• 14 February 2024
• နေပြည်တော်

တိုင်းရင်းသားရေးရာကိစ္စရပ်များကို နိုင်ငံတော်မှ ပြဋ္ဌာန်းထားရှိသော ဥပဒေ၊ နည်းဥပဒေများနှင့်အညီ  ပူးပေါင်းဆောင်ရွက်နိုင်ရေးအတွက် တိုင်းရင်းသားလူမျိုးများရေးရာဝန်ကြီးဌာန ပြည်ထောင်စုဝန်ကြီးနှင့် တိုင်းဒေသကြီး/ပြည်နယ် တိုင်းရင်းသားရေးရာဝန်ကြီးများ၏ ပဥ္စမအကြိမ် ပုံမှန်လုပ်ငန်းညှိနှိုင်းအစည်းအဝေး (၁/၂၀၂၄)ကို ယနေ့နံနက်ပိုင်းတွင်  နေပြည်တော်ရှိ တိုင်းရင်းသားလူမျိုးများရေးရာဝန်ကြီးဌာန၊ အစည်းအဝေးခန်းမ၌ကျင်းပရာ ပြည်ထောင်စုဝန်ကြီး  Jeng Phang  နော်တောင်၊ တိုင်းဒေသကြီးနှင့် ပြည်နယ်တိုင်းရင်းသားရေးရာဝန်ကြီး များ၊အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်၊ ဒုတိယ ညွှန်ကြား ရေးမှူးချုပ်များနှင့်  တာဝန်ရှိသူများ တက်ရောက်ခဲ့ကြပါသည်။ဦးစွာ ပြည်ထောင်စုဝန်ကြီးက အမှာစကားပြောကြားရာတွင် ယနေ့အစည်းအဝေးသည် ပဉ္စမအကြိမ်ပုံမှန်လုပ်ငန်းညှိနှိုင်းအစည်းအဝေး(၁/၂၀၂၄)ဖြစ်ပြီး ၂၀၂၄-၂၀၂၅ ဘဏ္ဍာရေးနှစ်အတွက် တိုင်းဒေသကြီးနှင့်ပြည်နယ်အလိုက် တိုင်းရင်းသားရေးရာကိစ္စရပ်များနှင့်စပ်လျဉ်း၍ ဆောင်ရွက် မည့် လုပ်ငန်းအစီအစဉ်များကို ညှိနှိုင်းဆွေးနွေးသွားကြရန် ဖြစ်ပါကြောင်း၊ ၂၀၂၄-၂၀၂၅ ဘဏ္ဍာ ရေးနှစ်တွင် အမျိုးသားစီမံကိန်းလုပ်ငန်းစဉ် (၂၀)ခု ရှိပါကြောင်း၊ နိုင်ငံတော်စီမံအုပ်ချုပ်ရေး ကောင်စီ ၏ လမ်းညွှန်ချက်နှင့် မဲခေါင်-လန်ချန်းပူးပေါင်း‌စီမံကိန်းအရ တိုင်းရင်းသားများ၏ လူမှုစီးပွား ဘဝ ဖွံ့ဖြိုးတိုးတက်ရေးအတွက် (၇၇) နှစ်မြောက် ရှမ်းပြည်နယ်နေ့ကို ကြိုဆိုဂုဏ်ပြုသောအားဖြင့် ပထမဦးစွာ ရှမ်းပြည်နယ်၊ တောင်ကြီးမြို့နယ်၊ အေးသာယာမြို့၌ တိုင်းရင်းသားရေးရာနှင့်သက်မွေးပညာသင်တန်းစင်တာကို (၅-၂-၂၀၂၄) ရက်နေ့တွင် အောင်မြင်စွာဖွင့်လှစ်နိုင်ခဲ့ ပါ ကြောင်း၊ ဒေသခံတိုင်းရင်းသားလူငယ်များအတွက် ကွန်ပျူတာသင်တန်း၊ မော်တော်ဆိုင်ကယ် စက်ပြင်သင်တန်းအပြင် ဒေသနှင့်သင့်လျော်ကိုက်ညီမှန်ကန်သည့် သက်မွေးပညာကာလတို သင်တန်းများကို နှစ်စဉ်ဖွင့်လှစ်ပို့ချ ပေးသွားမည်ဖြစ်ပါကြောင်း၊ ၂၀၂၃-၂၀၂၄ ပညာသင်နှစ်တွင် တိုင်းရင်းသားစာပေသင်ကြားရေးအထောက်အကူပြု(Teaching Assistant -TA) ဆရာ၊ ဆရာမ နှင့် တိုင်းရင်းသားစာပေသင် (Language Teacher -LT) ဆရာ၊ ဆရာမ စုစုပေါင်း (၁၀၀၂၂) ဦး တို့ကို ခန့်ထားနိုင်ခဲ့ပြီး ၂၀၂၄ - ၂၀၂၅ ပညာသင်နှစ်အတွက် TA နှင့် LT ဆရာ၊ ဆရာမများ ခန့်ထားနိုင်ရေး လျှောက်လွှာများကိုလည်း ထပ်မံစိစစ်ပေးပို့နိုင်ရေး ပညာရေးဝန်ကြီးဌာနနှင့် ညှိနှိုင်းထားရှိပါကြောင်း၊ ဆက်လက်၍ရှေ့ဆက်ဆောင်ရွက်ရမည့် လုပ်ငန်းစဉ်များအား ပြော ကြားရာတွင် ရှမ်းပြည်နယ် တိုင်းရင်းသား ရေးရာနှင့်သက်မွေးပညာသင်တန်းစင်တာ”တွင် ဆက်လက်ဖွင့်လှစ်မည့် သက်မွေးပညာ သင်တန်းများနှင့် သင်တန်းသားရရှိရေးကိစ္စရပ်များ၊ TA/ LT ဆရာ၊ ဆရာမများ ခန့်ထားရေးနှင့် အပိုထောက်ပံ့ကြေး ခံစားခွင့်ကိစ္စရပ်များ၊ ပြည်တွင်း နေရပ်စွန့်ခွာသူများ ပြန်လည်နေရာ ချထားရေးနှင့် ယာယီခိုလှုံရေးစခန်း (IDP Camp)များမှ တိုင်းရင်းသားများအား လူသားချင်း စာနာထောက်ထားမှု အကူအညီပေးရေးကိစ္စရပ်များ၊ တိုင်း ဒေသကြီးနှင့် ပြည်နယ်များရှိ တိုင်းရင်းသားများ၏ နေ့ထူးနေ့မြတ်များပွဲတော်များ ကျင်းပ ခြင်း၊ တိုင်းရင်းသားရေးရာ ပြခန်းများ ခင်းကျင်းပြသခြင်းများအတွက် ကုန်ကျမည့်စရိတ်များ အား သက်ဆိုင်ရာ တိုင်းဒေသကြီးနှင့် ပြည်နယ်အလိုက် နှစ်စဉ်ဘဏ္ဍာရန်ပုံငွေ မပျက်မကွက် ထည့်သွင်းရေးဆွဲရေး ကိစ္စရပ်များ၊ မြေလွတ်၊မြေလပ်နှင့် မြေရိုင်းဆိုင်ရာ သဘောထားမှတ်ချက် တောင်းခံလာသည့် ကိစ္စရပ်များတွင် မြေပြင်ကွင်းဆင်းစိစစ်ရာ၌ သက်ဆိုင်ရာ တိုင်းဒေသကြီး နှင့်ပြည်နယ် ညွှန်ကြားရေးမှူးရုံးများမှ ဝန်ထမ်းများ လိုက်ပါကွင်းဆင်းနိုင်ရေးကိစ္စရပ်များ၊ စစ်မှန်သော မျိုးချစ်စိတ်ဓာတ်ဖြစ်သည့် ပြည်ထောင်စုစိတ်ဓာတ် ရှင်သန်ထက်မြက်ရေးနှင့် ဗလ ငါးတန် ဖွံ့ဖြိုးတိုးတက်ရေးအတွက် တိုင်းရင်းသားရေးရာ အသိပညာပေး ဟောပြောခြင်းနှင့် ရပ်ရွာ အခြေပြု အသက်မွေးဝမ်းကျောင်းပညာလိုအပ်ချက် ဆန်းစစ်ဆောင်ရွက်ခြင်း ကိစ္စရပ် များ၊ တိုင်းရင်းသားများ၏ ရိုးရာဓလေ့ဖြတ်ထုံးများအား သုတေသနပြုမှတ်တမ်းတင်ခြင်း ဆိုင်ရာ ကိစ္စရပ်များနှင့် တိုင်းဒေသကြီးနှင့် ပြည်နယ်အလိုက် ဖွဲ့စည်းထားရှိသည့် တိုင်းရင်းသား စာပေ နှင့် ယဉ်ကျေးမှုအသင်းအဖွဲ့များ တရားဝင်မှတ်ပုံတင်နိုင်ရေးကိစ္စရပ်များ စသည်တို့ အပေါ် တိုင်းဒေသကြီးနှင့် ပြည်နယ်တိုင်းရင်းသားရေးရာဝန်ကြီးများအနေဖြင့် လိုအပ်သည့် ပံ့ပိုးမှု များ နှင့် ညှိနှိုင်းပေါင်းစပ်မှုများ ဆောင်ရွက်ပေးကြစေလိုပါကြောင်း၊ တိုင်းရင်းသားများ၏ စာပေနှင့် ယဉ်ကျေးမှုကို ပိုမိုမြှင့်တင်ခြင်း၊ တိုင်းရင်းသားများရေးရာလုပ်ငန်းကိစ္စရပ်များကို ဥပဒေနှင့် အညီ ဆောင်ရွက်ပေးခြင်း၊ဖွံ့ဖြိုးမှုနည်းပါးသည့်ဒေသရှိတိုင်းရင်းသားများ၏ပညာရေး၊ ကျန်းမာ ရေး၊ လူမှုရေး၊ စီးပွားရေး၊ လမ်းပန်းဆက်သွယ်ရေး မြှင့်တင်ခြင်းလုပ်ငန်း တို့ကို ဆက်စပ်ဝန်ကြီး ဌာန များနှင့်အတူ ပေါင်းစပ်ညှိနှိုင်း၍ ဝိုင်းဝန်းကြိုးပမ်း ဆောင်ရွက်ကြရန် ပြောကြားပါသည်။  ထို့နောက် ပြည်ထောင်စုဝန်ကြီးက တိုင်းရင်းသားယဉ်ကျေးမှုဆိုင်ရာ စာအုပ်စာတမ်း များကို တိုင်းဒေသကြီးနှင့်ပြည်နယ်အစိုးရအဖွဲ့ တိုင်းရင်းသားရေးရာဝန်ကြီးများ ကိုယ်စား ကချင်ပြည်နယ် တိုင်းရင်းသားရေးရာဝန်ကြီးနှင့် စစ်ကိုင်းတိုင်းဒေသကြီး တိုင်းရင်းသားရေးရာ ဝန်ကြီးတို့အား ပေးအပ်ခဲ့ပါသည်။ ဆက်လက်၍ တက်ရောက်လာကြသည့် တိုင်းဒေသကြီးနှင့် ပြည်နယ်တိုင်းရင်းသားရေးရာ ဝန်ကြီးများက ၂၀၂၄-၂၀၂၅ ဘဏ္ဍာရေးနှစ်တွင် ဆောင်ရွက်မည့်လုပ်ငန်းစဉ်များအား အပြန်အလှန် ညှိနှိုင်း ဆွေးနွေးတင်ပြကြပါသည်။ ၎င်းနောက် တက်ရောက်လာသူများက အထွေထွေဆွေးနွေးကြပြီးနောက် ပြည်ထောင်စု ဝန်ကြီးက ခြုံငုံသုံးသပ်၍ ပေါင်းစပ်ညှိနှိုင်းဖြည့်ဆည်းဆောင်ရွက်ပေးခဲ့ပါသည်။ထို့နောက် ပြည်ထောင်စုဝန်ကြီးက နိုင်ငံတော်စီမံကောင်စီအုပ်ချုပ်ရေးကောင်စီက ချမှတ်ထားသော ရှေ့လုပ်ငန်းစဉ် (၅) ရပ်နှင့် ဦးတည်ချက် (၉)ရပ်တို့ကို အရှိန်အဟုန်ဖြင့် ဆက် လက် အကောင်အထည်ဖော်ကြိုးပမ်းဆောင်ရွက်ရေး၊ စစ်မှန်သောမျိုးချစ်စိတ်ဓာတ် ဖြစ်သည့် ပြည်ထောင်စုစိတ်ဓာတ်ကိုအခြေခံ၍  တိုင်းရင်းသားပြည်သူတစ်ရပ်လုံးက မျှော်လင့်တောင့်တလျက်ရှိသော ဒီမိုကရေစီနှင့်ဖက်ဒရယ်စနစ်ကိုအခြေခံသည့် ပြည်ထောင်စုတည်ဆောက်ရေးလုပ်ငန်းစဉ်များတွင်ကျရာကဏ္ဍမှ အားကြိုးမာန် တက်ဖြင့် ဆက်လက်ပူးပေါင်း ပါဝင်ဆောင်ရွက် သွားကြရန် တိုက်တွန်းပြောကြားကာ အစည်းအ‌ဝေးကို ရုပ်သိမ်းခဲ့ကြောင်း သတင်း ရရှိပါသည်။

