျေးမှုအသင်းဝင်များ၊ အရှိုချင်း တိုင်းရင်းသားဘာသာစာပေသင် TA/LT ဆရာ၊ ဆရာမများ တက်ရောက်ခဲ့ကြပါသည်။အခမ်းအနားတွင် ဧရာဝတီတိုင်းဒေသကြီး၊ တိုင်းရင်းသားစာပေနှင့်ယဉ်ကျေးမှုဦးစီးဌာန၊ ညွှန်ကြားရေးမှူးရုံးမှ တာဝန်ခံအရာရှိ လက်ထောက်ညွှန်ကြားရေးမှူး ဒေါ်အေးကျော့ရီက အဖွင့် အမှာစကားပြောကြားခဲ့ပြီး ချင်းအမျိုးသားစာပေနှင့်ယဉ်ကျေးမှုအသင်း ဥက္ကဋ္ဌ ဆလိုင်းလှမြင့်က အရှိုချင်းတိုင်းရင်းသားဘာသာစာပေကျောင်းသုံးပုံနှိပ်စာအုပ် အခမဲ့ဖြန့်ဝေပေးအပ်ရခြင်းနှင့်စပ်လျဉ်း၍ ရှင်းလင်းပြောကြားခဲ့ပါသည်။ထို့နောက် အရှိုချင်းတိုင်းရင်းသားဘာသာစာပေကျောင်းသုံးပုံနှိပ်စာအုပ်များအား ပေးအပ်ရာ သက်ဆိုင်ရာမြို့နယ် ချင်းအမျိုးသားစာပေနှင့်ယဉ်ကျေးမှုအသင်းများက လက်ခံရယူခဲ့ကြပြီး စုပေါင်း မှတ်တမ်းဓါတ်ပုံများ ရိုက်ကူးခဲ့ကြကြောင်း သတင်းရရှိပါသည်။
ဆက်လက်ဖတ်ရှုပါရန်
တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာန၊ရန်ကုန်တိုင်းဒေသကြီး၊ညွှန်ကြားရေးမှူးရုံးမှဦးစီး၍“တိုင်းရင်းသားအခွင့်အရေးဆိုင်ရာအသိပညာ ပေးဟောပြောခြင်း နှင့် ရပ်ရွာအခြေပြု အသက်မွေးဝမ်းကျောင်းပညာလိုအပ်ချက်တို့ကို ဆန်းစစ်စီမံခြင်းအစီအစဉ်” နှင့် “ဆပ်ပြာရည်၊ ခေါင်းလျှော်ရည်၊ ဆပ်ပြာခဲ၊ လက်သန့်ဆေးရည် လူသုံးကုန်ထုတ်လုပ်မှု နည်းပညာသင်တန်း' အခမ်းအနားကို (၁၃-၂-၂၀၂၄) ရက်နေ့တွင် လှည်းကူးမြို့နယ်၊ စာဘူးတောင်း ကျေးရွာခန်းမ၌ ကျင်းပပြုလုပ်ခဲ့ပါသည်။ အခမ်းအနားတွင် တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာနမှ ဒုတိယညွှန်ကြားရေးမှူး၊ ဒေါ်ဖြူဖြူဝင်းက တိုင်းရင်းသားလူမျိုးများရေးရာဝန်ကြီးဌာနအကြောင်း၊ တိုင်းရင်းသားလူမျိုးများ၏ အခွင့်အရေးကာကွယ်စောင့်ရှောက်သည့် ဥပဒေ၊နည်းဥပဒေများအားသိရှိနိုင်ရန်နှင့် ရပ်ရွာအခြေပြုအသက်မွေး ဝမ်းကျောင်း ပညာ လိုအပ်ချက်စစ်တမ်းကောက်ယူရ ခြင်းအကြောင်း တို့ကိုပြောကြားခဲ့ပါသည်။ ထို့နောက် လူဝင်မှုကြီးကြပ်ရေးနှင့်ပြည်သူ့အင်အားဦးစီးဌာန၊ ခရိုင်ဦးစီးမှူး ဒေါ်နွယ်နီခင်က လူဝင်မှုကြီးကြပ်ရေးဦးစီးဌာန၏ လုပ်ငန်းဆောင်ရွက်နေမှုအခြေအနေ၊ နိုင်ငံသားစိစစ်ရေးကတ်ပြား နှင့်အိမ်ထောင်စုဇယားဆောင်ရွက်ရန် လိုအပ်မှုအခြေအနေ၊ ပန်းခင်းစီမံချက် ဆောင်ရွက်မှုအခြေ အနေ၊ တိုင်းရင်းသားလူငယ်များ ကျောင်းစတင်အပ်နှံချိန်မှစ၍ မိမိတို့လူမျိုးများ၏ ဝိသေသအရှေ့ဆောင်စကားလုံးများ ပါဝင်ထည့်သွင်း၍ ကျောင်းအမည်စာရင်းသွင်းရန် အကြောင်းတို့ကို လည်းကောင်း၊ မြို့နယ်အုပ်ချုပ်ရေးအဖွဲ့ အဖွဲ့ဝင်(၂) ဦးခင်ဇော်က လူငယ်နှင့် အလုပ်အကိုင် အခွင့်အလမ်းများ အကြောင်းကိုလည်းကောင်း၊ လူမှုဝန်ထမ်းဦးစီးဌာန၊ လက်ထောက်ညွှန်ကြားရေးမှူး၊ ဒေါ်ခင်စန်းမြင့်က လူငယ်ရေးရာမူဝါဒများ၊ လူမှုရေးပင်စင်အကြောင်းတို့ကိုလည်းကောင်း၊ သမဝါယမဦးစီးဌာန၊ မြို့နယ်ဦးစီးမှူး ဒေါ်မြင့်မြင့်ဆွေက သမဝါယမဦးစီးဌာန၏ သမဝါယမ အကြောင်းသိကောင်းစရာများကို လည်းကောင်း၊ အသေးစားစက်မှုလက်မှုလုပ်ငန်းဦးစီးဌာနမှ လက်ထောက်ညွှန်ကြားရေးမှူး ဦးရဲဇော်ထွန်းက အသေးစားစက်မှုလက်မှုလုပ်ငန်းဦးစီးဌာန၏အကြောင်း၊ အသေးစားစက်မှုနှင့် အသေးစားလက်မှုလုပ်ငန်းအကြောင်း၊ သင်တန်းဖွင့်လှစ်ပေးမှု အခြေအနေနှင့် သင်တန်းဖွင့်လှစ်ရခြင်း၏ ရည်ရွယ်ချက်၊ သင်တန်းတွင် သင်ကြားပေးမည့် အကြောင်းအရာများနှင့် အမျိုးအစားတို့ကိုလည်းကောင်း၊ တိုင်းရင်းသားစာပေနှင့်ယဉ်ကျေးမှု ဦးစီးဌာန၊ ရန်ကုန်တိုင်းဒေသကြီး၊ ညွှန်ကြားရေးမှူးရုံးမှ ဦးစီးအရာရှိ ဦးငါးရယ်က ပုံပြပုံပြင်စာအုပ်ထုတ်ဝေပေးမှုနှင့် တိုင်းရင်းသားစာပေနှင့်ယဉ်ကျေးမှုအကြောင်း၊ တိုင်းရင်းသား ဘာသာသင် TA/LT ဆရာများ ခန့်ထားခြင်းဆိုင်ရာ အကြောင်းတို့ကို လည်းကောင်း ရှင်းလင်း ပြောကြားခဲ့ပါသည်။ ဆက်လက်၍ တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာနမှ ဝန်ထမ်းများက ရပ်ရွာအခြေပြု အသက်မွေးဝမ်းကျောင်းပညာ လိုအပ်ချက်တို့ကိုဆန်းစစ်ချက် စစ်တမ်းမေးခွန်းလွှာများအား ရှင်းလင်းခြင်းနှင့် စစ်တမ်းကောက်ယူခြင်းတို့ကို ဆောင်ရွက်ခဲ့ရာ တက်ရောက်လာကြသော ဒေသခံတိုင်းရင်းသား ( ၆၀ )ဦး ဖြေဆိုခဲ့ကြပါသည်။ အခမ်းအနားသို့ လှည်းကူးမြို့နယ်အုပ်ချုပ်ရေးမှူးနှင့် အဖွဲ့ဝင်များ၊ လှည်းကူးမြို့နယ်အတွင်းရှိ ဒေသခံတိုင်းရင်းသားများ၊ ဖိတ်ကြားထားသော ဧည့်သည်တော်များ တက်ရောက်ခဲ့ကြကြောင်းသိရှိရပါသည်။
ဆက်လက်ဖတ်ရှုပါရန်
တိုင်းရင်းသားလူမျိုးများရေးရာဝန်ကြီးဌာန စတုတ္ထအကြိမ်မြောက် မြန်မာ့ရိုးရာထမနဲထိုး ပြိုင်ပွဲကို ယနေ့ နံနက်ပိုင်းတွင် နေပြည်တော်ရှိ တိုင်းရင်းသားလူမျိုးများရေးရာဝန်ကြီးဌာန၊ ရုံးအမှတ်(၁၄)၌ ကျင်းပရာ တိုင်းရင်းသားလူမျိုးများရေးရာဝန်ကြီးဌာန ပြည်ထောင်စုဝန်ကြီး Jeng Phang နော်တောင်၊ ဒုတိယဝန်ကြီး ဦးဇော်အေးမောင်၊ အမြဲတမ်းအတွင်းဝန်၊ ညွှန်ကြား ရေးမှူးချုပ်များ၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူးချုပ်များ၊ ဌာနဆိုင်ရာ အကြီးအကဲများနှင့် အရာထမ်း၊ အမှုထမ်းများ စုံညီစွာတက်ရောက်ကြပြီး ပျော်ရွှင်စွာ ပါဝင် ဆင်နွှဲ ကြပါသည်။ဦးစွာ ပြည်ထောင်စုဝန်ကြီးက အဖွင့်အမှာစကားပြောကြားရာတွင် ပြည်ထောင်စုသမ္မတ မြန်မာနိုင်ငံတော်သည် လူမျိုးပေါင်းစုံ၊ ဘာသာပေါင်းစုံ၊ ယဉ်ကျေးမှု ဓလေ့ပေါင်းစုံနှင့် ပြည့်နှက် နေသည့် နိုင်ငံတစ်ခုဖြစ်ပါကြောင်း၊ (၁၂) လရာသီပွဲတော်များကို ရာသီအလိုက်၊ လ အလိုက် ဆင်ယင်ကျင်းပ နေသည်ကို