• 13 February 2024
• နေပြည်တော်

တိုင်းရင်းသားလူမျိုးများရေးရာဝန်ကြီးဌာန၊ အရာထမ်းစီမံခန့်ခွဲမှုသင်တန်း အမှတ်စဉ် ၁/၂၀၂၄ သင်တန်းဆင်းပွဲအခမ်းအနားကို ဖေဖော်ဝါရီ  ၉  ရက်နေ့ နံနက်ပိုင်းတွင် တိုင်းရင်းသားလူမျိုးများရေးရာဝန်ကြီး ဌာန၊ အစည်းအဝေးခန်းမ၌ ကျင်းပပြုလုပ်ရာ ပြည်ထောင်စုဝန်ကြီး Jeng Phang နော်တောင်၊ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူးချုပ်များ၊ သင်တန်းသား၊ သင်တန်းသူများနှင့် အရာထမ်း၊ အမှုထမ်းများ တက်ရောက်ခဲ့ကြပြီး တိုင်းဒေသကြီး/ ပြည်နယ် ညွှန်ကြားရေးမှူးရုံးများနှင့် ပြည်ထောင်စုတိုင်းရင်းသားကျေးရွာ(ရန်ကုန်)မှ သင်တန်းသား၊ သင်တန်းသူများက အွန်လိုင်းမှ တက်ရောက်ခဲ့ကြပါသည်။ ရှေးဦးစွာ ပြည်ထောင်စုဝန်ကြီးက အဖွင့်အမှာစကားပြောကြားရာတွင် အရာထမ်း စီမံခန့်ခွဲမှုသင်တန်း အမှတ်စဉ်(၁/၂၀၂၄) ကို သင်တန်းသား (၅၇) ဦးဖြင့် ဖွင့်လှစ်နိုင်ခဲ့ပြီး ဤသင်တန်းဖြစ်မြောက်ရေးအတွက် အဘက်ဘက်မှ ပါဝင်ပံ့ပိုးခဲ့ကြသော တာဝန်ရှိပုဂ္ဂိုလ်များကို ကျေးဇူးတင်ရှိပါကြောင်း၊ နိုင်ငံ့ဝန်ထမ်းများ၊ ဌာနဆိုင်ရာတာဝန်ရှိသူများသည် နိုင်ငံတော်အစိုးရကိုယ်စား တာဝန်ထမ်းဆောင်နေကြသူများဖြစ်ပါကြောင်း၊ အစိုးရနှင့် ပြည်သူများအကြား ပေါင်းကူးဆက်စပ်ပေးသည့် လူပုဂ္ဂိုလ်များ၊ ဌာနများဖြစ်ပါကြောင်း၊ တစ်နည်းအားဖြင့် နိုင်ငံသူ၊ နိုင်ငံသားများ၏ အကျိုးစီးပွားကို မှန်ကန်သစ္စာရှိစွာ ဖော်ဆောင်ပေးသူများဖြစ်ပါကြောင်း၊ သင်တန်းသူ သင်တန်းသားများအနေဖြင့် မိမိတို့၏ ဌာနဆိုင်ရာလုပ်ငန်းတာဝန်များနှင့် ပတ်သက်၍ အတွေ့အကြုံရှိပြီး အရည်အသွေးနှင့် အရည်အချင်းပြည့်ဝကာ လုပ်ငန်းစွမ်းဆောင်ရည်မြင့်မားပြီး ကျွမ်းကျင်သူပညာရှင်များ ဖြစ်လာရန်လိုအပ်ပါကြောင်း၊ မိမိတို့ တာဝန်ထမ်းဆောင်နေသည့် နေရာဒေသနှင့် တိုင်းဒေသကြီး/ ပြည်နယ် ဖွံ့ဖြိုးတိုးတက်ရေး အတွက် အားကောင်းလာစေရန် ကျရာအခန်းကဏ္ဍမှ ဝိုင်းဝန်းဆောင်ရွက်ပေးကြရမည်ဖြစ်ပါကြောင်း၊ ဤသင်တန်း တက်ရောက်သင်ကြားခဲ့ခြင်းအားဖြင့် မိမိတို့ဌာန၏ မူဝါဒ၊ လုပ်ငန်းစဉ်၊ စည်းမျဉ်းစည်းကမ်း၊ ဥပဒေလုပ်ထုံးလုပ်နည်းများကို စနစ်တကျ သိရှိထားမှသာ လုပ်ငန်းများဆောင်ရွက်ရာတွင်ဖြစ်စေ၊ ပြည်သူများကို ဝန်ဆောင်မှုပေးရာတွင်ဖြစ်စေ၊ ပြည်သူတို့၏ ရပိုင်ခွင့် အခွင့်အလမ်းများကို အထောက်အကူပြုပေးရာတွင်ဖြစ်စေ ထိရောက်စွာ ဆောင်ရွက်လာနိုင်မည်ဖြစ်ပါကြောင်း၊ နိုင်ငံတော်နှင့်ဝန်ကြီးဌာနအတွက် အားကိုးအားထား ပြုရမည့် ဝန်ထမ်းကောင်းများ ဖြစ်လာစေရန် စဉ်ဆက်မပြတ် အမြဲကြိုးစားရန် လိုအပ်ပါကြောင်း၊ ဝန်ထမ်းများအနေဖြင့် အဖွဲ့အစည်းနှင့် ဆောင်ရွက်ရသည်ဖြစ်ရာ အဖွဲ့အစည်းအတွင်း တာဝန်ခွဲဝေယူတတ်ခြင်း၊ စည်းလုံးညီညွတ်စွာ ပူးပေါင်းဆောင်ရွက်တတ်ခြင်း၊ တာဝန်ယူခြင်း၊ တာဝန်ခံခြင်းစသည့် စိတ်ဓာတ်များရှိနေရန် လိုအပ်ပါကြောင်း၊ ရဲဘော်ရဲဘက်စိတ်ဓာတ် ရှိရမည်ဖြစ်ပြီး သို့မှသာ ဝန်ကြီးဌာန၏ မျှော်မှန်းချက်၊ ရည်မှန်းချက်များကို ရာနှုန်းပြည့်နီးပါး အကောင်အထည်ဖော် ဆောင်ရွက်နိုင်မည်ဖြစ်ပါကြောင်း၊ မိမိတို့ဝန်ကြီးဌာနအနေဖြင့် တိုင်းရင်းသားစည်းလုံးညီညွတ်ရေးကို အဓိကထား၍ ကြိုးပမ်းဆောင်ရွက်ရန် လိုအပ်ပြီး ဝန်ထမ်းများအနေဖြင့် စံနမူနာပြဖြစ်အောင် ကြိုးစားနေထိုင်သွားကြရန်ဖြစ်ပါကြောင်း၊ သင်တန်းသားများအနေဖြင့် သင်တန်းတွင် သင်ကြားပို့ချခဲ့သည့် သင်ခန်းစာများ၊ ဌာနနှင့်ပတ်သက်သည့် စည်းမျဉ်းစည်းကမ်းများ၊ စီမံခန့်ခွဲမှုနှင့် ဘဏ္ဍာရေး ဆိုင်ရာကိစ္စရပ်များ၊ ဗဟုသုတများကို သေချာစွာ လေ့လာမှတ်သားလိုက်နာပြီး နိုင်ငံ့ဝန်ထမ်း တက္ကသိုလ်များတွင် ဖွင့်လှစ်သော သင်တန်းများတွင်လည်း အဆင့်မြင့်မြင့် အောင်မြင်စေရေး ကြိုးစားကြရန် ဖြစ်ပါကြောင်း၊ နိုင်ငံတော်၏ မွန်မြတ်သော လုပ်ငန်းတာဝန်များကို ထမ်းဆောင်ကြရာတွင် ဗလငါးတန်တွင်ပါဝင်သော ကာယဗလဖြစ်သည့် ကိုယ်၏စွမ်းအား၊ ဉာဏဗလဖြစ်သည့် စိတ်၏စွမ်းအားများ ဖွံ့ဖြိုးတိုးတက်စေရေး ပုံမှန်စဉ်ဆက်မပြတ်   မိမိကိုယ်ကိုမိမိ ကြိုးစားအားထုတ်ပြီး   နိုင်ငံတော်က ရည်မှန်းထားရှိသည့် ဝန်ထမ်းအုပ်ချုပ်မှု စနစ်ကောင်းမွန်စေရေး ကြိုးစားသွားကြရန်ဖြစ်ပါကြောင်း၊“တတ်သိပညာ မလေ့လာ မကြာမရှည်ပျောက်တတ် သည်”ဆိုသည့်အတိုင်း လေ့လာသင်ကြားထားသည်များကို ပြန်လည် မလေ့လာပါကမေ့လျော့ သွားတတ်ပါကြောင်း၊ “ဝန်ထမ်းကောင်းမှ နိုင်ငံကောင်းမည်”ဆောင်ပုဒ်ရှိသည်နှင့်အညီ မိမိတို့ ကျရာကဏ္ဍမှ လုပ်ငန်းတာဝန်များကို အားကြိုးမာန်တက် ထမ်းဆောင်ပေးကြစေလိုပါကြောင်း တိုက်တွန်းပြောကြားပါသည်။ ဆက်လက်၍ ပြည်ထောင်စုဝန်ကြီးက သင်တန်းဆင်းလက်မှတ်များကို ပေးအပ်ရာ သင်တန်းသားများကိုယ်စား သင်တန်းသား(၁)ဦးကလည်းကောင်း၊ သင်တန်းသူများကိုယ်စား သင်တန်းသူ (၁) ဦးကလည်းကောင်း လက်ခံရယူကြပါသည်။ ထို့နောက် သင်တန်းသား သင်တန်းသူများကိုယ်စား သင်တန်းသား (၁) ဦးက ကျေးဇူးတင်စကား ပြောကြားပြီး အခမ်းအနားကို ရုပ်သိမ်းခဲ့ကြောင်းသိရှိရပါသည်။

• 13 February 2024
• ဧရာဝတီတိုင်းဒေသကြီး၊ ပုသိမ်မြို့

ပုသိမ်ခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီး၍  တိုင်းရင်းသားစာပေနှင့် ယဉ်ကျေးမှုဦးစီးဌာန၊ ဧရာဝတီတိုင်းဒေသကြီး၊ ညွှန်ကြားရေးမှူးရုံး၊ အခြေခံပညာဦးစီးဌာနတို့နှင့် ပူးပေါင်း၍ အသိပညာပေးဟောပြောပွဲနှင့် လူငယ်စကားဝိုင်းအခမ်းအနားကို ၂၀၂၄ ခုနှစ်၊ ဖေဖော်ဝါရီလ ၇ ရက်နေ့တွင် ပုသိမ်မြို့၊ အ.ထ.က(၈)၊ အခြေခံပညာအထက်တန်းကျောင်းခန်းမ၌ ကျင်းပပြုလုပ်ခဲ့ပါသည်။အခမ်းအနားတွင် ပုသိမ်မြို့၊ အ.ထ.က(၈) ကျောင်းအုပ်ဆရာမကြီး ဒေါ်အေးမူက အဖွင့်အမှာ စကားပြောကြားပြီး ပုသိမ်ခရိုင်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လက်ထောက် ညွှန်ကြားရေးမှူး ဦးဝင်းရှိန်က အသိပညာပေးဟောပြောပွဲနှင့် လူငယ်စကားဝိုင်း ကျင်းပပြုလုပ်ရခြင်း၏ ရည်ရွယ်ချက်အား ရှင်းလင်းပြောကြား၍ တိုင်းရင်းသားစာပေနှင့်ယဉ်ကျေးမှုဦးစီးဌာန၊ ညွှန်ကြားရေးမှူးရုံးမှ တာဝန်ခံအရာရှိ လက်ထောက်ညွှန်ကြားရေးမှူး ဒေါ်အေးကျော့ရီက တိုင်းရင်းသားလူမျိုးများရေးရာဝန်ကြီးဌာနအကြောင်း မိတ်ဆက်ပြောကြားပြီး တိုင်းရင်းသားစာပေနှင့်ယဉ်ကျေးမှုခေါင်းစဉ်ဖြင့် အသိပညာပေး ဟောပြောခဲ့ပါသည်။ ဆက်လက်၍ လူငယ်စကားဝိုင်း အစီအစဉ်တွင်ပါဝင်သည့် ကျောင်းသား၊ ကျောင်းသူများကလူငယ်နှင့်ကျန်းမာရေး၊လူငယ်နှင့်စာပေ၊ လူငယ်နှင့်မူးယစ်ဆေးဝါး၊ လူငယ်နှင့်စာရိတ္တစသည့် အကြောင်းအရာများအား ဆွေးနွေးခြင်း၊ ဖြေကြားခြင်းများ ဆောင်ရွက်ခဲ့ကြပါသည်။ထို့နောက် ပုသိမ်ခရိုင်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လက်ထောက်ညွှန်ကြားရေးမှူး ဦးဝင်းရှိန်က လူငယ်စကားဝိုင်းတွင် ပါဝင်ဆွေးနွေးကြသည့် ကျောင်းသား၊ ကျောင်းသူများအား ဂုဏ်ပြုမှတ်တမ်းများပေးအပ်ခြင်း၊ တိုင်းရင်းသားစာပေနှင့်ယဉ်ကျေးမှုဦးစီးဌာန၊ ညွှန်ကြားရေးမှူးရုံးမှ တာဝန်ခံအရာရှိ လက်ထောက်ညွှန်ကြားရေးမှူး ဒေါ်အေးကျော့ရီက လူငယ်စကားဝိုင်း အစီအစဉ်တွင် ပါဝင်ဆွေးနွေးခဲ့ကြသည့် ကျောင်းသား၊ ကျောင်းသူများအား အမှတ်တရလက်ဆောင်ပစ္စည်းများပေးအပ်၍ စုပေါင်းမှတ်တမ်းဓါတ်ပုံများ ရိုက်ကူးခဲ့ကြပြီး အခမ်းအနားကို ရုပ်သိမ်းခဲ့ကြောင်း သတင်းရရှိပါသည်။ 

• 13 February 2024
• ဧရာဝတီ

(၇၇) နှစ်မြောက်ပြည်ထောင်စုနေ့အထိမ်းအမှတ် တိုင်းအဆင့်ဌာနဆိုင်ရာများအလိုက် ဂုဏ်ပြု ပြခန်းများအား အများပြည်သူများ လေ့လာကြည့်ရှုနိုင်ရန် ၂၀၂၄ ခုနှစ်၊ ဖေဖော်ဝါရီလ ၁၁ ရက်နေ့မှ ၁၄ ရက်နေ့အထိ ဧရာဝတီတိုင်းဒေသကြီး၊ ပုသိမ်မြို့၊ ကျောက်တိုင်အားကစားကွင်း၌ ခင်းကျင်းပြသခဲ့ရာ ပြခန်းပေါင်း(၁၀၀)ခန်းပါရှိပြီး ယင်းပြခန်းများအနက် တိုင်းရင်းသားလူမျိုးများရေးရာဝန်ကြီးဌာန ပြခန်းသည်လည်း တစ်ခုအပါအဝင်ခင်းကျင်း ပြသဆောင်ရွက်လျက်ရှိပါသည်။တိုင်းရင်းသားလူမျိုးများရေးရာဝန်ကြီးဌာနပြခန်းတွင် ကချင်၊ ကယား၊ ကရင်၊ ချင်း၊ ဗမာ၊ မွန်၊ ရခိုင်၊ ရှမ်း တိုင်းရင်းသားမျိုးနွယ်စုကြီး(၈)မျိုး၏ ရိုးရာဝတ်စား ဆင်ယင်ထုံးဖွဲ့မှုများ၊ ကရင်၊ ဗမာ၊ ချင်း၊ ရခိုင်တိုင်းရင်းသားတို့၏ရိုးရာအိမ်ပုံစံငယ်များ၊ တိုင်းရင်းသားများ၏ နေ့ထူးနေ့မြတ်အခမ်းအနား မှတ်တမ်းဓါတ်ပုံများနှင့် တိုင်းရင်းသားဘာသာစာပေသင်မွမ်းမံသင်တန်း ဖွင့်လှစ်သင်ကြားမှုမှတ်တမ်း ဓါတ်ပုံများ၊ ဝန်ကြီးဌာန၏ မျှော်မှန်းချက်(Vision) နှင့် ဦးစီးဌာန၏ဆောင်ပုဒ်များ၊ မြန်မာနိုင်ငံရှိ တိုင်းရင်းသားမျိုးနွယ်စု (၁၃၅) မျိုးစာရင်းများ၊ တိုင်းဒေသကြီး နှင့် ပြည်နယ်အတွင်း တိုင်းရင်းသား ဘာသာစာပေသင်ကြားခွင့်ရရှိသည့် စာပေ(၇၂)မျိုးစာရင်းများ၊ မြန်မာနိုင်ငံရှိ တိုင်းရင်းသားလူမျိုး များနေထိုင်ရာပြမြေပုံ၊ ကရင်ရိုးရာဖားစည်နှင့် အခြားရိုးရာတူရိယာအသုံးအဆောင်ပစ္စည်းများ၊ ရခိုင်ရိုးရာစည်တော်နှင့် အခြားရိုးရာတူရိယာအသုံးအဆောင်ပစ္စည်းများ၊ ချင်းတိုင်းရင်းသား ရိုးရာ တူရိယာအသုံးအဆောင်ပစ္စည်းများအား ခင်းကျင်းပြသဆောင်ရွက်ခဲ့ပါသည်။ တိုင်းရင်းသားလူမျိုးများရေးရာဝန်ကြီးဌာနပြခန်းသို့ ကရင်၊ ရခိုင်၊ ချင်း တိုင်းရင်းသားစာပေ ယဉ်ကျေးမှုအကအဖွဲ့များအပါအဝင် ဌာနဆိုင်ရာအသီးသီးမှ ဝန်ထမ်းများ၊ ကျောင်းသား၊ ကျောင်းသူ များနှင့် အများပြည်သူများ လာရောက်လေ့လာကြည့်ရှုခဲ့ကြပြီး ဉာဏ်စမ်းပဟေဠိများဖြေဆိုကာ အမှတ်တရလက်ဆောင်ပစ္စည်းများပေးအပ်ခြင်း၊ ဝန်ကြီးဌာန၏ မူဝါဒ၊ မျှော်မှန်းချက်၊ ရည်မှန်းချက် များအကြောင်းပါဝင်သည့် လက်ကမ်းစာစောင်များနှင့် တိုင်းရင်းသားမျိုးနွယ်စုများအကြောင်းပါဝင်သည့် လက်ကမ်းစာစောင်များအား ဗဟုသုတရရှိနိုင်စေရေး ဖြန့်ဝေပေးခဲ့ကြောင်း သတင်းရရှိပါသည်။