ယနေ့ထက်တိုင် စဉ်ဆက်မပြတ် မြင်တွေ့နေရမည် ဖြစ်ပါကြောင်း၊ မြန်မာနိုင်ငံသည် ဗုဒ္ဓဘာသာဝင် အများစုနေထိုင်ကြသည့် တိုင်းပြည်ဖြစ်သဖြင့် ကျင်းပ ပြုလုပ်သည့် ပွဲတော်များသည်လည်း အများအားဖြင့် ဗုဒ္ဓဘာသာ ယဉ်ကျေးမှုက တစ်ဆင့် မြစ်ဖျား ခံပြီး ဖြစ်ပေါ်လာသည်ကို အားလုံးအသိပင်ဖြစ်ပါကြောင်း၊ နှင်းရည်စိုရွှဲ တပို့တွဲလသည် မြန်မာလ တစ်ဆယ့်နှစ်လတွင် တစ်ဆယ့်တစ်လမြောက်ဖြစ်သော ကုံရာသီကာလဖြစ်ပါကြောင်း၊ ထန်းပင်မှ ထန်းပို့များ တွဲကျနေသောလဖြစ်၍ “ထန်းပို့တွဲ” မှ “တပို့တွဲ” ဟု ရွေ့လျားလာခြင်းဖြစ်ပါကြောင်း၊ တပို့တွဲလနှင့်အတူ ယှဉ်တွဲကျင်းပသည့်ပွဲတော်သည် ထမနဲထိုးပွဲဖြစ်ပါကြောင်း၊ ထမနဲသည် ကောက်ညှင်း၊ အုန်းသီး၊ နှမ်းဆီ၊ နှမ်း၊ မြေပဲ၊ ချင်း(ဂျင်း)တို့ကို စီမံပြုလုပ်ရပြီး စုပေါင်း၍ ပူးပေါင်းဆောင်ရွက်မှုကြောင့်ရရှိလာသော မြန်မာ့ရိုးရာအစားအစာတစ်မျိုး ဖြစ်ပါကြောင်း၊ ထို့ကြောင့် မိမိတို့ဝန်ကြီးဌာနအနေဖြင့် ဦးစီးဌာနအလိုက် ပြိုင်ပွဲဝင်ကြမည့်သူများ အနေဖြင့် ထမနဲတွင် ပါဝင်မည့်ပစ္စည်းများ၏ အချိုးအစားကိုက်ညီမှု၊ ချိန်သားကိုက် လှုပ်ရှား ဆောင်ရွက် တတ်မှု၊ စည်းစည်းလုံးလုံးဆောင်ရွက်တတ်မှု၊ အဖွဲ့အစည်းစိတ်ဓာတ်ရှိမှု၊ စည်းကမ်း တကျရှိမှု၊ ရိုးရှင်းစွာယှဉ်ပြိုင်မှုတို့ကို ပြသသွားကြရန် အထူးတိုက်တွန်း ပြောကြားလိုပါကြောင်း၊ ထမနဲထိုး ပြိုင်ပွဲမှတဆင့် မိမိတို့၏ ဦးစီးဌာနကို ချစ်မြတ်နိုးသည့်စိတ်ဓာတ်၊ မိမိတို့၏ ဝန်ကြီး ဌာနကို ချစ်မြတ်နိုးဂုဏ်ယူသည့် စိတ်ဓာတ်၊ မိမိလူမျိုး၊ မိမိတိုင်းပြည်ကို ချစ်မြတ်နိုးသည့် စိတ်ဓာတ်များ တိုးတက်ဖြစ်ပေါ်လာအောင် မွေးမြူကြရန် တိုက်တွန်းလိုပါကြောင်း၊ ယဉ်ကျေးမှု ဆိုသည်မှာ အတိတ်မှ အမွေအနှစ်၊ ပစ္စုပ္ပန်တွင် အထိန်းအကွပ်၊ အနာဂတ်အတွက်အင်အားဟူ၍ ဆိုရိုးစကား ရှိပြီး ယဉ်ကျေးမှုကိစ္စအဝဝကို ထူထောင်နိုင်ရန်အတွက် မြန်မာ့ရိုးရာပွဲတော်များနှင့် ဓလေ့ ထုံးတမ်း များသည်လည်း တစ်ခန်းတစ်ကဏ္ဍမှ ပါဝင်လျက်ရှိပါကြောင်း၊ ရှေးမြန်မာမင်းများ လက် ထက်က ကိုယ့်ထီးကိုယ့်နန်း၊ ကိုယ့်ကြငှန်းနှင့် တင့်တယ်ဝင့်ကြွားစွာ နေထိုင်ခဲ့ကြ သည်နှင့် အညီ မြန်မာ့ရိုးရာပွဲတော်များနှင့် ဓလေ့ထုံးတမ်းများကိုလည်း စဉ်ဆက်မပြတ် သတိပြုပြီး ဆက်လက် ထိန်းသိမ်းရမည်ဖြစ်ပါကြောင်း၊ ယဉ်ကျေးမှုဆိုသည်မှာလည်း လက်ခံ လိုက်နာ ကျင့်သုံး တဲ့သူတွေ မရှိတော့လျှင်၊ ရေများ မြင့်ရာမှ နိမ့်ရာသို့ စီးဆင်းသကဲ့သို့ မိမိ ယဉ်ကျေးမှု အမွေအနှစ်များကို ထိန်းသိမ်းစောင့်ရှောက်မည့်သူမရှိခဲ့လျှင် ထိန်းသိမ်းစောင့် ရှောက်မည့်နိုင်ငံ၊ တိုင်းပြည်များသို့ ကူးပြောင်း စီးဆင်းသွားမည်ဖြစ်ပါကြောင်း၊ ယနေ့ကမ္ဘာ ပေါ်တွင် ကမ္ဘာလုံး