• 07 February 2024
• ရှမ်းပြည်နယ်

၂၀၂၄ ခုနှစ်၊ ဖော်ဖော်ဝါရီလ (၇) ရက်နေ့တွင် ကျရောက်မည့် (၇၇) နှစ်မြောက် ရှမ်းပြည်နယ်နေ့ကို ကြိုဆိုဂုဏ်ပြုသောအားဖြင့် ရှမ်းပြည်နယ်၊ တိုင်းရင်းသားရေးရာနှင့် သက်မွေးပညာသင်တန်းစင်တာ အဆောက်အအုံ ဖွင့်ပွဲအခမ်းအနားကို ဖေဖော်ဝါရီလ (၅) ရက်နေ့ နံနက်(၀၉:၃၀)နာရီတွင် တောင်ကြီးမြို့နယ်၊ အေးသာယာမြို့၊ ခပေါင်းရေကြည် ရပ်ကွက်ရှိ အဆိုပါအဆောက်အအုံ၌ ကျင်းပပြုလုပ်ရာ နိုင်ငံတော်စီမံအုပ်ချုပ်ရေးကောင်စီ အဖွဲ့ဝင်များ ဖြစ်ကြသည့် ဒေါက်တာ ဘရွှေ၊ ခွန်စံလွင်၊ ပြည်ထောင်စုဝန်ကြီးများ ဖြစ်ကြသည့် ဦးမင်းသိန်းဇံ၊ ဒေါက်တာ စိုးဝင်း၊ Jeng Phang နော်တောင်၊ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးအောင်အောင်၊ တရုတ်ပြည်သူ့သမ္မတနိုင်ငံကိုယ်စား မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ သံမှူးကြီး ဒေါက်တာ ကျန်းကျိဟုန်၊ ဒုတိယဝန်ကြီးများ ဖြစ်ကြသည့် ဒေါက်တာဇော်မြင့်၊ ဒေါက်တာအေးထွန်း၊ ဦးဇော်အေးမောင်၊ ပြည်နယ် အစိုးရအဖွဲ့ဝင် ဝန်ကြီးများ၊  နိုင်ငံခြားရေး ဝန်ကြီးဌာန၊ မဲခေါင်-လန်ချန်း ပူးပေါင်းဆောင်ရွက်မှု ပူးပေါင်းညှိနှိုင်းရေးအဖွဲ့(မြန်မာ)မှ ဒုတိယဥက္ကဌနှင့် တာဝန်ရှိပုဂ္ဂိုလ်များ၊ ဖိတ်ကြားထားသူများနှင့် တိုင်းရင်းသားညီအစ်ကို မောင်နှမများ တက်ရောက်ကြပါသည်။ပထမဦးစွာ ရှမ်းပြည်နယ်၊ တိုင်းရင်းသားရေးရာနှင့် သက်မွေးပညာသင်တန်းစင်တာ အဆောက်အအုံကို နိုင်ငံတော်စီမံအုပ်ချုပ်ရေးကောင်စီအဖွဲ့ဝင် ဒေါက်တာဘရွှေ၊ ခွန်စံလွင်၊ ပြည်ထောင်စုဝန်ကြီးများဖြစ်ကြသည့် ဦးမင်းသိန်းဇံ၊ ဒေါက်တာ စိုးဝင်း၊ Jeng Phang နော်တောင်၊ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးအောင်အောင်၊ မြန်မာနိုင်ငံဆိုင်ရာ တရုတ်နိုင်ငံ သံမှူးကြီး ဒေါက်တာ ကျန်းကျိဟုန်၊ ဒုတိယဝန်ကြီး ဒေါက်တာဇော်မြင့်၊ ဒေါက်တာအေးထွန်း၊ ဦးဇော်အေးမောင်နှင့် ရှမ်းပြည်နယ်အစိုးရအဖွဲ့ဝင် လုံခြုံရေးနှင့်နယ်စပ် ရေးရာဝန်ကြီး ဗိုလ်မှူးကြီး စိန်ဝင်း၊ လမ်းပန်းဆက်သွယ်ရေးဝန်ကြီး ရဲချုပ်တင်ကိုကိုနှင့် တိုင်းရင်းသားရေးရာဝန်ကြီး ဦးအောင်ကြည်ဝင်းတို့က ဖဲကြိုးဖြတ်ဖွင့်လှစ်ပေးခဲ့ပြီး နိုင်ငံတော် စီမံအုပ်ချုပ်ရေးကောင်စီအဖွဲ့ဝင် ဒေါက်တာဘရွှေ၊ ခွန်စံလွင်နှင့် မြန်မာနိုင်ငံဆိုင်ရာ တရုတ် ပြည်သူ့သမ္မတနိုင်ငံ သံမှူးကြီး ဒေါက်တာ ကျန်းကျိဟုန်တို့က စက်ခလုပ်နှိပ်ဖွင့်လှစ်ပေးခဲ့ကာ အမွေးနံ့သာရည်များ ပက်ဖျန်းပေးကြပြီး စုပေါင်းမှတ်တမ်းတင်ဓာတ်ပုံများ ရိုက်ကူးကြပါသည်။ ၎င်းနောက် နိုင်ငံတော်စီမံအုပ်ချုပ်ရေးကောင်စီအဖွဲ့ဝင်များနှင့် ဧည့်သည်တော်များသည် စင်တာပင်မလေးထပ်ဆောင် ကဗ္ဗည်းမော်ကွန်းအား အမွေးနံ့သာရည်များ ပက်ဖျန်းပေးကြပါသည်။အခမ်းအနားအစီအစဉ်   ဒုတိယပိုင်းကို  ဆက်လက်ကျင်းပရာ နိုင်ငံတော်စီမံအုပ်ချုပ်ရေးကောင်စီအဖွဲ့ဝင်  ဒေါက်တာ ဘရွှေက  အဖွင့်အမှာစကား    ပြောကြားရာတွင်  မဲခေါင်-လန်ချန်း ပူးပေါင်းဆောင်ရွက်မှု၏ အဓိကရည်ရွယ်ချက်သည် မဲခေါင်ဒေသတွင်းနိုင်ငံများ၏ လူမှုစီးပွားဖွံ့ဖြိုးတိုးတက်ရေးကို  အထောက်အကူပြုပြီး သာယာဝပြောမှုကိုတိုးမြှင့်ပေးရန်၊ စဉ်ဆက်မပြတ် ဖွံ့ဖြိုးတိုးတက်မှုရရှိစေရေးနှင့် ဖွံ့ဖြိုးတိုးတက်မှုကွာဟနေခြင်းကို လျှော့ချသွားရန်၊ အာဆီယံအသိုက်အဝန်းတည်ထောင်မှုကို အထောက်အကူပြုရန်၊ ကုလသမဂ္ဂ စဉ်ဆက်မပြတ်ဖွံ့ဖြိုးတိုးတက်မှုအစီအစဉ်၏ ၂၀၃၀ ရည်မှန်းချက်များကို တိုးမြှင့်အကောင်အထည်ဖော်သွားရန်နှင့် ဖွံ့ဖြိုးဆဲနိုင်ငံများအကြား ပူးပေါင်းဆောင်ရွက်ရေးကို တိုးမြှင့်သွားရန်စသည့် ရည်ရွယ်ချက်များဖြင့် ဆောင်ရွက်ခြင်းဖြစ်ပါကြောင်း၊ မဲခေါင်မိသားစု ဆိုသည့်အယူအဆကို လက်တွေ့စတင်အကောင်အထည်ဖော်ခဲ့သည့် ဘူမိနက်သန်နေရာက  မြန်မာနိုင်ငံပင်ဖြစ်ပါကြောင်း၊ ၂၀၁၄ ခုနှစ်၌ နေပြည်တော်တွင်  ကျင်းပပြုလုပ်ခဲ့သည့် (၁၇)ကြိမ်မြောက် အာဆီယံ-တရုတ် ထိပ်သီးအစည်းအဝေးတွင် မဲခေါင်ဒေသတွင်း နိုင်ငံများအကြား ဖွံ့ဖြိုးတိုးတက်မှုကွာဟနေခြင်းကို လျှော့ချရန်နှင့် စဉ်ဆက်မပြတ်ဖွံ့ဖြိုးတိုးတက်မှုရရှိရန်အတွက် ပူးပေါင်းဆောင်ရွက်မှုများပြုလုပ်ရန်လိုအပ်ကြောင်း   ထိုင်းနိုင်ငံက   ဆွေးနွေးမှုအပေါ် အခြေခံပြီး မဲခေါင်ဒေသခွဲနိုင်ငံများဖြစ်ကြသည့် ကမ္ဘောဒီးယား၊ တရုတ်၊ လာအို၊ မြန်မာ၊ ထိုင်းနှင့် ဗီယက်နမ်နိုင်ငံတို့အကြား ပူးပေါင်းဆောင်ရွက်မှုလုပ်ငန်းစဉ်တစ်ရပ် ထူထောင်ရန် တရုတ်ပြည်သူ့သမ္မတနိုင်ငံက အဆိုပြုခဲ့တာဖြစ်ပါကြောင်း၊ ၂၀၁၅ ခုနှစ်၌ တရုတ်ပြည်သူ့သမ္မတနိုင်ငံ၊ ကျင်းဟုန်မြို့တွင် ကျင်းပခဲ့သည့် မဲခေါင်-လန်ချန်း ပူးပေါင်း ဆောင်ရွက်မှုလုပ်ငန်းစဉ် အစည်းအဝေးတွင် နိုင်ငံရေးနှင့် လုံခြုံရေးမဏ္ဍိုင်၊ စီးပွားရေးနှင့် စဉ်ဆက်မပြတ်ဖွံ့ဖြိုးတိုးတက်ရေးမဏ္ဍိုင်နှင့် လူမှုရေး၊ ယဉ်ကျေးမှုနှင့် ပြည်သူအချင်းချင်း အပြန်အလှန် ထိတွေ့ဆက်ဆံရေးမဏ္ဍိုင်စသည့် မဏ္ဍိုင် (၃)ခုနှင့် ဖွဲ့စည်းဆောင်ရွက်ရန် သဘောတူညီခဲ့ကြတာဖြစ်ပါကြောင်း၊ အဆိုပါ မဏ္ဍိုင် (၃)ခုအပြင် မဲခေါင်-လန်ချန်း အောက်တွင် ပေါင်းစည်းဆက်နွှယ်မှု၊ ထုတ်လုပ်မှုစွမ်းရည်တိုးမြှင့်ရေး ပူးပေါင်းဆောင်ရွက်မှု၊ နယ်စပ်ဖြတ်ကျော် စီးပွားရေးပူးပေါင်းဆောင်ရွက်မှု၊ ရေအရင်းအမြစ်ဆိုင်ရာ    ပူးပေါင်းဆောင်ရွက်မှု၊   စိုက်ပျိုးရေးနှင့်    ဆင်းရဲနွမ်းပါးမှုလျှော့ချရေးဆိုင်ရာ ပူးပေါင်းဆောင်ရွက်မှု စသည့် ဦးစားပေးနယ်ပယ် (၅)ခု သတ်မှတ်ပြီး မဲခေါင်-လန်ချန်း ပူးပေါင်းဆောင်ရွက်မှု အထူးရန်ပုံငွေ၏ အထောက်အပံ့ဖြင့် စီမံကိန်းများကို အကောင်အထည်ဖော်ဆောင်ရွက်ခြင်း ဖြစ်ပါကြောင်း၊ ယနေ့ အခမ်းအနားကျင်းပလျက်ရှိသည့် ရှမ်းပြည်နယ်၊ တိုင်းရင်းသားရေးရာနှင့် သက်မွေးပညာသင်တန်းစင်တာကို မဲခေါင်-လန်ချန်းပူးပေါင်းဆောင်ရွက်မှု အထူးရန်ပုံငွေနှင့် နိုင်ငံတော်၏ ဘဏ္ဍာရန်ပုံငွေဖြင့် တည်ဆောက်ခဲ့ခြင်းဖြစ်ပါကြောင်း၊ သင်တန်းစင်တာတွင် တိုင်းရင်းသားများ၏ စကား၊ စာပေ၊ အနုပညာနှင့် ယဉ်ကျေးမှုများ ဆွေးနွေးဖလှယ်ခြင်း၊ တိုင်းရင်းသားအချင်းချင်း ချစ်ကြည်ရင်းနှီးမှုရရှိစေရန် ဆောင်ရွက်ခြင်း၊ တိုင်းရင်းသားများ၏ အသိပညာများ မြှင့်တင်ပေးခြင်း၊ မျှဝေခြင်းစသည့် တိုင်းရင်းသား စည်းလုံးညီညွတ်ရေးကို ဆောင်ရွက်နိုင်ရန်နှင့် ရှမ်းပြည်နယ်အတွင်းရှိ တိုင်းရင်းသားများအားလုံး လူမှုဘဝဖွံ့ဖြိုးတိုးတက်စေရေးအတွက် အထောက်အကူပြုဖြစ်စေမည့် အသက်မွေး ဝမ်းကျောင်းပညာသင်တန်းများ၊ တိုင်းရင်းသားရိုးရာလက်မှုပညာ သင်တန်းများ စသည် တို့ကို ဆောင်ရွက်နိုင်ရန် ရည်ရွယ်ချက်များဖြင့် တည်ဆောက်ခဲ့ခြင်းဖြစ်ပါကြောင်း၊ နိုင်ငံတော်အနေဖြင့် တိုင်းရင်းသားပြည်သူများအားလုံး၏ ဖွံ့ဖြိုးတိုးတက်ရေး၊ တိုင်းပြည်သာယာဝပြောရေး၊ စားရေရိက္ခာဖူလုံရေးနှင့် ဘက်စုံဖွံ့ဖြိုးတိုးတက်ရေးအတွက် ဦးတည်ဆောင်ရွက်လျက်ရှိပါကြောင်း၊ တိုင်းရင်းသားများ၏ စကား၊ စာပေ၊ အနုပညာနှင့် ယဉ်ကျေးမှု၊ ရိုးရာဓလေ့ထုံးတမ်း၊ အမျိုးသားရေးစရိုက်လက္ခဏာနှင့် သမိုင်းအမွေအနှစ်တို့ကို ထိန်းသိမ်းစောင့်ရှောက်ရန်၊ ဖွံ့ဖြိုးတိုးတက်စေရန်နှင့်  မြှင့်တင်နိုင်ရန် ဆောင်ရွက်ပေးလျက် ရှိပါကြောင်း၊  တိုင်းရင်းသားများ၏ အသိပညာ၊ အတတ်ပညာများ၊ အသက်မွေးဝမ်းကျောင်း ပညာများ မြင့်မားတိုးတက်လာမှသာ  နိုင်ငံတော်က   ဦးတည်ဆောင်ရွက်လျက်ရှိသော  MSME    စက်မှုလုပ်ငန်းများ    အားပေးဆောင်ရွက်ခြင်းကဏ္ဍကိုလည်း ပိုမိုမြှင့်တင်နိုင်မှာဖြစ်မည်ကို ပြောကြားလိုပါကြောင်း၊ ထို့အပြင် တိုင်းရင်းသားပြည်သူတစ်ရပ်လုံးနှင့် အကျုံးဝင်သော စိုက်ပျိုးရေးကိုအခြေခံသည့် ကုန်ထုတ်လုပ်ငန်းများကို မြှင့်တင်၍ နိုင်ငံ့စီးပွားမြင့်မားရေးနှင့် ပြည်သူတစ်ရပ်လုံး၏ လူမှုစီးပွားဘဝ မြင့်မားစေရေးတို့ကို လုပ်ငန်းစဉ်ချမှတ်၍ ဆောင်ရွက် လျက်ရှိကြောင်းကိုလည်း ပြောကြားလိုပါကြောင်း၊ နိဂုံးချုပ်အနေဖြင့် မဲခေါင်-လန်ချန်း ပူးပေါင်းဆောင်ရွက်မှု အထူးရန်ပုံငွေနှင့် နိုင်ငံတော်၏ဘဏ္ဍာရန်ပုံငွေဖြင့် တည်ဆောက် ပြီးစီးခဲ့သည့် တိုင်းရင်းသားရေးရာနှင့် သက်မွေးပညာသင်တန်းစင်တာတွင် ဆောင်ရွက်မည့် လုပ်ငန်းများ၏  ရည်ရွယ်ချက်ပါအတိုင်း   အကောင်အထည်ဖော်ဆောင်ရွက်ရန်လိုအပ် ပါကြောင်း၊ တိုင်းရင်းသားလူမျိုးအချင်းချင်း စည်းလုံးညီညွတ်ရေး၊ ချစ်ကြည်ရင်းနှီးရေးတို့အပြင် လူမှုစီးပွားဘဝမြှင့်တင်ရေးအတွက် အထောက်အကူပြုသည့် အသက်မွေးဝမ်းကျောင်း ပညာ ရပ်များ၊ တိုင်းရင်းသားရိုးရာလက်မှုအတတ်ပညာများကို စနစ်တကျ မျှဝေသင်ယူ တတ်မြောက်အောင်ဆောင်ရွက်ကြရန် တိုက်တွန်းပြောကြားလိုပါကြောင်း၊ တိုင်းရင်းသားများ၏ ဖွံ့ဖြိုးတိုးတက်ရေးသည် နိုင်ငံတော်၏ ဖွံ့ဖြိုးတိုးတက်ရေးပင်ဖြစ်သည့်အတွက် သက်ဆိုင်ရာ တာဝန်ရှိသူများအားလုံးနှင့် တိုင်းရင်းသားပြည်သူများအားလုံးက ပူးပေါင်းဆောင်ရွက်ကြရန်လိုအပ်ပါကြောင်း ပြောကြားခဲ့ပါသည်။ ဆက်လက်ပြီး တိုင်းရင်းသားလူမျိုးများရေးရာဝန်ကြီးဌာန၊ ပြည်ထောင်စုဝန်ကြီး Jeng Phang နော်တောင်က နှုတ်ခွန်းဆက်စကားပြောကြားရာတွင် ရှမ်းပြည်နယ် တိုင်းရင်းသား ရေးရာနှင့်သက်မွေးပညာသင်တန်းစင်တာ၏ ပင်မ (၂) ထပ်အဆောက်အဦ၊ အလုပ်ရုံ၊ ထမင်းစားဆောင်၊ သင်ထောက်ကူပစ္စည်းများနှင့် ပရိဘောဂစသည်များကို မဲခေါင်-လန်ချန်း ပူးပေါင်းဆောင်ရွက်မှု အထူးရန်ပုံငွေ  ကျပ်သန်းပေါင်း ၁၅၅၃.၂၄၃ (အမေရိကန်ဒေါ်လာ ၇၄၁,၈၀၀) အထောက်အပံ့ဖြင့်လည်းကောင်း၊ သင်တန်းသားများ ပိုမိုလက်ခံနိုင်ရေးအတွက် သင်တန်းစင်တာ၏ ဒုတိယထပ်နှင့် တတိယထပ်ကို နိုင်ငံတော်ဘဏ္ဍာရန်ပုံငွေ ကျပ်သန်း ပေါင်း ၇၈၅.၇၃၅ ဖြင့် လည်းကောင်း အကောင်အထည်ဖော်ဆောင်ခဲ့ခြင်းဖြစ်ပြီး စနစ်တကျ တင်ဒါစည်းမျဉ်းများနှင့်အညီ အောင်မြင်ခဲ့သည့် မိုးယံဝင့်ချီကုမ္ပဏီလိမိတက်က တာဝန်ယူ တည်ဆောက်ခဲ့ခြင်း ဖြစ်ပါကြောင်း၊ ထပ်တိုးသည့် သင်တန်းသားများအတွက် လိုအပ်နေ သေးသည့် သင်ထောက်ကူပစ္စည်းများနှင့် ပရိဘောဂများကိုလည်း ဆက်လက်ဖြည့်တင်း သွားမည် ဖြစ်ပါကြောင်း၊ မိမိတို့ဝန်ကြီးဌာနသည် တိုင်းရင်းသားလူမျိုးများ၏ လူမှုစီးပွားရေး ဖွံ့ဖြိုးတိုးတက်စေရေး ဆောင်ရွက်လျက်ရှိပြီး တိုင်းဒေသကြီး/ပြည်နယ်အလိုက် တိုင်းရင်းသား ဒေသများတွင် လိုအပ်လျက်ရှိသည့် အသက်မွေးဝမ်းကျောင်းပညာ သင်တန်းများကို ဖွင့်လှစ် ပို့ချပေးလျက်ရှိပါကြောင်း၊ ယခုရှမ်းပြည်နယ်တွင် စင်တာအဆောက်အအုံကို တရားဝင်ဖွင့်လှစ်နိုင်ပြီဖြစ်သည့်အတွက် တိုင်းရင်းသားလူငယ်များအတွက် ကွန်ပျူတာသင်တန်း၊ မော်တော်ဆိုင်ကယ်စက်ပြင် သင်တန်းနှင့် ဒေသနှင့်ကိုက်ညီသင့်မြတ်လျော်ကန်မည့် သက်မွေးပညာ ကာလတို သင်တန်းများကို နှစ်စဉ်ဖွင့်လှစ်ပို့ချပေးသွားမည်ဖြစ်ပါကြောင်း၊ သက်မွေးပညာကာလတိုသင်တန်းများ ဖွင့်လှစ်ပို့ချရန်အတွက် လိုအပ်သည့် ဘဏ္ဍာငွေကို တိုင်းရင်းသားလူမျိုးများရေးရာဝန်ကြီးဌာန၏ ပြည်ထောင်စုဘတ်ဂျက်ထဲတွင် ထည့်သွင်းရေးဆွဲထားပြီးဖြစ်သလို ရှမ်းပြည်နယ်အစိုးရအဖွဲ့၏ ဘတ်ဂျက်မှာလည်း ထည့်သွင်းရေးဆွဲပြီး ပံ့ပိုးကူညီပေးစေလိုပါကြောင်း၊ ထို့အပြင် နည်းပညာအကူအညီ၊ သင်တန်းနည်းပြစသည် များကိုလည်း သက်ဆိုင်ရာဝန်ကြီးဌာနများနှင့် ညှိနှိုင်းပြီး ဆောင်ရွက်သွားမည်ဖြစ်ပါကြောင်း၊  ယနေ့ဖွင့်လှစ်သည့် ရှမ်းပြည်နယ် တိုင်းရင်းသားရေးရာနှင့် သက်မွေးပညာစင်တာ အဆောက်အအုံသည် ရှမ်းပြည်နယ်အတွင်း နေထိုင်ကြသည့် တိုင်းရင်းသားများ၏ လူမှုဘဝဖွံ့ဖြိုးတိုးတက်ရေး၊ ပြည်ထောင်စုစိတ်ဓါတ် ခိုင်မြဲရေး၊ စည်းလုံးညီညွတ်ရေး၊ ချစ်ကြည်ရင်းနှီးရေးတို့အတွက် အဓိကအရေးကြီးတဲ့ အခြေခံအဆောက်အအုံတစ်ခု ဖြစ်တာကြောင့်  သက်တမ်းကာလပြည့်မီရေးနှင့်ကြံ့ခိုင်ရေးကို ဝိုင်းဝန်းထိန်းသိမ်းဆောင်ရွက်ပေးကြရန်နှင့် သက်မွေးပညာကာလတိုသင်တန်းများ ဖွင့်လှစ်သည့်အခါတွင်လည်း ဆက်လက်ဝိုင်းဝန်းပံ့ပိုးပေးကြပါရန် ပြောကြားလိုပါကြောင်းဖြင့် ပြောကြားခဲ့ပါသည်။ ယင်းနောက် ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးအောင်အောင်နှင့် မြန်မာနိုင်ငံဆိုင်ရာ တရုတ်နိုင်ငံ သံမှူးကြီး ဒေါက်တာ ကျန်းကျိဟုန်တို့က အမှာစကား ပြောကြားကြပြီး တိုင်းရင်းသားလူမျိုးများရေးရာဝန်ကြီးဌာန၊ ဒုတိယဝန်ကြီး ဦးဇော်အေးမောင်က ကျေးဇူးတင်စကားပြောကြားခဲ့ပါသည်။ ထို့နောက် ပြည်ထောင်စုဝန်ကြီး Jeng Phang နော်တောင်က ဧည့်သည်တော်များအား သင်တန်းစင်တာဖွင့်ပွဲအထိမ်းအမှတ် တံဆိပ်များပေးအပ်ကာ စင်တာအဆောက်အအုံကို တာဝန်ယူ တည်ဆောက်ပြီးစီးခဲ့သည့် မိုးယံဝင့်ချီကုမ္ပဏီလီမိတက်မှ အကြံပေးအင်ဂျင်နီယာ ဦးဘငြိမ်းက တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာန ညွှန်ကြားရေးမှူးချုပ် ဦးမင်းအေးကိုထံ စင်တာအဆောက်အဦဆိုင်ရာ အချက်အလက်များကို လွှဲပြောင်းပေးအပ်ခဲ့ပါသည်။ ယင်းနောက် နိုင်ငံတော်စီမံအုပ်ချုပ်ရေးကောင်စီအဖွဲ့ဝင်များ၊ ပြည်ထောင်စုဝန်ကြီးများနှင့် ဧည့်သည်တော်များသည် သင်တန်းစင်တာ ပင်မလေးထပ်ဆောင် အဆောက်အအုံအတွင်းရှိ သင်တန်းသူ သင်တန်းသားအိပ်ဆောင်များ၊ စာသင်ခန်းများ၊ အလုပ်ရုံများနှင့် ထမင်းစားဆောင်တို့အား လှည့်လည်ကြည့်ရှုကြပြီး (၅-၂-၂၀၂၄) ရက်နေ့မှ (၅-၃-၂၀၂၄) ရက်နေ့အထိ ကာလတိုတစ်လတာသင်တန်းဖွင့်လှစ်ပေးနေသည့် မော်တော်ဆိုင်ကယ်စက်ပြင်သင်တန်းမှ နည်းပြများနှင့် သင်တန်းသားများအား နိုင်ငံတော်စီမံအုပ်ချုပ်ရေးကောင်စီအဖွဲ့ဝင် ဒေါက်တာ ဘရွှေ၊ ခွန်စံလွင်နှင့် ပြည်ထောင်စုဝန်ကြီး Jeng Phang နော်တောင်တို့က  ရင်းရင်းနှီးနှီးတွေ့ဆုံလမ်းညွှန်အမှာစကားပြောကြားကြပြီး လိုအပ်သည်များကို ဖြည့်ဆည်း ဆောင်ရွက်ပေးခဲ့ကြကြောင်းသိရှိရပါသည်။

• 07 February 2024
• ကချင်ပြည်နယ်၊ မြစ်ကြီးနား

တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာန၊  ကချင်ပြည်နယ် ညွှန်ကြားရေးမှူးရုံးမှ ဦးစီး၍ “တန်ဖိုးမြှင့်စားသောက်ကုန်ထုတ်လုပ်မှုနည်းပညာသင်တန်း” ဆင်းပွဲ အခမ်းအနားကို (၇-၂-၂၀၂၄) ရက်နေ့တွင်  မြစ်ကြီးနားမြို့၊ ရန်ကြီးအောင်ရပ်ကွက်ရှိ ပြည်နယ် အသေးစားစက်မှုလက်မှုလုပ်ငန်းဦးစီးဌာန၊ သင်တန်းခန်းမတွင် ကျင်းပပြုလုပ်ခဲ့ပါသည်။ အခမ်းအနားတွင် ကချင်ပြည်နယ်အစိုးရအဖွဲ့၊ ဝန်ကြီးချုပ် ဦးခက်ထိန်နန်က အဖွင့်အမှာ စကားပြောကြားခဲ့ပါသည်။  ထို့နောက် ပထမဆုရရှိသည့်  သင်တန်းသူအား ကချင်ပြည်နယ် အစိုးရ အဖွဲ့၊ စီးပွားရေးရာဝန်ကြီး ဦးမျိုးဆွေ က လည်းကောင်း၊ ဒုတိယဆုရရှိသည့်  သင်တန်းသူအား သယံဇာတရေးရာဝန်ကြီး ဦးတိန့်ဆောင် က လည်းကောင်း၊ တတိယဆုရရှိသည့်  သင်တန်းသူအား လမ်းပန်းဆက်သွယ်ရေးဝန်ကြီး ရဲမှူးကြီးကျော်ထွန်းက လည်းကောင်း ဆုအသီသီး ချီးမြင့်ခဲ့ကြပါ သည်။  ဆက်လက်၍  တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာန ညွှန်ကြား ရေးမှူး ဦးရန်နိုင်လွင်က သင်တန်းသား၊ သင်တန်းသူများအား သင်တန်းထွက်ကုန်များပေးအပ်ခဲ့ပြီး၊ ပြည်နယ် အသေးစားစက်မှုလက်မှုလုပ်ငန်းဦးစီးဌာန ညွှန်ကြားရေးမှူး ဦးမောင်မောင်စိုးက သင်တန်းသား / သင်တန်းသူ  (၂၀) ဦး ကိုယ်စား သင်တန်းသူတစ်ဦးအား သင်တန်းဆင်း လက်မှတ်များကို ပေးအပ်ခဲ့ပါသည်။  ထို့နောက် သင်တန်းတက်ရောက်ခဲ့ကြသည့် သင်တန်းဆင်း သင်တန်းသား / သင်တန်းသူ များ  ကိုယ်စား သင်တန်းသူတစ်ဦးက  ကျေးဇူးတင်စကားပြောကြားခဲ့ပါသည်။ အခမ်းအနားသို့  ဖိတ်ကြားထားသော ဧည့်သည်တော်များ၊  ပြည်နယ်နှင့် ခရိုင်အဆင့် ဌာနဆိုင်ရာများ၊ သင်တန်း သား/ သင်တန်းသူများ တက်ရောက်ခဲ့ပါသည်။ “တန်ဖိုးမြှင့်စားသောက်ကုန်ထုတ်လုပ်မှုနည်း ပညာသင်တန်း” ကို  (၁-၂-၂၀၂၄) ရက်နေ့မှ (၇-၂-၂၀၂၄) ရက်နေ့အထိ ဖွင့်လှစ်သင်ကြားခဲ့ပြီး တိုင်းရင်းသားမျိုးနွယ်စု (၁၂) စု တို့မှ သင်တန်းသား/ သင်တန်းသူ (၂၀) ဦး  တက်ရောက်ခဲ့ကြကြောင်း သတင်းရရှိပါသည်။ 

• 05 February 2024
• ရှမ်းပြည်နယ်

မဲခေါင်လန်ချန်ပူးပေါင်းဆောင်ရွက်ရေးအစီအစဉ်ရန်ပုံငွေနှင့် နိုင်ငံတော်ဘဏ္ဍာရန်ပုံငွေတို့ဖြင့် တောင်ကြီးမြိုနယ်၊အေးသာယာမြို၌ တည်ဆောက်ခဲ့သည့် ရှမ်းပြည်နယ်တိုင်းရင်းသားရေးရာနှင့် သက်မွေးဝမ်းကျောင်း သင်တန်းစင်တာတွင် အန္တရာယ်ကင်းပရိတ်တရားတော် နာယူခြင်းကို ယနေ့နံနက်တွင်ကျင်းပရာ ရှမ်းပြည်နယ်တိုင်းရင်း သားရေးရာဝန်ကြီး ဦးအောင်ကြည်ဝင်း၊ ညွှန်ကြားရေးမှူးချုပ် ဦးမင်းအေးကိုနှင့် အရာထမ်း၊ အမှုထမ်းများ တက်ရောက်ကြည်ညိုခဲ့ကြပါသည်။ ရှေးဦးစွာ အေးသာယာမြို့နောင်အင်ပရိယတ္တိစာသင်တိုက် ဦးစီးနာယက ဆရာတော် ဘဒ္ဒန္တဗုဒ္ဓဃောသနှင့် သံဃာတော်များက စင်တာ၌ ကိုးကွယ်မည့် ဗုဒ္ဓဆင်းတုတော်အား ဗုဒ္ဓဘိသေကအနေကဇာတင်တော်မူပြီး ပရိတ်တရားတော်ကိုရွတ်ပွားသရာဇ္ဈာယ်ကြပါသည်။ ယင်းနောက် တိုင်းရင်းသားရေးရာဝန်ကြီးနှင့် တာဝန်ရှိသူများက လှူဖွယ် ဝတ္ထုပစ္စည်းများကို ဆက်ကပ်လှူဒါန်းကာ ရေစက်သွန်းချအမျှဝေခဲ့ကြပါသည်။ ထို့နောက်ဆရာတော်များက အန္တရာယ်ကင်းကမ္မဝါစာများကို ရွတ်ဖတ်ကြပြီး သံဃာတော်များအား နေ့ဆွမ်းကိုဆက်ကပ်လှူဒါန်းခဲ့ကြပါသည်။ အဆိုပါစင်တာကို ၇၇ နှစ်မြောက် ရှမ်းပြည်နယ်နေ့ကို ဂုဏ်ပြုကြိုဆိုသည့်အနေဖြင့် ဖွင့်လှစ်နိုင်ရေး ဆောင်ရွက်လျက်ရှိပါသည်။

• 02 February 2024
• ကရင်ပြည်နယ်၊ ဘားအံ

        တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာန၊ ကရင်ပြည်နယ် ညွှန်ကြားရေးမှူးရုံးမှ ဦးစီး၍ "တိုင်းရင်းသားအခွင့်အရေးဆိုင်ရာ အသိပညာပေး ဟောပြောခြင်း နှင့်ရပ်ရွာအခြေပြု အသက်မွေးဝမ်းကျောင်းပညာလိုအပ်ချက်တို့ကို ဆန်းစစ်စီမံခြင်းအစီအစဉ် နှင့် ဗလငါးတန်ဖွံ့ဖြိုးစေရေး လူငယ်ရေးရာ အသိ ပညာပေးခြင်း အခမ်းအနား"ကို ၂၅-၁-၂၀၂၄ ရက်နေ့တွင်  ကရင်ပြည်နယ်၊ ဘားအံမြို့နယ်၊ ဇာသပြင် အရှေ့ကျေးရွာနှင့် အနောက်ကျေးရွာ နှစ်ရွာပေါင်း၍ အ.ထ.က (ဇာသပြင်)၌ ကျင်းပပြုလုပ်ခဲ့ပါသည်။ အခမ်းအနားတွင် တိုင်းရင်းသားရေးရာဝန်ကြီး ဦးစန်းကိုက ဇာသပြင်ကျေးရွာရှိ မွန်တိုင်းရင်းသားဒေသခံများအနေဖြင့် တိုင်းရင်းသားလူမျိုးများ၏ အခွင့်အရေးကာကွယ် စောင့်ရှောက်သည့် ဥပဒေ၊ နည်းဥပဒေများအား သိရှိနိုင်ရန်နှင့် ရပ်ရွာအခြေပြု အသက်မွေးဝမ်း ကျောင်းပညာလိုအပ်ချက်တို့ကို သိရှိနိုင်ရန်အတွက် စစ်တမ်းကောက်ယူရခြင်းဖြစ်ကြောင်း စသည် ဖြင့် အဖွင့်အမှာစကား ပြောကြားခဲ့ပြီး တိုင်းရင်းသားအခွင့်အရေးများကာကွယ်စောင့်ရှောက်ရေး ဦးစီးဌာနမှ ဒုတိယညွှန်ကြားရေးမှူး ဦးကျော်စိုးက တိုင်းရင်းသားလူမျိုးများ၏အခွင့်အရေး ကာကွယ်စောင့်ရှောက်သည့် ဥပဒဒေ၊ နည်းဥပဒေများအား အကျယ်တဝင့် ရှင်းလင်း ပြောကြားခဲ့ ပါသည်။ထို့နောက် ပတ်ဝန်းကျင်ထိန်းသိမ်းရေးဦးစီးဌာန၊ လက်ထောက်ညွှန်ကြားရေးမှူး ဦးကျော်ဆန်းက ပတ်ဝန်းကျင်စီမံခန့်ခွဲမှုနှင့် ရာသီဥတုပြောင်းလဲမှုဆိုင်ရာ ကိစ္စရပ်များအား ပတ်ဝန်းကျင်နှင့် လူငယ်ခေါင်းစဉ်ဖြင့် လည်းကောင်း၊  လူမှုဝန်ထမ်းဦးစီးဌာနမှ ဦးစီးအရာရှိ ဒေါ်စောဥမ္မာက ကလေးအလုပ်သမား ပပျောက်ရေးဆိုင်ရာ ကိစ္စရပ်များနှင့် ကလေးသူငယ် အခွင့်အရေးဆိုင်ရာ ကိစ္စရပ်များအား လည်းကောင်း၊ မြို့နယ်စီမံအုပ်ချုပ်ရေးကောင်စီအဖွဲ့ဝင် (၂) ဦးဝင်းတင်က ကျောင်းသား၊ ကျောင်းသူများ၏ ပညာရေးဆိုင်ရာကိစ္စရပ်များနှင့် ဗလငါးတန်  ဖွံ့ဖြိုးရေးဆိုင်ရာကိစ္စရပ်များ၊ ပညာရေးနှင့် လူငယ်ခေါင်းစဉ်စသည်ဖြင့် ကျောင်းသား၊ ကျောင်းသူ များနှင့် အပြန် အလှန်ဆွေးနွေးခဲ့ကြပြီး  တိုင်းရင်းသားစာပေနှင့် ယဉ်ကျေးမှုဦးစီးဌာန၊ ကရင် ပြည်နယ်၊ ညွှန်ကြားရေးမှူးရုံးမှ ဦးစီးအရာရှိ ဒေါ်မြတ်သီရိအောင်က တိုင်းရင်းသားဘာသာသင် ဆရာ၊ ဆရာမ Teaching Assistant (TA)နှင့် Language Teacher (LT) များခန့်အပ်ထားမှု ကိစ္စများ၊ ဦးစီးဌာန၏ ဆောင်ရွက်နေမှု အခြေအနေများအား ရှင်းလင်းပြောကြားခဲ့ပါသည်။  ဆက်လက်၍ တက်ရောက်လာကြသော ကျောင်းသား၊ ကျောင်းသူများအား အသိပညာ ဗဟုသုတများတိုးပွားစေပြီး ဗလငါးတန်နှင့် ပြည့်စုံစေရန် ဒေသန္တရမေးခွန်းများကို ဒုတိယ ညွှန်ကြားရေးမှူး ဦးကျော်စိုးက မေးမြန်းခဲ့ပြီး ဖြေဆိုနိုင်သူများအားဆု လက်ဆောင်ပစ္စည်းများပေးအပ်ခဲ့ပြီး တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာန၊ ကရင်ပြည်နယ်၊ ညွှန်ကြားရေးမှူးရုံးမှ အကြီးတန်းစာရေး ဦးအောင်ဖြိုးသော်က ရပ်ရွာအခြေပြုအသက်မွေးဝမ်း ကျောင်းပညာလိုအပ်ချက်တို့ကို ဆန်းစစ်စီမံခြင်း စစ်တမ်းကောက်ယူရခြင်း ရည်ရွယ်ချက်နှင့် စစ်တမ်းဖြေဆိုပုံမေးခွန်းများကို ရှင်းလင်းပြောကြားခဲ့ပါသည်။ ဆက်လက်၍ ရပ်ရွာအခြေပြု အသက်မွေးဝမ်းကျောင်းပညာလိုအပ်ချက်စစ်တမ်းကို ကောက်ယူခဲ့ရာ တက်ရောက်လာကြသော ဒေသခံတိုင်းရင်းသား (၁၅၀) ဦးဖြေဆိုခဲ့ကြပါသည်။ အခမ်းအနားသို့ ဇာသပြင်အရှေ့ကျေးရွာနှင့် အနောက်ကျေးရွာမှ အုပ်ချုပ်ရေးမှူးများ၊ ကျေးရွာသူ၊ ကျေးရွာသားများ၊ ကျောင်းအုပ်ဆရာမကြီးနှင့် ဆရာ၊ ဆရာမများ၊ကျောင်းသား၊ ကျောင်းသူများ၊  ပြည်နယ်မွန်စာပေနှင့်ယဉ်ကျေးမှုအသင်းအဖွဲ့များမှ အဖွဲ့ဝင်များ၊ ဖိတ်ကြားထားသူများ တက်ရောက်ခဲ့ကြောင်းသိရှိရပါသည်။