ဆိုင်ရာ ကူးလူးဆက်နွယ်မှုအရ ယဉ်ကျေးမှုများ ရောယှက်လာသည်ကို မီဒီယာများတွင် တွေ့ရှိ လေ့လာနိုင်မည်ဖြစ်သည့်အပြင် မြန်မာတို့၏ ရိုးရာယဉ်ကျေးမှုူ ပွဲတော်များ၊ မြန်မာမှု၊ မြန်မာ့ ဟန်များ မပျောက်ပျက်အောင် မျိုးဆက်သစ်လူငယ်များအနေဖြင့် ဆက်လက်ထိန်းသိမ်းသွားရန် အထူးလိုအပ်မည်ဖြစ်ပါကြောင်း၊ ဝန်ကြီးဌာနအနေဖြင့် တိုင်းရင်းသားလူမျိုးအပေါင်းတို့၏ ဓလေ့ ထုံးတမ်း၊ အစဉ်အလာများကို လေးစားလိုက်နာပြီး၊ အမျိုးသားရေးစိတ်ဓာတ်ကို အခြေခံသည့် ကိုးကွယ်ယုံကြည်မှု၊ ယဉ်ကျေးမှု၊ အမျိုးသားရေး စရိုက်လက္ခဏာများ မပျောက်ပျက်အောင် ထိန်းသိမ်းစောင့်ရှောက်ရမည် ဖြစ်ပါကြောင်း၊ သို့မှသာ မြန်မာ့ဓလေ့ထုံးစံများ ပျောက်ပျက် မသွားစေဘဲ ရေရှည်တည်တံ့၍ နောင်လာနောက်သား များသည် ယဉ်ကျေးမှု အမွေအနှစ် ပစ္စည်းများနှင့် ဓလေ့ထုံးတမ်းများကို ချစ်မြတ်နိုး၍ အစဉ် တန်ဖိုးထား ထိန်းသိမ်းနိုင်မည် ဖြစ်ပါ ကြောင်း၊ ပြိုင်ပွဲဝင်အသင်းများကလည်း တရားသော ယှဉ်ပြိုင်ခြင်းဖြင့် ကြိုးကြိုးစားစား ယှဉ်ပြိုင်သွားကြရန် တိုက်တွန်းလိုပါကြောင်း ပြောကြားပါ သည်။ထို့နောက် ပြည်ထောင်စုဝန်ကြီးက မင်္ဂလာမောင်းတီးခတ်ပြီး ထမနဲထိုးပြိုင်ပွဲ စတင် ကြောင်း ကြေညာပါသည်။ဆက်လက်၍ ပြည်ထောင်စုဝန်ကြီး၊ ဒုတိယဝန်ကြီးနှင့် တာဝန်ရှိသူများသည် ထမနဲထိုး ယှဉ်ပြိုင်မည့်အဖွဲ့များအား ရင်းရင်းနှီးနှီးနှုတ်ဆက်ကာ ထမနဲထိုးယှဉ်ပြိုင်နေမှုများကို လိုက်လံ ကြည့်ရှုအားပေးပါသည်။ထမနဲထိုးပြိုင်ပွဲကို ပြည်ထောင်စုဝန်ကြီးရုံးနှင့် ဝန်ကြီးဌာနအောက်ရှိ ဦးစီးဌာနများမှ စုစုပေါင်း အသင်း(၃)သင်း ပါဝင်ယှဉ်ပြိုင်ကြရာ ပထမဆုရရှိသော ပြည်ထောင်စုဝန်ကြီးရုံး အသင်းအား ပြည်ထောင်စုဝန်ကြီး Jeng Phang နော်တောင်ကလည်းကောင်း၊ ဒုတိယဆု ရရှိသော တိုင်းရင်းသားစာပေနှင့် ယဉ်ကျေးမှုဦးစီးဌာနအသင်းအား ဒုတိယဝန်ကြီး ဦးဇော်အေးမောင်က လည်းကောင်း၊ တတိယဆုရရှိသော တိုင်းရင်းသားအခွင့်အရေးများ ကာကွယ် စောင့်ရှောက်ရေး ဦးစီးဌာနအသင်းအား အမြဲတမ်းအတွင်းဝန်ကလည်းကောင်း အသီးသီးဆုများ ပေးအပ်ချီးမြှင့် ကြပြီး အခမ်းအနားကို ရုပ်သိမ်းခဲ့ပါသည်။ထို့နောက် ပြိုင်ပွဲဝင်အသင်းများ၏ ဆုရရှိသော ထမနဲများဖြင့် တည်ခင်းဧည့်ခံခဲ့ပါသည်။ ပြိုင်ပွဲဝင်အဖွဲ့များသည် စည်းလုံးညီညွှတ်မှု အားကောင်းကောင်းဖြင့် တက်ကြွစွာပါဝင်ယှဉ်ပြိုင် ကြကာ ဝန်ထမ်းများကလည်း မြိုင်မြိုင်ဆိုင်ဆိုင် အားပေးခဲ့ကြကြောင်းသိရှိရသည်။
ဆက်လက်ဖတ်ရှုပါရန်