• 02 February 2024
• ဧရာဝတီတိုင်းဒေသကြီး

         တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာန၊ ဧရာဝတီတိုင်းဒေသကြီး၊ ညွှန်ကြားရေးမှူးရုံးမှဦးစီး၍ “တိုင်းရင်းသားအခွင့်အရေးဆိုင်ရာ အသိပညာပေးဟောပြောခြင်းနှင့် ရပ်ရွာအခြေပြု အသက်မွေးဝမ်းကျောင်းပညာလိုအပ်ချက်တို့ကို ဆန်းစစ်စီမံခြင်းအစီအစဉ်”ကို (၂၄-၁-၂၀၂၄) ရက်နေ့တွင် ဧရာဝတီ တိုင်းဒေသကြီး၊ ပုသိမ်မြို့နယ်၊ ရွှေသောင်ယံမြို့၊ အုန်းချောင်းကျေးရွာ၊ ကရင်နှစ်ခြင်းခရစ်ယာန်အသင်းတော်ခန်းမ၌ ကျင်းပပြုလုပ်ခဲ့ပါသည်။ အခမ်းအနားတွင် တိုင်းဒေသကြီးအစိုးရအဖွဲ့ဝင် တိုင်းရင်းသားရေးရာဝန်ကြီး ဦးစောလင်းခယ် က အဖွင့်အမှာစကားပြောကြားခဲ့ပြီး ရွှေသောင်ယံမြို့အုပ်ချုပ်ရေးမှူး ဦးသိန်းထိုက်က မိတ်ဆက်စကားပြောကြားခဲ့ပါသည်။ ဆက်လက်၍ လူမှုဝန်ထမ်းဦးစီးဌာန၊တိုင်းဦးစီးမှူးဒေါ်မြမာလာစိုးကကိုယ်ဝန်ဆောင်မိခင်များအခွင့်အရေး၊ အမျိုးသမီးအခွင့်အရေး၊ ကလေးသူငယ်အခွင့်အရေး၊ မသန်စွမ်းအခွင့်အရေးများနှင့် လူမှုရေးပင်စင်စသည့် အကြောင်းအရာများ ကိုလည်းကောင်း၊ တိုင်းရင်းသားအခွင့် အရေးများကာကွယ်စောင့်ရှောက်ရေးဦးစီးဌာန၊ ဧရာဝတီတိုင်းဒေသကြီး၊ ညွှန်ကြားရေးမှူးရုံးမှ ဒုတိယညွှန်ကြားရေးမှူး ဒေါ်စန်းက ဝန်ကြီးဌာနပေါ်ပေါက်လာပုံ၊ တိုင်းရင်းသားလူမျိုးများ၏အခွင့်အရေးကာကွယ်စောင့်ရှောက်သည့် ဥပဒေ၊ နည်းဥပဒေများ အကြောင်းနှင့် စစ်တမ်းကောက်ယူရသည့် ရည်ရွယ်ချက်များကိုလည်း ကောင်း၊ တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာန၊ ဧရာဝတီတိုင်းဒေသကြီး၊ ညွှန်ကြားရေးမှူးရုံးမှ ဦးစီးအရာရှိ ဦးမြင့်မောင်မောင်က နိုင်ငံ သားအခွင့်အရေး၊ တိုင်းရင်းသားများ၏ ဝိသေသ ရှေ့ဆောင်စကားလုံးများမှန်ကန်စွာ ရေးသွင်းဆောင်ရွက်နိုင်ရေး၊ အမုန်းစကားနှင့် အကြမ်းဖက်မှု ဖြစ်စေရန် လှုံ့ဆော်မှုကို တားဆီးရေးဆိုင်ရာကိစ္စရပ်များ၊ လူမျိုးပြုန်းတီးမှုတားဆီးရေးနှင့် ပြစ်ဒဏ်ပေးရေး နိုင်ငံတကာသဘောတူစာချုပ်ပါ လိုက်နာဆောင်ရွက်ရန် အချက်များကိုလည်း ကောင်း၊ စိုက်ပျိုးရေးဦးစီးဌာန၊ ရွှေသောင်ယံမြို့ဦးစီးမှူး ဦးတင်ဝင်းက စပါးတစ်ဧက(၁၀)တင်း နှုန်း ပိုမိုအထွက်တိုးစေရေး လုပ်ဆောင်ရမည့် နည်းလမ်းများ၊ မိုးစပါးစိုက်ပျိုးရေးနှင့် ဆီထွက် သီးနှံစိုက်ပျိုးရေးဆိုင်ရာကိစ္စရပ်များကိုလည်းကောင်း အသိပညာပေး ရှင်းလင်းပြောကြားခဲ့ပါသည်။  ထို့နောက် ရပ်ရွာအခြေပြု အသက်မွေးဝမ်းကျောင်းပညာလိုအပ်ချက်စစ်တမ်းကို ကောက်ယူခဲ့ရာ ဒေသခံတိုင်းရင်းသား (၇၁) ဦး ဖြေဆိုခဲ့ကြပြီး တက်ရောက်လာကြသူများအား တိုင်းရင်း သားလူမျိုးများ၏အခွင့်အရေးများကာကွယ်စောင့်ရှောက်သည့် ဥပဒေ၊ နည်းဥပဒေစာအုပ်များ၊ လက်ကမ်းစာစောင်များနှင့် အမှတ်တရလက် ဆောင်ပစ္စည်းများ ပေးအပ်ခဲ့ပြီးနောက် အခမ်းအနားကို ရုတ်သိမ်းခဲ့ပါသည်။ အခမ်းအနားသို့ မြို့နယ်ကရင်စာပေနှင့် ယဉ်ကျေးမှုကော်မတီဝင် များ၊ ဖိတ်ကြားထားသော ဧည့်သည်တော်များ တက်ရောက်ခဲ့ကြပါသည်။

• 31 January 2024
• နေပြည်တော်

  နယ်စပ်ဒေသနှင့်တိုင်းရင်းသားလူမျိုးများ၏ ဖွံ့ဖြိုးတိုးတက်မှုအကောင်အထည်ဖော်ရေး လုပ်ငန်းကော်မတီ၊ သာသနာရေးနှင့်ယဉ်ကျေးမှုဆိုင်ရာ လုပ်ငန်းဆပ် ကော် မတီ၏လုပ်ငန်းညှိနှိုင်း အစည်းအဝေးအမှတ်စဉ် (၁/၂၀၂၄) ကို (၃၀-၁-၂၀၂၄) ရက်နေ့၊ နေ့လည် (၁၃:၀၀) နာရီတွင် တိုင်းရင်းသားလူမျိုးများရေးရာဝန်ကြီးဌာန၊ ပြည်ထောင်စုဝန်ကြီးရုံး အစည်းအဝေးခန်းမတွင် ကျင်းပ ပြုလုပ်ခဲ့ရာ တိုင်းဒေသကြီးနှင့်ပြည်နယ် ဒေသဆိုင်ရာ သာသနာရေးနှင့်ယဉ်ကျေးမှုဆပ်ကော်မတီ၊ ဥက္ကဋ္ဌများ၊ ဆပ်ကော်မတီဝင် ပြည်သူ့ဆက်ဆံရေးနှင့်စိတ်ဓာတ်စစ်ဆင်ရေးညွှန်ကြားရေးမှူးရုံး၊ စစ်သမိုင်းပြတိုက်နှင့်တပ်မတော်မော်ကွန်းတိုက်မှူးရုံး၊ နယ်စပ်ရေးရာဝန်ကြီးဌာန၊ ပညာရေးနှင့်လေ့ကျင့်ရေးဦးစီးဌာန၊ စီမံကိန်းနှင့်ဘဏ္ဍာရေးဝန်ကြီးဌာန၊ စီမံကိန်းရေးဆွဲရေးဦးစီးဌာန၊သာသနာရေးနှင့်ယဉ်ကျေးမှုဝန်ကြီးဌာန၊ရှေးဟောင်းသုတေသနနှင့်အမျိုးသားပြတိုက်ဦးစီးဌာန၊သာသနာရေးဦးစီးဌာန၊သာသနာတော်ထွန်းကားပြန့်ပွားရေးဦးစီးဌာန၊လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၊အမျိုးသား မှတ်ပုံတင်နှင့်နိုင်ငံသားဦးစီးဌာနနှင့် တိုင်းရင်းသားလူမျိုးများရေးရာဝန်ကြီးဌာန၊ တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာနတို့မှ တာဝန်ရှိသူများ တက်ရောက်ခဲ့ ကြပါသည်။  အစည်းအဝေးတွင် သာသနာရေးနှင့် ယဉ်ကျေးမှုဆိုင်ရာလုပ်ငန်းဆပ်ကော်မတီ ဥက္ကဋ္ဌ၊ တိုင်းရင်းသားလူမျိုးများရေးရာဝန်ကြီးဌာန ဒုတိယဝန်ကြီး ဦးဇော်အေးမောင်က အဖွင့်အမှာစကား ပြောကြားရာတွင်  ယဉ်ကျေးမှုနှင့်ဘာသာရေးသည် နိုင်ငံတစ်နိုင်ငံရဲ့ ဝိသေသလက္ခဏာကို သတ်မှတ် ဖော်ပြနိုင်တာဖြစ်တဲ့အတွက် မိမိတို့ရဲ့ ဒြပ်ရှိ၊ ဒြပ်မဲ့ယဉ်ကျေးမှု အမွေအနှစ်များကို ထိန်းသိမ်းစောင့် ရှောက်မြှင့်တင်ခြင်းနဲ့ ဘာသာ၊ သာသနာထွန်းကား ပြန့်ပွားစေခြင်းလုပ်ငန်းများဟာ အရေးပါပြီး မဖြစ် မနေ ဆောင်ရွက်ရမည့် လုပ်ငန်းများဖြစ်ပါကြောင်း၊ နိုင်ငံရဲ့တည်ငြိမ်မှု၊ ငြိမ်းချမ်းမှုနဲ့ စည်းလုံးညီညွတ်မှု တို့အတွက်လည်း ယဉ်ကျေးမှုနှင့်ဘာသာရေးက အဓိကဖော်ဆောင်ပေးနိုင်ပါကြောင်း၊ ရိုးရာယဉ်ကျေးမှု အမွေအနှစ်များကို ထိန်းသိမ်းမြှင့်တင်ပေးခြင်း၊ တိုင်းရင်းသားများရဲ့ ယုံကြည်ကိုးကွယ်ရာဘာသာများကို ထောက်ပံ့ကူညီပေးခြင်း၊ ဘာသာ၊ သာသနာပြန့်ပွားစေခြင်းတို့ဖြင့် တိုင်းရင်းသားလူငယ်များကို ဗလ ငါးတန်နဲ့ပြည်စုံတဲ့ လူငယ်များဖြစ်လာစေရေး ပျိုးထောင်ရာမှာ အထောက်အကူပြုမှာဖြစ်ပါကြောင်း၊ ဆပ်ကော်မတီဝင်ဌာနများအနေဖြင့် ၂၀၂၃-၂၀၂၄ ဘဏ္ဍာရေးနှစ်အတွင်း ဆောင်ရွက်ရန်ကျန်ရှိနေသေး သည့် လုပ်ငန်းများကို သတ်မှတ်ချိန်အတွင်းပြီးမြောက်စေရန်နှင့် ၂၀၂၄-၂၀၂၅ ဘဏ္ဍာရေးနှစ်အတွက် လျာထား လုပ်ငန်းစီမံကိန်းများကို အပြည့်အဝအကောင်အထည်ဖော်နိုင်ရန်အတွက် စနစ်တကျ အစီအမံများ ချမှတ်ဆောင်ရွက်သွားရန်တို့ကို ဆွေးနွေးမှာကြားခဲ့ပါသည်။ ထို့နောက် အစည်းအဝေးသို့ တက်ရောက်လာသည့် တိုင်းဒေသကြီးနှင့်ပြည်နယ် ဒေသဆိုင်ရာ သာသနာရေးနှင့်ယဉ်ကျေးမှုဆပ်ကော်မတီဥက္ကဋ္ဌများ၊ ဆပ်ကော်မတီဝင်ဌာနများက ၂၀၂၃-၂၀၂၄ ဘဏ္ဍာရေးနှစ်အတွင်း အကောင်အထည်ဖော် ဆောင်ရွက်ပြီးစီးသည့် လုပ်ငန်းများအခြေအနေနှင့်ဆက်လက်ဆောင်ရွက်မည့်လုပ်ငန်းများ၊ ၂၀၂၄-၂၀၂၅ ဘဏ္ဍာရေးနှစ်တွင်ဆောင်ရွက်ရန်လျာထားသည့်လုပ်ငန်းစီမံကိန်းများအား ရှင်းလင်းတင်ပြကြရာ ဒုတိယဝန်ကြီးက လိုအပ်သည်များကို အကြံပြုဆွေးနွေးခဲ့ကြောင်း သတင်းရရှိပါသည်။

• 30 January 2024
• ဧရာဝတီတိုင်းဒေသကြီး

ဧရာဝတီတိုင်းဒေသကြီး၊ ကရင်တိုင်းရင်းသားစာပေနှင့်ယဉ်ကျေးမှုအသင်းက ကြီးမှူး၍ ၂၀၂၃-၂၀၂၄ ဘဏ္ဍာရေးနှစ်၊ တိုင်းဒေသကြီးအစိုးရအဖွဲ့၏ ခွင့်ပြုရန်ပုံငွေဖြင့် ပုံနှိပ်ထုတ်ဝေသော သင်ကြားရေးအထောက်အကူပြုစာအုပ်များဖြစ်သည့် မြန်မာ-စကောကရင်-အနောက်ပိုးကရင် အဘိဓာန်၊ မြစ်ဝကျွန်းပေါ်ပိုးကရင်ရိုးရာပုံပြင်များ၊ စကောကရင်/ပိုးကရင်(KG)ပုံနှိပ်စာအုပ်များ ပေးအပ်ပွဲအခမ်းအနားကို ၂၀၂၄ ခုနှစ်၊ ဇန်နဝါရီလ (၂၇)ရက်နေ့က ကန်ကြီးထောင့်မြို့နယ်၊ ကရင်တိုင်းရင်းသားစာပေနှင့်ယဉ်ကျေးမှုအသင်းရုံး၌ ကျင်းပပြုလုပ်ခဲ့ရာ အခမ်းအနားသို့ တိုင်းဒေသကြီး တိုင်းရင်းသားရေးရာဝန်ကြီး ဦးစောလင်းခယ်၊ တိုင်းရင်းသားစာပေနှင့်ယဉ်ကျေးမှုဦးစီး ဌာနနှင့် တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာနတို့မှ တာဝန်ခံအရာရှိများ၊ ဝန်ထမ်းများ၊ မြို့နယ်ကရင်တိုင်းရင်းသားစာပေနှင့်ယဉ်ကျေးမှုအသင်း ဥက္ကဌများ၊ အတွင်းရေးမှူး များ တက်ရောက်ခဲ့ကြ ပါသည်။အခမ်းအနားကို ကရင်အမျိုးသားသီချင်းဖြင့်သီဆိုဖွင့်လှစ်ခဲ့ပြီး တိုင်းရင်းသားရေးရာဝန်ကြီး ဦးစောလင်းခယ်က အမှာစကားပြောကြား၍ ဦးစီးဌာန(၂)ခုမှ တာဝန်ခံအရာရှိများဖြစ်သည့် ဒုတိယ ညွှန်ကြားရေးမှူး ဒေါ်စန်းနှင့် လက်ထောက်ညွှန်ကြားရေးမှူး ဒေါ်အေးကျော့ရီတို့က ဌာန၏ လုပ်ငန်းများအား ရှင်းလင်းပြောကြားခဲ့ပါသည်။ ဆက်လက်၍ ဧရာဝတီတိုင်းဒေသကြီး ကရင် တိုင်းရင်းသားစာပေနှင့်ယဉ်ကျေးမှုအသင်းဥက္ကဌက စာအုပ်များပေးအပ်ပွဲကျင်းပခြင်းနှင့် စပ်လျဉ်း၍ ရှင်းလင်းပြောကြားခဲ့ပြီး မြို့နယ်ကရင်စာ/ယဉ်အသင်းဥက္ကဌများထံသို့ သင်ကြားရေး အထောက် အကူပြုစာအုပ်များအား ပေးအပ်ခဲ့ပါသည်။ထို့နောက် တက်ရောက်လာကြသည့် မြို့နယ်ကရင်စာ/ယဉ်အသင်းဥက္ကဌများ၏ ကိုယ်စား ပန်းတနော်မြို့နယ် ကရင်တိုင်းရင်းသားစာပေနှင့်ယဉ်ကျေးမှုအသင်းဥက္ကဌ မန်းဝင်းမောင်က ကျေးဇူး တင်စကားပြောကြားခဲ့ကြောင်း သတင်းရရှိပါသည်။

• 29 January 2024
• ကချင်၊ ဝိုင်းမော်မြို့

ပြည်နယ်အားကစားနှင့်ကာယပညာဦးစီးဌာန၊ပြည်နယ်တိုင်းရင်းသားစာပေနှင့်ယဉ်ကျေးမှုဦးစီးဌာန၊ ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ အခြေခံပညာ ဦးစီးဌာနနှင့် ကချင်ပြည်နယ် စာကြည့်တိုက်များ ဖောင်ဒေးရှင်းတို့ ပူးပေါင်း၍  လူငယ်ဗလငါးတန်ဖွံ့ဖြိုးရေးပွဲတော်ကို ဇန်နဝါရီ ၁၆ ရက် နံနက် ၁၀ နာရီက ဝိုင်းမော်မြို့၊ အမှတ်(၂)၊ အခြေခံပညာအထက်တန်းကျောင်း၌ ကျင်းပရာ ကချင်ပြည်နယ်အစိုးရအဖွဲ့၊ တိုင်းရင်းသားရေးရာဝန်ကြီး ဦးကျော်မင်းခိုင်၊ မြို့နယ်စီမံအုပ်ချုပ်ရေးကောင်စီအဖွဲ့ဝင် ဦးကြည်ထွန်း၊ ကချင်ပြည်နယ်စာကြည့်တိုက်များဖောင်ဒေးရှင်းနှင့် တာဝန်ရှိသူများက ဖဲကြိုုးဖြတ် ဖွင့်လှစ်ပေးကြသည်။  အခမ်းအနားကို အဆိုပါကျောင်းရှိ တေဇခန်းမ၌ ဆက်လက်ကျင်းပရာ ကချင်ပြည်နယ်အစိုးရအဖွဲ့၊ တိုင်းရင်းသားရေးရာဝန်ကြီးက အဖွင့်အမှာစကားပြောကြားပြီးအားကစားနှင့်ကာယပညာဦးစီး ဌာန၊ ပြည်နယ်ဦးစီးမှူး ဦးအောင်သူက လူငယ်ဗလငါးတန်ဖွံ့ဖြိုးရေးပွဲတော် ကျင်းပပြုလုပ်ရခြင်း၏ ရည်ရွယ်ချက်များကို ရှင်းလင်း ပြောကြားခဲ့ပါသည်။ ယင်းနောက် ကျောင်းသားကျောင်းသူများက တေးသရုပ်ဖော်အကများနှင့် တိုင်းရင်းသားရိုးရာ အကများဖြင့် ဖျော်ဖြေတင်ဆက်ကြပြီး စာစီစာကုံးပြိုင်ပွဲတွင် ဆုရရှိခဲ့ကြသော ကျောင်းသားကျောင်းသူများကို တိုင်းရင်းသားရေးရာဝန်ကြီး ဦးကျော်မင်းခိုင်နှင့် တာဝန်ရှိသူများက ဂုဏ်ပြုဆုနှင့် ဆုတံဆိပ်များကို လည်းကောင်း၊ ဖျော်ဖြေရေးအဖွဲ့နှင့် ဘင်ခရာအဖွဲ့များအတွက် ဂုဏ်ပြုချီးမြှင့်ငွေများကိုလည်းကောင်း ပေးအပ်ကြပါသည်။ တိုင်းရင်းသားရေးရာဝန်ကြီး ဦးကျော်မင်းခိုင်နှင့် တာဝန်ရှိသူများသည် ခင်းကျင်း ပြသထားသော ပြခန်းများ၊ အားကစားနည်းများနှင့် ပျော်ပွဲရွှင်ပွဲများကို လှည့်လည်ကြည့်ရှုခဲ့ကြပါသည်။ ထို့နောက် ပုံပြင်ပြောပြိုင်ပွဲ၊ကဗျာရွတ်ဆိုပြိုင်ပွဲနှင့်ကျပန်းစကားပြောပြိုင်ပွဲကိုဆက်လက်ကျင်းပကြရာဝိုင်းမော်မြို့ရှိအခြေခံပညာကျောင်းအသီးသီးမှကျောင်းသား ကျောင်းသူများ စုစုပေါင်း (၄၅)ဦးခန့် ပါဝင်ယှဉ်ပြိုင်ကြသည်။အဆိုပါပြိုင်ပွဲတွင် တိုင်းရင်းသားစာပေနှင့်ယဉ်ကျေးမှုဦးစီးဌာန၊ ပြည်နယ်တာဝန်ခံ ဒေါ်အိအိအေး နှင့် ဦးစီးအရာရှိ ဦးလှိုင်ဝင်းဟန်တို့က ကျပန်းစကားပြောပြိုင်ပွဲတွင်လည်းကောင်း၊ ဦးစီးအရာရှိ ဦးခင်မောင်ထွန်းက ပုံပြင်ပြောပြိုင်ပွဲတွင်လည်းကောင်း၊ ဒုတိယဦးစီးမှူး ဒေါ်အိအိမော်က ကဗျာရွတ်ဆို ပြိုင်ပွဲတွင်လည်းကောင်း အကဲ ဖြတ်ဒိုင်များအဖြစ် ဆောင်ရွက်ခဲ့ကြပါသည်။ယင်းနောက် ဆုများရရှိခဲ့ကြသော ပြိုင်ပွဲဝင်ကျောင်းသား၊ ကျောင်းသူများအား မြို့နယ်စီမံ အုပ်ချုပ်ရေးကောင်စီအဖွဲ့ဝင် ဦးကြည်ထွန်း၊ တိုင်းရင်းသားစာပေနှင့်ယဉ် ကျေးမှုဦးစီးဌာနမှ ပြည်နယ် တာဝန်ခံ ဒေါ်အိအိအေး၊ ဦးစီးအရာရှိများဖြစ်ကြသည့် ဦးခင်မောင်ထွန်းနှင့် ဦးလှိုင်ဝင်းဟန်၊ အထက(၂) ကျောင်းအုပ်ဆရာမကြီး ဒေါ်မိုးမိုးကြည်၊ ကချင်ပြည်နယ်စာကြည့်တိုက်များဖောင်ဒေးရှင်း ဥက္ကဋ္ဌ၊ စာရေးဆရာ အကြီးကိုကို(ကသာ)နှင့် တာဝန်ရှိသူများက ဆုများ အသီးသီးချီးမြှင့်ပေးအပ်ကြသည်။ 

• 29 January 2024
• ပဲခူးတိုင်းဒေသကြီး ၊ ပဲခူးမြို့

ပဲခူးတိုင်းဒေသကြီးအစိုးရအဖွဲ့၊ တိုင်းရင်းသားရေးရာဝန်ကြီးမှ  ကြီးမှူး၍ ပဲခူးမြို့နယ်ရှိ တိုင်းရင်းသားကျောင်းသား၊ ကျောင်းသူများအား ဗလငါးတန်နှင့်ပြည့်စုံသော ကျောင်းသားလူငယ်များ ဖြစ်စေရေးအသိပညာပေးဟောပြောပွဲကို၁၉.၁.၂၀၂၄ရက်နေ့ကပဲခူးမြို့နယ်၊အခြေခံပညာအလယ်တန်းကျောင်းခွဲ၊သရက်ကုန်း (ကရင်)ကျေးရွာတွင် ကျင်းပပြုလုပ်ခဲ့ပါသည်။အခမ်းအနားသို့ ပဲခူးတိုင်းဒေသကြီးအစိုးရအဖွဲ့၊ တိုင်းရင်းသားရေးရာဝန်ကြီး၊ ပဲခူးတိုင်းဒေသကြီး ကရင်စာပေနှင့်ယဉ်ကျေးမှုကော်မတီအဖွဲ့ဝင်များ၊ တိုင်းရင်းသားလူမျိုးများရေးရာဝန်ကြီးဌာန၊ တိုင်းရင်းသားစာပေနှင့်ယဉ်ကျေးမှုဦးစီးဌာန၊ တိုင်းရင်းသားအခွင့်အရေးများကာကွယ်စောင့်ရှောက်ရေး ဦးစီးဌာနမှ တာဝန်ရှိသူများ၊ ဌာနဆိုင်ရာများမှ တာဝန်ရှိသူများ၊ ကျောင်းအုပ်ဆရာမကြီးနှင့် တိုင်းရင်းသားဘာသာစာပေသင် ဆရာ၊ဆရာမများ၊ ကျောင်းသား၊ကျောင်းသူများ တက်ရောက်ခဲ့ကြပါသည်။  အဆိုပါအခမ်းအနားတွင် ပဲခူးတိုင်းဒေသကြီးအစိုးရအဖွဲ့၊ တိုင်းရင်းသားရေးရာဝန်ကြီး ဦးစောလင်းအောင်က  အဖွင့်အမှာစကားပြောကြားခဲ့ပြီး တက်ရောက်လာကြသည့် ဌာနဆိုင်ရာမှ တာဝန်ရှိသူများက ဗလငါးတန်ဖွံ့ဖြိုးရန်အကြောင်း၊ ဗလငါးတန်နှင့်ပြည့်စုံသော ကျောင်းသားလူငယ်များ ဖြစ်စေရေး၊ ကလေးများ၏ဖွံ့ဖြိုးမှု၊ လူငယ်နှင့် အားကစားအကြောင်း၊ အစားအသောက်ဘေးကင်း လုံခြုံ စိတ်ချစေရေးနှင့် ကျန်းမာကြံ့ခိုင်ကာယဗလမဏ္ဍိုင်ဆက်နွယ်မှု စသည့် ခေါင်းစဉ်များဖြင့် အသိ ပညာ ဗဟုသုတများရရှိစေရန်  ကျောင်းသားလူငယ်များအား ဟောပြောခဲ့ကြပါသည်။ ဆက်လက်၍ တိုင်းရင်းသားရေးရာဝန်ကြီး ဦးစောလင်းအောင်က ဟောပြောပို့ချသူများအားအမှတ်တရလက်ဆောင်များပေးအပ်ခဲ့ပြီးတိုင်းရင်းသားစာပေနှင့်ယဉ်ကျေးမှုဦးစီးဌာန၊ ပဲခူးတိုင်း ဒေသကြီး တာဝန်ခံ ညွှန်ကြားရေးမှူး ဒေါ်နီနီဝင်းသန်းမှ ကျောင်းစာကြည့်တိုက်အတွက် သုတ၊ ရသ စာအုပ်များနှင့် ငွေကျပ်(၁၀၀,၀၀ဝိ/-) လှူဒါန်းခဲ့ကြောင်း သတင်းရရှိခဲ့ပါသည်။