(၇၇)ကြိမ်မြောက် သျှမ်းအမျိုးသားနေ့အောင်ပွဲအခမ်းအနားကို ၇.၂.၂၀၂၄ ရက်နေ့က တောင်ငူမြို့၊ ဘိုးဘွားရိပ်သာခန်းမ၌ ကျင်းပပြုလုပ်ခဲ့ရာ ပဲခူးတိုင်းဒေသကြီးအစိုးရအဖွဲ့၊ တိုင်းရင်းသားရေးရာဝန်ကြီး၊ တိုင်းရင်းသားစာပေနှင့်ယဉ်ကျေးမှုဦးစီးဌာနမှ တာဝန်ခံရှိသူများ ရန်ကုန်တိုင်းဒေသကြီး ရှမ်းစာပေနှင့်ယဉ်ကျေးမှုကော်မတီ နာယက၊ ပဲခူးတိုင်းဒေသကြီး ရှမ်းစာပေနှင့်ယဉ်ကျေးမှု ကော်မတီအဖွဲ့ဝင်များ၊ တောင်ငူခရိုင် ရှမ်းစာပေနှင့်ယဉ်ကျေးမှု လူငယ်အသင်း ဥက္ကဋ္ဌနှင့်အဖွဲ့ဝင်များ၊ ဌာနဆိုင်ရာများမှ တာဝန်ရှိပုဂ္ဂိုလ်များ၊ ဖိတ်ကြားထားသော ဧည့်သည်တော်များနှင့် တိုင်းရင်းသား/တိုင်းရင်းသူများ တက်ရောက်ခဲ့ကြပါသည်။ အဆိုပါအခမ်းအနားတွင် ပဲခူးတိုင်းဒေသကြီးအစိုးရအဖွဲ့၊ တိုင်းရင်းသားရေးရာဝန်ကြီး၊ ဦးစောလင်းအောင်က အဖွင့်အမှာစကားပြောကြားခဲ့ပြီး ရန်ကုန်တိုင်းဒေသကြီး ရှမ်းစာပေနှင့် ယဉ်ကျေးမှုကော်မတီနာယက လုင်းစိုင်းမုင့်နှင့်တောင်ငူခရိုင် ရှမ်းစာပေနှင့် ယဉ်ကျေးမှုလူငယ် အသင်း ဥက္ကဋ္ဌ စိုင်းအောင်အောင်တို့က အမှာစကားများပြောကြားခဲ့ကာ ရှမ်းသမိုင်းပညာရှင် ဒေါက်တာ စိုင်းဆံအိုက်မှသျှမ်းအမျိုးသားနေ့ ဖြစ်ပေါ်လာပုံသမိုင်းအကြောင်းကို ဟောပြောခဲ့ပါသည်။ ဆက်လက်၍ (၇၇)ကြိမ်မြောက် သျှမ်းအမျိုးသားနေ့ စာစီစာကုံးနှင့် ပန်းချီပြိုင်ပွဲတွင် ဆုရရှိခဲ့ကြ သည့် တိုင်းရင်းသားကျောင်းသား/ကျောင်းသူလေးများအား တိုင်းရင်းသားရေးရာဝန်ကြီး၊ တိုင်းရင်းသား စာပေနှင့်ယဉ်ကျေးမှုဦးစီးဌာနမှ တာဝန်ခံညွှန်ကြားရေးမှူးနှင့် ရှမ်းစာပေနှင့် ယဉ်ကျေးမှု ကော်မတီများမှ ဆုတံဆိပ်များပေးအပ်ချီးမြှင့်ခဲ့ပါသည်။ ထို့နောက် ရှမ်းတိုင်းရင်းသူများမှ ရှမ်းရိုးရာ ယဉ်ကျေးမှုအကများဖြင့် ဖျော်ဖြေခဲ့ကြပြီး ပဲခူးတိုင်းဒေသကြီးအစိုးရအဖွဲ့၊ တိုင်းရင်းသားရေးရာဝန် ကြီး၊ ဦးစောလင်းအောင်မှ ရှမ်းရိုးရာယဉ်ကျေးမှုအကအဖွဲ့များအား ဂုဏ်ပြုဆုငွေ ချီးမြှင့်ပေးခဲ့ကြ ပြီး စုပေါင်းမှတ်တမ်းဓာတ်ပုံများ ရိုက်ကူးခဲ့ကြကြောင်း သတင်းရရှိပါသည်။
ဆက်လက်ဖတ်ရှုပါရန်
ကရင်ပြည်နယ် လူမှုဝန်ထမ်းဦးစီးဌာနမှ ကြီးမှူး၍ တိုင်းရင်းသားအမျိုးသမီးများအား "Gender (ကျား၊ မ)၊ CEDAW အမျိုးသမီးများအား နည်းမျိုးစုံဖြင့် ခွဲခြားမှုပပျောက်ရေး ကုလသမဂ္ဂ ကွန်ဗင်းရှင်း၊ NSPAW အမျိုးသမီးများဖွံ့ဖြိုးတိုးတက်ရေးဆိုင်ရာ အမျိုးသားအဆင့် မဟာဗျူဟာ စီမံကိန်း ဆိုင်ရာအသိပညာပေးသင်တန်း" ကို (၂၀-၂-၂၀၂၄) ရက်နေ့တွင် တိုင်းရင်းသားအခွင့် အရေးများကာကွယ်စောင့်ရှောက်ရေးဦးစီးဌာန၊ ကရင်ပြည်နယ်၊ ညွှန်ကြားရေးမှူးရုံး၌ ကျင်းပ ပြုလုပ်ခဲ့ပါသည်။ အခမ်းအနားတွင် ပြည်နယ်တိုင်းရင်းသားရေးရာဝန်ကြီး ဦးစန်းကိုက တိုင်းရင်းသား အမျိုး သမီးများ ဘဝဖွံ့ဖြိုးတိုးတက်စေဖို့အတွက် အမျိုးသမီးများ၏ အခွင့်အရေးများ၊ Gender (ကျား၊မ) ဆိုင်ရာကိစ္စရပ်များ၊ မူဝါဒများ၊ အမျိုးသမီးထုကြီး၏အင်အားနှင့် အကောင်အထည်ဖော်ဆောင် ရွက်နိုင်ရန်အတွက် အမျိုးသမီးများကဏ္ဍမြှင့်တင်ပေးမည့်မူဝါဒများ၊ လုပ်ငန်းစဉ်များအား သိရှိနိုင် ရန်နှင့် အမျိုးသမီးများဖွံ့ဖြိုးတိုးတက်ရေးဆိုင်ရာ အမျိုးသားအဆင့်မဟာဗျူဟာ စီမံကိန်း (၂၀၂၃-၂၀၃၂) ကိစ္စရပ်များအား တိုင်းရင်းသားအမျိုးသမီးများ သိရှိစေရန် ကျင်းပပြုလုပ်ခြင်း ဖြစ်ကြောင်း အဖွင့်အမှာစကားပြောကြားခဲ့ပါသည်။ ဆက်လက်၍ လူမှုဝန်ထမ်းဦးစီးဌာနမှ ဒုတိယညွှန်ကြားရေးမှူး ဒေါ်မူမူအေး က Gender ကျားမဆိုင်ရာကိစ္စရပ်များ၊ မူဝါဒများ၊ လိင်ခွဲခြားဆက်ဆံမှုများအကြောင်းကို လည်းကောင်း၊ လူမှုဝန်ထမ်းဦးစီးဌာန၊ ညွှန်ကြားရေးမှူး ဒေါ်ယဉ်ယဉ်ပြုံးက CEDAW အမျိုးသမီးများအား နည်းမျိုးစုံဖြင့် ခွဲခြားမှုပပျောက်ရေး ကုလသမဂ္ဂ ကွန်ဗင်းရှင်း၊ NSPAW အမျိုးသမီးများ ဖွံ့ဖြိုး တိုးတက်ရေးဆိုင်ရာ အမျိုးသားအဆင့် မဟာဗျူဟာစီမံကိန်း)ဆိုင်ရာကိစ္စရပ်များ၊ အမျိုးသမီး ကဏ္ဍမြှင့်တင်ပေးမည့်မူဝါဒများ၊ လုပ်ငန်းစဉ်များ၊ လုပ်ငန်းယန္တရားများကိုလည်းကောင်း ရှင်းလင်း ပြောကြားခဲ့ပါသည်။ အခမ်းအနားသို့ ပြည်နယ်တိုင်းရင်းသားရေးရာဝန်ကြီး ဦးစန်းကို၊ လူမှုဝန်ထမ်းဦးစီးဌာနမှ ညွှန်ကြားရေးမှူး ဒေါ်ယဉ်ယဉ်ပြုံး၊ တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီး ဌာန၊ ဒုတိယညွှန်ကြားရေးမှူး ဦးကျော်စိုး၊ လူမှုဝန်ထမ်းဦးစီးဌာနမှ ဒုတိယညွှန်ကြားရေးမှူး ဒေါ်မူမူအေး၊ ဌာနဆိုင်ရာတာဝန်ရှိသူများ၊ တိုင်းရင်းသားစာပေနှင့် ယဉ်ကျေးမှုအသင်းအဖွဲ့များမှ တိုင်းရင်းသားအမျိုးသမီးများ စုစုပေါင်း (၅၅) ဦး တက်ရောက်ခဲ့ကြကြောင်းသိရှိရပါသည်။
ဆက်လက်ဖတ်ရှုပါရန်
ဧရာဝတီတိုင်းဒေသကြီး၊ ချင်းအမျိုးသားစာပေနှင့်ယဉ်ကျေးမှုအသင်းက ကြီးမှူးကျင်းပပြုလုပ် သည့် တိုင်းဒေသကြီးအဆင့် (၇၆) နှစ်မြောက် ချင်းအမျိုးသားနေ့အခမ်းအနားကို ၂၀၂၄ ခုနှစ်၊ ဖေဖော်ဝါရီလ ၂၀ ရက်နေ့ နံနက်ပိုင်းတွင် ဧရာဝတီတိုင်းဒေသကြီး၊ ငပုတောမြို့၊ မြို့တော် အားကစားခန်းမ၌ ကျင်းပပြုလုပ်ခဲ့ရာ အခမ်းအနားသို့ ဧရာဝတီတိုင်းဒေသကြီးအစိုးရအဖွဲ့၊ ဝန်ကြီးချုပ်နှင့်ဇနီး၊ အနောက်တောင်တိုင်း စစ်ဌာနချုပ်တိုင်းမှူးနှင့် ဇနီး၊ ပုသိမ်လေတပ်စခန်းဌာန ချုပ်မှူးနှင့် ဇနီး၊ တိုင်းဒေသကြီးအစိုးရအဖွဲ့ဝင် ဝန်ကြီးများနှင့် ၎င်းတို့၏ဇနီးများ၊ တိုင်းရင်းသား စာပေနှင့်ယဉ်ကျေးမှုဦးစီးဌာနနှင့် တိုင်းရင်းသားအခွင့်အရေးများကာကွယ် စောင့်ရှောက်ရေး ဦးစီးဌာနမှ အရာထမ်း၊ အမှုထမ်းများ၊ တိုင်း/ခရိုင်/မြို့နယ်အဆင့် ဌာနဆိုင်ရာ အကြီးအကဲများ၊ ချင်းအမျိုးသား စာပေနှင့် ယဉ်ကျေးမှုအသင်းကိုယ်စားလှယ်များ၊ ကရင်/ရခိုင် တိုင်းရင်းသားစာပေနှင့် ယဉ်ကျေးမှုအသင်း ကိုယ်စားလှယ်များ နှင့် ချင်းတိုင်းရင်းသားညီအစ်ကို မောင်နှမများ တက်ရောက် အားပေး ချီးမြှင့်ခဲ့ကြပါသည်။ အခမ်းအနားကို သဘာပတိကြီးက မင်္ဂလာမောင်း (၃) ချက်တီး၍ ဖွင့်လှစ်ပြီး သဘာပတိ မိန့်ခွန်းပြောကြားခဲ့ပါသည်။ ဆက်လက်၍ ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ် နှင့် အနောက်တောင်တိုင်းစစ်ဌာနချုပ်တိုင်းမှူးတို့က နှုတ်ခွန်းဆက်အမှာစကားများ ပြောကြား ခဲ့ပြီး တိုင်းရင်းသားလူမျိုးများရေးရာဝန်ကြီးဌာန၊ ပြည်ထောင်စုဝန်ကြီး JengPhang နော်တောင်မှ ပေးပို့သော ချင်းအမျိုးသားနေ့သဝဏ်လွှာအား ဧရာဝတီတိုင်းဒေသကြီးအစိုးရအဖွဲ့၊ တိုင်းရင်းသား ရေးရာဝန်ကြီး စောလင်းခယ်က ဖတ်ကြားခဲ့ကာ တိုင်းဒေသကြီး ချင်းအမျိုးသားစာပေနှင့် ယဉ်ကျေးမှုအသင်းဥက္ကဋ္ဌက ချင်းအမျိုးသားနေ့ ကျင်းပရခြင်း၏ ရည်ရွယ်ချက်အား ရှင်းလင်း ပြောကြားခဲ့ပါသည်။ထို့နောက် ချင်းတိုင်းရင်းသူတစ်ဦးက ခင်းကျင်းပြသထားသော ချင်းတိုင်းရင်းသားအလံ အကြောင်းအား ရှင်းလင်းပြောကြားခြင်း၊ တိုင်းဒေသကြီး ချင်းအမျိုးသားစာပေနှင့်ယဉ်ကျေးမှုအသင်း အတွင်းရေးမှူး က ချင်းအမျိုးသားနေ့ကျင်းပရခြင်းနှင့်စပ်လျဉ်း၍ ကျေးဇူးတင်စကားပြောကြားခဲ့ပြီး ချင်းရိုးရာအကများဖြင့် ကပြဖျော်ဖြေ၍ အခမ်းအနားကို ရုပ်သိမ်းခဲ့ကြောင်း သတင်းရရှိပါသည်။
ဆက်လက်ဖတ်ရှုပါရန်
မဲခေါင်-လန်ချန်းပူးပေါင်းဆောင်ရွက်မှုအစီအစဉ်ဖြင့် “ရှမ်းပြည်နယ်တိုင်းရင်းသားရေးရာနှင့် သက်မွေးပညာသင်တန်းစင်တာ”ကို ရှမ်းပြည်နယ်၊ တောင်ကြီးမြို့နယ်၊ အေးသာယာမြို့၊ အမှတ်(၂) ရပ်ကွက်၊ အကွက်အမှတ်(၂၂)၊ ခပေါင်းရေကြည်ရပ်၌ ဖွင့်လှစ်လျက်ရှိပါသည်။ရှမ်းပြည်နယ်အစိုးရအဖွဲ့ဝင်၊ တိုင်းရင်းသားရေးရာဝန်ကြီး ဦးအောင်ကြည်ဝင်းသည် တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာန၊ ညွှန်ကြားရေးမှူးချုပ်နှင့် တိုင်းရင်းသားလူမျိုးများရေးရာဝန်ကြီးဌာန၊ ရှမ်းပြည်နယ်ညွှန်ကြားရေးမှူးရုံးမှ တာဝန်ရှိသူများ လိုက်ပါလျက် ဖေဖော်ဝါရီလ(၁၉)ရက်နေ့ နံနက်ပိုင်းတွင် ရှမ်းပြည်နယ်၊ တောင်ကြီးမြို့နယ်၊ အေးသာယာမြို့ရှိ တိုင်းရင်းသားလူမျိုးများရေးရာဝန်ကြီးဌာန၊ ရှမ်းပြည်နယ်တိုင်းရင်းသားရေးရာနှင့် သက်မွေးပညာသင်တန်းစင်တာ၌ ဖွင့်လှစ်ခဲ့သည့် အခြေခံကွန်ပျူတာသင်တန်းဖွင့်ပွဲအခမ်းအနားသို့ တက်ရောက်ခဲ့ပါသည်။ ပထမဦးစွာ ရှမ်းပြည်နယ်အစိုးရအဖွဲ့ဝင်၊ တိုင်းရင်းသားရေးရာဝန်ကြီး ဦးအောင်ကြည်ဝင်းက အဖွင့်အမှာစကားပြောကြားရာ အခြေခံကွန်ပျူတာသင်တန်းကို တက်ရောက်လာကြသည့် သင်တန်း သား/သူများအနေဖြင့် စည်းစည်းလုံးလုံးနေထိုင်ရမည်ဖြစ်ကြောင်း၊ ကျောင်းနေကျောင်းစား(အခမဲ့) သင်တန်းဖြစ်သည့်အတွက် သင်တန်းပြီးဆုံးသည်အထိတက်ရောက်စေလိုပါကြောင်း၊ ယနေ့ခေတ် IT