• 29 January 2024
• ဧရာဝတီတိုင်းဒေသကြီး၊ပုသိမ်မြို့

ပုသိမ်ခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှဦးစီး၍  တိုင်းရင်းသားစာပေနှင့်ယဉ်ကျေးမှုဦးစီးဌာန၊ ဧရာဝတီတိုင်းဒေသကြီး၊ ညွှန်ကြားရေးမှူးရုံး၊ အခြေခံပညာဦးစီးဌာနတို့နှင့်ပူးပေါင်းပြီး အသိပညာပေးဟောပြောပွဲနှင့် လူငယ်စကားဝိုင်းအခမ်းအနားကို ၂၀၂၄ခုနှစ်၊ဇန်နဝါရီလ၂၄ရက်နေ့က ပုသိမ်မြို့၊ အ.ထ.က (၅)၊ ပင်လုံခန်းမဆောင်၌ ကျင်းပပြုလုပ်ခဲ့ပါသည်။အခမ်းအနားတွင် ပုသိမ်မြို့၊ အ.ထ.က(၅) ကျောင်းအုပ်ဆရာမကြီး ဒေါ်လေးဖြူက အဖွင့်အမှာစကားပြောကြားပြီး ပုသိမ်ခရိုင်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊လက်ထောက်ညွှန်ကြားရေးမှူး ဦးဝင်းရှိန်က အသိပညာပေးဟောပြောပွဲနှင့် လူငယ်စကားဝိုင်းကျင်းပပြုလုပ်ရခြင်း၏ ရည်ရွယ်ချက်အား ရှင်းလင်းပြောကြား ခဲ့ပါသည်။ ဆက်လက်ပြီး တိုင်းရင်းသားစာပေနှင့်ယဉ်ကျေးမှုဦးစီးဌာန၊ ညွှန်ကြားရေးမှူးရုံးမှ တာဝန်ခံ အရာရှိ လက်ထောက်ညွှန်ကြားရေးမှူး ဒေါ်အေးကျော့ရီက တိုင်းရင်းသားလူမျိုးများရေးရာဝန်ကြီးဌာန အကြောင်း မိတ်ဆက်ပြောကြားပြီး တိုင်းရင်းသားစာပေနှင့်ယဉ်ကျေးမှု ခေါင်းစဉ်ဖြင့် အသိပညာပေး ဟောပြောခဲ့ပါသည်။ အဲ့ဒီနောက် လူငယ်စကားဝိုင်း စတင်ရန်အတွက် ပါဝင်ဆွေးနွေးမည့် ကျောင်းသား/ကျောင်းသူ များက လူငယ်နှင့်ကျန်းမာရေး၊ လူငယ်နှင့်စာရိတ္တ၊ လူငယ်နှင့်မူးယစ်ဆေးဝါး၊ လူငယ်နှင့်စာပေ စသည့်အကြောင်းအရာများအား ဆွေးနွေးခြင်း၊ ဖြေကြားခြင်းများကို ဆောင်ရွက်ခဲ့ကြပါသည်။ထို့နောက် ပုသိမ်ခရိုင်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လက်ထောက်ညွှန်ကြားရေးမှူး ဦးဝင်းရှိန်က လူငယ်စကားဝိုင်းတွင် ပါဝင်ဆွေးနွေးသူများအား ဂုဏ်ပြုမှတ်တမ်း များပေးအပ်ခြင်း၊ တိုင်းရင်းသားစာပေနှင့်ယဉ်ကျေးမှုဦးစီးဌာန၊ ညွှန်ကြားရေးမှူးရုံးမှ တာဝန်ခံအရာရှိ လက်ထောက်ညွှန်ကြားရေးမှူး ဒေါ်အေးကျော့ရီကပုသိမ်မြို့၊အ.ထ.က(၅)ကျောင်းစာကြည့်တိုက်အတွက် စာအုပ်များပေးအပ်လှူဒါန်း၍ စုပေါင်းမှတ်တမ်းဓါတ်ပုံများ ရိုက်ကူးခဲ့ကြပြီး အခမ်းအနားကို ရုပ်သိမ်းခဲ့ကြောင်း သတင်းရရှိပါသည်။

• 25 January 2024
• နေပြည်တော်

တိုင်းရင်းသားလူမျိုးများရေးရာဝန်ကြီးဌာန၊ အရာထမ်းစီမံခန့်ခွဲမှုသင်တန်း အမှတ်စဉ် ၁/၂၀၂၄ ဖွင့်ပွဲအခမ်းအနားကို ဇန်နဝါရီလ  ၂၅ ရက်နေ့ နံနက်ပိုင်းတွင် တိုင်းရင်းသားလူမျိုးများ ရေးရာဝန်ကြီးဌာန၊ ပြည်ထောင်စုဝန်ကြီးရုံး၊ အစည်းအဝေးခန်းမ၌ ကျင်းပပြုလုပ်ရာ ပြည်ထောင်စုဝန်ကြီး Jeng Phang နော်တောင်၊ ဒုတိယဝန်ကြီး ဦးဇော်အေးမောင်၊ အမြဲတမ်း အတွင်းဝန်၊ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူး ချုပ်များ၊ သင်တန်းသား၊ သင်တန်းသူများနှင့် အရာထမ်း၊ အမှုထမ်းများ တက်ရောက်ခဲ့ကြပြီး တိုင်းဒေသကြီး/ ပြည်နယ် ညွှန်ကြားရေးမှူးရုံးများနှင့် ပြည်ထောင်စုတိုင်းရင်းသားကျေးရွာ (ရန်ကုန်) မှ သင်တန်းသား၊ သင်တန်းသူများက  Hybrid စနစ်ဖြင့် တက်ရောက်ခဲ့ကြပါသည်။ ရှေးဦးစွာ ပြည်ထောင်စုဝန်ကြီးက အဖွင့်အမှာစကားပြောကြားရာတွင် အရာထမ်း စီမံခန့်ခွဲမှုသင်တန်းကို နိုင်ငံတော်စီမံအုပ်ချုပ်ရေးကောင်စီ၏ လမ်းညွှန်ချက်နှင့်အညီ  တိုင်းရင်းသားလူမျိုးများရေးရာဝန်ကြီးဌာနရှိ အရာထမ်းများအား နိုင်ငံတော်နှင့် ပြည်သူများ၏ အကျိုးစီးပွားအတွက် တာဝန်ထမ်းဆောင်ရာတွင် စီမံခန့်ခွဲမှုအရည်အသွေးနှင့် လုပ်ငန်း စွမ်းဆောင်ရည်မြင့်မားလာစေရန်၊ ကောင်းမွန်သော အုပ်ချုပ်မှုစနစ်ဖော်ဆောင်ရာတွင်  အထောက်အကူပြုစေရန် ရည်ရွယ်၍ဖွင့်လှစ်ခြင်းဖြစ်ပါကြောင်း၊ အရာထမ်းများသည် အထက် အကြီးအကဲများ၏ လမ်းညွှန်ချက်နှင့် ညွှန်ကြားချက်များကိုခံယူခြင်း၊ လက်အောက်ဝန်ထမ်း များကို ကြီးကြပ်ကွပ်ကဲခြင်းလုပ်ငန်းများ ဆောင်ရွက်ရသည့် အရေးကြီးအခန်းကဏ္ဍတွင် ပါဝင် သူများဖြစ်ရာ ရိုးသားဖြောင့်မတ်မှု၊ စွမ်းဆောင်ရည်ပြည့်ဝမှု၊ တာဝန်ယူမှု တာဝန်ခံမှုများဖြင့် လျင်မြန်သွက်လက်စွာ ဆောင်ရွက်နိုင်ရန် လိုအပ်ပါကြောင်း၊ ဗဟုသုတပညာ (General Knowledge)၊ အတတ်ပညာပိုင်းဆိုင်ရာကျွမ်းကျင်မှု (Skill) နှင့် စိတ်နေစိတ်ထား (Attitude) ကောင်းမွန်ခြင်းတို့ကိုလည်း ထားရှိကျင့်ကြံရန်နှင့် ခေတ်နှင့်အညီ တိုးတက်ပြောင်းလဲလာသည့် နည်းပညာများကိုလည်း စဉ်ဆက်မပြတ် သင်ယူလေ့လာ၍ လုပ်ငန်းများအောင်မြင်စွာ အကောင်အထည်ဖော်ဆောင်ရွက်ရန် ဖြစ်ပါကြောင်း၊ ယခုသင်တန်းမှ ကမ္ဘာ့အကြောင်း၊ မြန်မာ့ အကြောင်း၊ တိုင်းရင်းသားလူမျိုးများ၏ ရိုးရာဓလေ့ ယဉ်ကျေးမှု ထုံးတမ်းအစဉ်အလာများ၊ မူဝါဒဆိုင်ရာများ၊ စီမံခန့်ခွဲမှုနှင့် ဘဏ္ဍာရေးဆိုင်ရာကိစ္စရပ်များ၊ ဖွံ့ဖြိုးတိုးတက်မှုနှင့် သက်ဆိုင် သည့် သဘောတရားများကို စနစ်တကျကောင်းမွန်စွာ လေ့လာသိရှိနိုင်မည်ဖြစ်ပြီး လုပ်ငန်းခွင် တွင် ထိရောက်မှန်ကန်စွာ အသုံးချဆောင်ရွက်နိုင်ရန် အထူးလိုအပ်ပါကြောင်း၊ နိုင်ငံ့ဝန်ထမ်း များသည် နိုင်ငံသူ၊ နိုင်ငံသားများ၏ အကျိုးစီးပွားကို မှန်ကန်သစ္စာရှိစွာ ဖော်ဆောင်ပေးရန် လိုအပ်ပြီး မိမိတို့တာဝန်ထမ်းဆောင်လျက်ရှိသည့် တိုင်းဒေသကြီးနှင့် ပြည်နယ် ဖွံ့ဖြိုး တိုးတက်ရေးအတွက်လည်း ဝိုင်းဝန်းဆောင်ရွက်ပေးကြရမည်ဖြစ်ပါကြောင်း၊ ထို့အတူ နိုင်ငံ့ ဝန်ထမ်း သစ္စာအဓိဋ္ဌာန် (၆) ချက်ကို ကောင်းစွာ သိရှိနားလည်ပြီး မိမိနိုင်ငံနှင့် ဝန်ကြီးဌာနအပေါ် သစ္စာရှိစွာဖြင့် တက်တက်ကြွကြွ ကြိုးစားဆောင်ရွက်ကြရန် အထူးတိုက်တွန်းပြောကြားလို ပါကြောင်း၊ ယခုသင်တန်းကို တက်ရောက်ခြင်းဖြင့် အရည်အချင်းပြည့်ဝသော၊ တရားမျှတသော၊ ပွင့်လင်းမြင်သာသော၊ စွမ်းဆောင်ရည်ရှိသော၊ ပြည်သူ့ဘဏ္ဍာငွေ အရင်းအမြစ်များကို ထိရောက်စွာ စီမံခန့်ခွဲနိုင်သော၊ ပြည်သူများ၏ အကျိုးစီးပွားကို ထိရောက်ကောင်းမွန်စွာ ဝန်ဆောင်မှုကောင်းနှင့် ရလဒ်ကောင်းများပေးနိုင်သော အရာထမ်းကောင်းများဖြစ်နိုင်ရေး ရာနှုန်းပြည့် အထောက်အကူဖြစ်ပါစေကြောင်း တိုက်တွန်းပြောကြားပါသည်။  ဆက်လက်၍ ဒုတိယဝန်ကြီး ဦးဇော်အေးမောင်က ယခုသင်တန်းသည် ၂၀၂၄ ခုနှစ်တွင် ပထဆုံးဖွင့်လှစ်သည့် သင်တန်းဖြစ်ပါကြောင်း၊ နိုင်ငံ့ဝန်ထမ်းများသည် နိုင်ငံတော်၏ ယန္တရားလည်ပတ်ရေးအတွက် မောင်းနှင်အားပင်ဖြစ်ပါကြောင်း၊ ဝန်ထမ်းများအနေဖြင့် နိုင်ငံတော်က ခေါ်ယူသောသင်တန်းများ၊ ဌာနတွင်းသင်တန်းများအားလုံးကို တက်ရောက်ခြင်းဖြင့် စွမ်းဆောင်ရည် တိုးတက်မြင့်မားလာပြီး လုပ်ငန်းတာဝန်များကို ကျေပွန်စွာထမ်းဆောင်နိုင်မည် ဖြစ်ပါကြောင်း၊ ယခုသင်တန်းမှ သင်ကြားပို့ချမှုများကို လေ့လာ မှတ်သားလိုက်နာပြီး မိမိတို့၏ လုပ်ငန်းခွင်တွင် လိုအပ်သလို အသုံးချဆောင်ရွက်ရန်ဖြစ်ပါကြောင်း၊  ဝန်ထမ်းများအနေဖြင့် ဖွဲ့စည်းပုံအခြေခံဥပဒေ(၂၀၀၈)၊  တိုင်းရင်းသားအခွင့်အရေးများကာကွယ်စောင့်ရှောက်သည့်ဥပဒေ၊ နည်းဥပဒေ၊ မြန်မာနိုင်ငံ၏ ဘဏ္ဍာရေးစီမံခန့်ခွဲမှုဆိုင်ရာစည်းမျဉ်း (၃၅/၂၀၁၇)နှင့် နိုင်ငံ့ဝန်ထမ်း ဥပဒေ၊ နည်းဥပဒေတို့ကို သိရှိလေ့လာထားရန် လိုအပ်ပါကြောင်း၊ ထို့အပြင် ကမ္ဘာ့သတင်း၊ မြန်မာ့ သတင်းများကို အချိန်နှင့်တစ်ပြေးညီ သိရှိနိုင်ရေးအတွက် နေ့စဉ်ထုတ်သတင်းစာများ ဖတ်ရှု ခြင်းဖြင့် ဗဟုသုတများ တိုးပွားလာမည်ဖြစ်ပါကြောင်း၊ နိုင်ငံ့ဝန်ထမ်းများဖြစ်သဖြင့် နိုင်ငံ့ ဝန်ထမ်းသစ္စာအဓိဋ္ဌာန် (၆)ချက်ကို လေးစားလိုက်နာရန် လိုအပ်ပါကြောင်း၊ ဝန်ထမ်းကောင်းမှ ဌာနကောင်းမည်ဖြစ်ပြီး ဌာနကောင်းမှ နိုင်ငံကောင်းမည်ဖြစ်ပါကြောင်း၊ နိုင်ငံကောင်းလျှင် ပြည်သူလူထုတစ်ရပ်လုံး နိုင်ငံတော်၏ ဖွံ့ဖြိုးတိုးတက်မှုအသီးအပွင့်များကို ခံစားကြရမည် ဖြစ်သဖြင့် ဂရုတစိုက်သင်ကြား လေ့လာကြစေလိုပါကြောင်း ပြောကြားပါသည်။ ယနေ့ဖွင့်လှစ်သည့်သင်တန်းသို့ သင်တန်းသား သင်တန်းသူ (၅၈) ဦး တက်ရောက်ကြပြီး သင်တန်းကာလကို ရက်သတ္တ(၂)ပတ်ကြာ သင်ကြားပို့ချသွားမည်ဖြစ်ကြောင်း သတင်းရရှိပါသည်။