နည်းပညာသည် အရေးကြီးအသုံးပြုလာသည့်အတွက် ကွန်ပျူတာသင်တန်းကို စိတ်ပါဝင်စားစွာ သင်ယူကြပြီး သင်တန်းပြီးဆုံးသွားချိန်တွင်လည်း IT နည်းပညာရပ်များကို စဉ်ဆက်မပြတ် လေ့လာ သင်ယူပြီး နိုင်ငံတကာနှင့်ရင်ဘောင်တန်းနိုင်မည့် မျိုးဆက်သစ်လူငယ်လူရည်ချွန်များဖြစ်အောင် ကြိုးစားဆောင်ရွက်ကြရန် လိုအပ်ပါကြောင်း၊ သင်တန်းမှ သင်ကြားပေးလိုက်သည့် ကွန်ပျူတာ ပညာရပ်များအား စိတ်ပါဝင်စားစွာ သေချာသင်ကြားလေ့လာမှတ်သားရန်လိုပါကြောင်း စသည် များအား ပြောကြားခဲ့ပါသည်။ထို့နောက် တိုင်းရင်းသားလူမျိုးများရေးရာဝန်ကြီးဌာန၊ တိုင်းရင်းသားအခွင့်အရေးများ ကာကွယ်စောင့်ရှောက်ရေးဦးစီးဌာန၊ ညွှန်ကြားရေးမှူးချုပ် ဦးမင်းအေးကိုက အမှာစကား ပြောကြားရာတွင် ဤသင်တန်းစင်တာသည် မဲခေါင်-လန်ချန်း ပူးပေါင်းဆောင်ရွက်မှုအထူး ရန်ပုံငွေနှင့် ပြည်ထောင်စု ဘဏ္ဍာရန်ပုံငွေများဖြင့် တည်ဆောက်ရခြင်းဖြစ်ကြောင်း၊ သင်တန်းများကို တိုင်းရင်းသားလူမျိုးများ၏ လူမှုစီးပွားဘဝ ဖွံ့ဖြိုးတိုးတက်ရန် ရည်ရွယ်ပြီး ဖွင့်လှစ်ရခြင်းဖြစ်ပါ ကြောင်း၊ သင်တန်းစင်တာမှ ချမှတ်ထားသည့် စည်းကမ်းချက်များကို သေချာစွာလိုက်နာကြစေ လိုပါကြောင်း၊ သင်တန်းသား/သူများ စည်းစည်းလုံးလုံးချစ်ချစ်ခင်ခင်နေထိုင်သွားကြရန်နှင့် သင်တန်းပြီးဆုံးအောင် တက်စေလိုပါကြောင်း၊ သင်တန်းများဖြစ်မြောက်စေရန် ဆောင်ရွက်ပေး ပါသော ရှမ်းပြည်နယ်အစိုးရအဖွဲ့ဝင်၊ တိုင်းရင်းသားရေးရာဝန်ကြီးနှင့် သင်ကြားပေးပါသော ဆရာ/ဆရာမ အားလုံးကိုလည်း အထူးကျေးဇူးတင်ပါကြောင်း ပြောကြားခဲ့ပါသည်။ ယင်းနောက် ရှမ်းပြည်နယ် အစိုးရအဖွဲ့မှ ထောက်ပံ့ပေးသည့် သင်ထောက်ကူပစ္စည်းများအား ရှမ်းပြည်နယ်အစိုးရအဖွဲ့ဝင်၊ တိုင်းရင်းသားရေးရာဝန်ကြီး ဦးအောင်ကြည်ဝင်းနှင့် တိုင်းရင်းသား အခွင့်အရေးများကာကွယ်စောင့်ရှောက်ရေးဦးစီးဌာန၊ ညွှန်ကြားရေးမှူးချုပ်တို့က ပေးအပ်ခဲ့ပြီး စုပေါင်းမှတ်တမ်းတင်ဓါတ်ပုံရိုက်ကူးခဲ့ပါသည်။ အဆိုပါသင်တန်းကို (၁၉-၂-၂၀၂၄)ရက်နေ့မှ (၁၉-၃-၂၀၂၄) ရက်နေ့အထိ ဖွင့်လှစ်မည်ဖြစ်ပြီး ရှှမ်းပြည်နယ်အတွင်းရှိ ရှမ်း၊ ပအိုဝ်း၊ ဓနု၊ တောင်ရိုး၊ အင်းသား၊ လီဆူ၊ ယင်းကြား၊ ယင်းနက်၊ ထနော့ စသည့် တိုင်းရင်းသား မျိုးနွယ်စုမှ သင်တန်းသူ/သား(၂၀)ဦး တက်ရောက်သင်ကြားလျက်ရှိပါသည်။ပြီးနောက် ရှမ်းပြည်နယ်အစိုးရအဖွဲ့ဝင်၊ တိုင်းရင်းသားရေးရာဝန်ကြီး ဦးအောင်ကြည်ဝင်း သည် သင်တန်းစင်တာတွင် သုံးရေရရှိရေးအတွက် ရှမ်းပြည်နယ်ကျေးလက်ဒေသဖွံ့ဖြိုး တိုးတက်ရေးဦးစီးဌာနမှ ဆောင်ရွက်သည့် အေးသာယာမြို့၊ ရပ်ကွက်(၂)ရှိ သဘာဝ ရေထွက်မှ သင်တန်းစင်တာသို့ ရေသွယ်တန်းနေမှုအား သွားရောက်ကြည့်ရှုခဲ့ပါကြောင်း သိရှိရပါသည်။
ဆက်လက်ဖတ်ရှုပါရန်